بنجائی وزیر بحری امور نا میری ٹائم کانفرنس نا اڈتننگ نا پڑو، داڑآن جہانی زرکارآتے راغب کننگک، محمد جنید انوار چوہدری

اسلام آباد۔ 08 اکتوبر (اے پی پی) بنجائی وزیر بحری امور محمد جنید انوار چوہدری پاکستان میری ٹائم انویسٹمنٹ کانفرنس 2025 نا اڈتننگ نا پڑو کرینے ہرانا مسخت سمندری بشخ اٹی زرکاری نا گیشتر وارخواہی ءِ جہانی زرکارآتا مون آ تالان کننگ ءِ۔ بڑزکو کہولی دیوان نا کماشی ءِ کرسا جنید انوار چوہدری پارینے کہ بروک آفورم اٹی ملکی و درملکی زرکارآتے غٹ بندرگاہ و تعلقدارادارہ غاتیٹی مائیکرو و میکرو کہول انا زرکاری وارخواہی پیش کننگک۔ اوپارے کہ دا گام انا مسخت پائیدار زرکاری نا کمک اٹ بلیو اکانومی و سمندری انفراسٹرکچر ءِ سوگو کننگ ءِ۔ دیوان نا ایجنڈا ٹی فورم نا تاریخ، ہند و موضوعاتی پلوآتا بابت اہم فیصلہ اوار ئسر۔ کمامدارآک امنا کریر کہ دا تینا نوعیت نا اولیکو کانفرنس پاکستان ءِ ڈیہہ اٹی سمندری زرکاری و اختراع نا مرکز جوڑ کننگ اٹ کمکار مریک۔ دیوان اٹی بندرگاہی انفراسٹرکچر ، ماہی گیری، سمندری ٹرانسپورٹ، جہاز سازی و کرکی سیل و سوات تون اوار چندی بشخ آتیٹی زرکاری نا گمان تیا سرجمی اٹ سجفنگا تانکہ قومی زرگزران نا تنوع پذیری و پائیدار شونداری نا ہدف آتون ہم گرنچ ڈٹ بندی کننگ مرے۔ دیوان اٹی فورم نا تشہیر کن سٹریٹجک میڈیا و برانڈنگ مہم نا بابت سلاہ تا بابت سلابت ہم کننگا تانکہ زرکار، مالیاتی ادارہ و شونداری شریدار آتا بڑزکو کہولی بشخ ہلنگ ءِ پک کننگ مرے۔ بنجائی وزیر تعلقدار ادارہ غاتے پارت کرے کہ زرکاری سلاہ و ڈٹ آتا پیشکش کن آب اٹ ٹیمپلیٹس زوت آن زوت تیار کننگے تانکہ پوسکن آ ڈٹ آتا جاچ و منظوری نا عمل ءِ گچین کننگ مرے۔ جنید انوار چوہدری پارے کہ السی ونجی بشخ آتا شریداری آن پاکستان نا سمندری کچ ءِ دُوارہ تالان کننگ مریک۔ اواومیت ظاہر کرے کہ میری ٹائم انویسٹمنٹ فورم وکانفرنس ملک انا بلیو اکانومی نا مون آدننگ اٹ اہم مزل نا نشان پک مریک۔