این ڈی ایم اے نا پیشگی آگاہی نظام جہانی آب اسکان سرمسنے، آفت آتون مون تننگ کن نیشنل ریسورس نیٹ ورک ا س جوڑ کننگ ءِ، چیئرمین لیفٹیننٹ جنرل انعام حیدر ملک

اسلام آباد۔ 08 اکتوبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) نا چیئرمین لیفٹیننٹ جنرل انعام حیدر ملک پارینے کہ این ڈی ایم اے نا پیشگی آگاہی نظام جہانی آب اسکان سرمسنے، پاکستان آفت آتون مون تننگ کن اسہ نیشنل ریسورس نیٹ ورک اس جوڑ کننگ انگ ءِ۔ داخیال آتا درشانی ءِ او چارشنبے نادے آ قومی یوم استقامت نا وخت آ تینا خصوصی کلہو اٹی کرے۔ این ڈی ایم اے ٹی نیشنل ریزیلیئنس ڈے انا مرکزی دود اڈ ہلک۔ چیئرمین این ڈی ایم اے پارے کہ 8 اکتوبر ننے 2005 نا زمی جمب و ایلو آفت آتا یات ترفک ، دادے انا مسخت آفت آتون مون تننگ نا قومی لائخی و عزم ءِ تالان کننگ ءِ ۔ چیئرمین این ڈی ایم اے پارینے کہ 2005 آن 2025 اسکان بروک آ غٹ آفت آتیان دوئی آزموندہ غاک ننا راہشونی ءِ کیرہ۔ او غٹ منشاکار و ادارہ غاتے خراج تحسین پیش کرساپارے کہ پاکستان نا قوم ہرآفت اٹی یکجہتی و کمک نا جوزہ غان پک کرے کہ نن سوگو ءُ قوم اسے اُن۔ اوناپاننگ ئس کہ این ڈی ایم اے نا پیشگی آگاہی نظام جہانی آب اسکان سرمسنے، داسہ آفت آتا بابت معلومداری وخت آ  الس و تعلقدار ادارہ غاتسکان سرمننگ ءِ۔ چیئرمین این ڈی ایم اے پارے کہ بنجائی، صوبائی ادارہ، سلہہ بند فوج   و جہانی ادارہ غاتون رابطہ ٹی اُن، پاکستان آفت آتون مون تننگ کن اسہ نیشنل ریسورس نیٹ ورک اس جوڑ کننگ انگ ءِ۔ اوآفت آتا بابت آزموندہ غاتا ہل و تس نا گرج آ زور شاغا۔ چیئرمین این ڈی ایم اے پاکستان نا فوج، آسودہی ادارہ و منشاکار آتا منت واری ءِ ہرفے۔ دود اٹی وزیر آک، چاہندار و چندی زند انا بشخ آتیان تعلق تخوک آ بندغ آک بشخ ہلکر۔ قوم یوم استقامت نا مسخت سوگو و رکھوک پاکستان نا کنڈآ پیش گامی ءِ۔