مزن وزیر محمد شہباز شریف ملائیشیا ءِ سئے روچی سرکاری تر ءُ تاب ءِ سرجم کنگ ءَ پد وطن ءَ واتر پج اتگ

اسلام آباد۔7اکتوبر  (اے پی پی): مزن وزیر محمد شہباز شریف ملائیشیا ءِ سئے روچی تر ءُ تاب ءِ سرجم کنگ ءَ پد وطن ءَ واتر بوتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ملائیشیا ءِ مزن وزیر داتو سری انور ابراہیم کوالالمپور ءِ بنگا رایا میاں اوستمانی بالی پٹ ءَ پاکستان ءِ مزن وزیر ءَ چہ الوداع کنگ ءِ واستہ ذاتی رنگ ءَ ھوار بوتگ۔ مزن وزیر ءَ را وتی گس ءَ چہ بالی پٹ ءَ تاں غیر معمولی سرکاری پروٹوکول دیگ بوت وھدیکہ مزن وزیر ءِ ملائیشیا ءَ سر بوھگ ءِ وھد ءَ ملائیشیا ءِ مزن وزیر داتو سری انور ابراہیم پاکستانی مزن وزیر ءِ گس ءَ وش آتک کنگ ءِ واستہ ھوار ات۔ ملائیشیا ءِ مزن وزیر ءَ الوداع کنان ءَ مزن وزیر محمد شہباز شریف ءَ را ملائیشیا ءِ تر ءُ تاب ءِ اکس آنی سر ءَ یک یادگاری البم ءِ ھم پیش کت۔ مزن وزیر ءِ ملائیشیا ءِ تر ءُ تاب ءِ ساھت ءَ گرمائش ءِ یک غیر معمولی شو گندگ بوتگ۔ روچ ءِ سرکاری تر ءُ تاب ءِ ساھت ءَ مزن وزیر شہباز شریف ءَ ملائیشیا ءِ انتظامی مرکز پٹرا ءِ تر ءُ تاب کت ایشی ءِ تہ ءَ مزن وزیر کارگس (پردانا پترا) ءَ سر بوھگ ءِ سر ءَ مزن وزیر ءَ را مزنیں وش اتک کنگ بوت۔ اے موہ ءِ سر ءَ آئی ءَ را ملائیشیا ءِ سلاہ بندیں اُرد ءِ دستہ ءِ نیمگ ءَ گارڈ آف آنر پیش کنگ بوت ایشی ءَ پد پاکستان ءِ مزن وزیر ءُ ملائیشیا ءِ مزن وزیر ءِ نیام ءَ دو نیمگی گند ءُ نند بوت۔ دوئیں مزن وزیر آں ڈل ءِ تک ءِ دیوان ءَ وتی وتی ڈل آنی سروکی کت۔ تر ءُ تاب ءِ ساھت ءَ دوئیں ملک آنی نیام ءَ بازیں شوبگ آنی تہ ءَ کمک ءِ واستہ مفاہمت نامہ آنی سر ءَ ھم دستخط کنگ بوت۔ ایشی ءَ ابید پاکستان ءِ مزن وزیر ءُ ملائیشیا ءِ مزن وزیر ءَ پاکستان ءُ ملائیشیا کاروبار ءُ سرمایہ کاری کانفرنس ءَ شریک بوتگ۔ مزن وزیر ءَ را انٹرنیشنل اسلامک یونیورسٹی آف ملائیشیا ءِ نیمگ ءَ لیڈر شپ ءُ گورننس ءِ پڑ ءَ اعزازی پی ایچ ڈی ءِ ڈگری ھم دیگ بوت۔ مزن وزیر ءِ تر ءُ تاب دوئیں ملک آنی نیام ءَ تیزی ءَ گوں دیمروئی کنوکیں سفارتی ءُ اقتصادی سیادی ءِ درشان اِنت ءُ اے سیادی ءَ را گیش مھکم کنگ ءَ کمک کنت۔