سر وزیر بلوچستان میر سرفراز بگٹی ءَ گوں کوئٹہ ءِ باصلاحیتیں انٹرنیشنل پروفیشنل باکسر عابدہ بتول ءَ گوں گند ءُ نند

کوئٹہ۔ 08 اکتوبر (اے پی پی): بلوچستان ءِ سر وزیر میر سرفراز بگٹی ءَ کوئٹہ ءِ باصلاحیتیں میاں اوستمانی پروفیشنل باکسر عابدہ بتول ءَ گند ءُ نند کت۔ گند ءُ نند ءَ اسپورٹس ءُ ورنای کارانی صوبائی مشیر مینا مجید بلوچ ءُ سیکرٹری اسپورٹس دارا بلوچ ہم ساڑی ات انت۔ سر وزیر بلوچستان ءَ عابدہ بٹول ءَ را میاں اوستمانی ءُ راجی تک ءَ مزنیں سوبمندی ءِ ھاترا مبارک بات دات ءُ آئی ءِ جوانیں کارکردگی ءِ سر ءَ فخر ءِ درشان کت۔ آئی ءَ گوشت کہ عابدہ بتول ءَ میاں اوستمانی تک ءَ پاکستان ءُ بلوچستان ءَ را شان ءُ شُہرت آؤرتگ، ایشی ءِ سر ءَ سرجمیں راج ءُ صوبہ ءِ الس ءَ پھر انت۔ بنجاہی وزیر میر سرفراز بگٹی ءَ جار جتگ کہ ترکی ءَ برجم دارگ بوؤکیں میاں اوستمانی مقابلہ ءَ عابدہ بتول ءِ بہر زورگ ءِ سرجمیں سفری ھرچ ءُ درچ بلوچستان حکومت ءِ زمہ واری ءَ زوریت۔ آئی ءَ گوشت کہ حکومت باصلاحیتیں کھڈکار آناں سرجمی ءَ دلبڈی دیگ ءَ اِنت ءُ کھیڈ آنی دیمروئی ءِ واستہ ھمک وسیلگ آناں کارمرد کنگ ءَ اِنت۔ بنجاھی وزیر ءَ گوشت کہ عابدہ بٹول ءِ وڑیں لیب کنوک صوبگ ءِ شان انت کہ آ نہ ایوک ءَ لیب ءُ گوازی ءِ شوبگ ءَ وتی ازم ءَ را ثابت کنگ ءَ انت بلکینگ ءَ نوکیں نسل ءِ واستہ یک جوانیں درور ءِ ھم دیم ءَ آرگ ءَ انت۔ آئی ءَ گوشت کہ میاں اوستمانی تک ءَ زالبولیں لیب کنوک آنی بھر زوری ءَ چہ بلوچستان ءِ رژنائیں ءُ جوانیں پجار ءَ را دگنیا ءِ دیم ءَ پدر کنگ ءَ انت۔ اے موہ ءِ سر ءَ بنجاھی وزیر بلوچستان میر سرفراز بگٹی ءَ محکمہ اسپورٹس ءَ را ھم پنت ءُ شون کت کہ آ زالبولیں ایتھلیٹ آنی تربیت ، آسراتی ءُ موہ آناں دیمروئی دیگ ءِ واستہ گیش گامگیج بہ زوریت۔ بنجاھی وزیر بلوچستان میر سرفراز بگٹی ءِ سرجمیں دلبڈی ءُ سرپرستی ءِ سر ءَ منت واری درشان کنان ءَ عابدہ بتول ءَ گوشت کہ آ دیم ءَ ھم مھکم ءُ جزم ءِ گوما ملک ءُ صوبہ ءِ نام ءَ را میاں اوستمانی ءُ راجی مقابلہ آنی تہ ءَ گیش رژنا کنگ ءِ واستہ محنت ءُ جزم ءِ گوما کار کنت۔