یومِ استقامت آ قوم انا حوصلہ، قربانی و سیوت ءِ خراج تحسین پیش کیوہ، بنجائی وزیر داخلہ محسن نقوی

اسلام آباد۔ 08 اکتوبر (اے پی پی) بنجائی وزیر داخلہ محسن نقوی پارینے کہ 8 اکتوبر 2005 انا زمی جمب انا بھسکاری تے قوم اینو اسکان است آن دتنے۔ یومِ استقامت آ قوم انا حوصلہ، قربانی و سیوت ءِ خراج تحسین پیش کیوہ۔ قوم یومِ استقامت نا وخت آ تینا کلہو اٹی وزیرداخلہ پارے کہ 8 اکتوبر نادے ننے یات ترفک کہ قدرتی آفت آتا مون آ شیف توننگ نا جاگہ غا پاکستانی قوم صبر، ہمت و یکجہتی نا درشانی ءِ کرے۔ اوپارے کہ دا است ہسون سانحہ ٹی ہزار آ نہادی جونک زیان مسر و لکھ آ بندغ آک بے اُرا مسر، ولے قوم ہرا جوزہ و سیوت اتون کمکی سرجزآتیٹی بشخ ہلک، او ننا قومی تاریخ نا اسہ روشنا ءُ بشخ اسے۔ محسن نقوی پارے کہ ای 8 اکتوبر آ زوال کروک آ غٹ بندغ آتے خراج عقیدت پیش کیوہ، ہرافتا قربانیک ننے انسانیت، خذمت و ایثار نا درس ایترہ۔ او ریسکیو ادارہ، پاکستان نا فوج، سول سوسائٹی و جہانی کمکی تنظیم تا منت واری ءِ ہرفے ہرافک زہمی تا کمک و بحالی ٹی اہم کڑد ادا کریر۔ بنجائی وزیر داخلہ پارے کہ حکومت قدرتی آفت آتون مون تننگ کن پوسکن آ نظام، پیشگی تیاری و دمدستی ردعمل نا لائخی ءِ پین سوگو کننگ نا عزم انا درشانی ءِ کیک۔