مزن وزیر شہباز شریف ملائیشیا ءِ سئے روچی سرکاری تر ءُ تاب ءَ سرجم کنگ ءَ پد وتی ڈیھ ءَ روگ ءَ انت، ملائیشیا ءِ مزن وزیر آئی ءَ را بالی پٹ ءَ بروپہ ھیر   کنگ ءِ واستہ اتکگ ات

کوالا لمپور۔7اکتوبر  (اے پی پی): مزن وزیر محمد شہباز شریف ملائیشیا ءِ سئے روچی سرکاری تر ءُ تاب ءِ سرجم کنگ ءَ پد وتی ملک ءَ شتگ۔ ملائیشیا ءِ مزن وزیر داتو سری انور ابراہیم کوالالمپور ءِ بنگا رایا میاں اوستمانی بالی پٹ ءَ پاکستان ءِ مزن وزیر ءَ را بروپہ ھیر   کنگ ءِ واستہ ذاتی رنگ ءَ اتکگ۔ اے موہ ءِ سر ءَ ملائیشیا ءَ پاکستان ءِ ہائی کمشنر سودیز احسن رضا ءُ سفارتی کارندہ ھم ساڑی اتنت۔ مزن وزیر ءَ را وتی گس ءَ چہ بالی پٹ ءَ تاں یک معمولی سرکاری پروٹوکول ءِ داتگ ات، وھدے کہ ایشی ءَ چہ پیسر مزن وزیر ءِ ملائیشیا ءَ آیگ ءِ وھد ءَ ملائیشیا ءِ مزن وزیر داتو سری انور ابراہیم پاکستان ءِ گس ءَ مزن وزیر ءِ وش آتک کنگ ءِ واستہ ھوار ات۔ ملائیشیا ءِ مزن وزیر ءَ بروپہ ھیر   کنگ ءِ وھد ءَ مزن وزیر محمد شہباز شریف ءَ را ملائیشیا ءِ تر ءُ تاب ءِ اکس ھواریں یاتگاری البم ھم پیش کت۔ مزن وزیر ءِ ملائیشیا ءِ تر ءُ تاب ءِ ساھت ءَ آئی ءَ غیر معمولی گرمائش ءِ درشانی کت۔ روچ ءِ سرکاری تر ءُ تاب ءِ ساھت ءَ مزن وزیر شہباز شریف ءَ ملائیشیا ءِ انتظامی مرکز پٹرا ءِ تر ءُ تاب کتگ ات ایشی ءِ تہ ءَ آئی ءَ را مزن وزیر کارگس (پردانا پترا ) ءَ مزنیں وش آتک کنگ بوتگ ات۔ اے موہ ءِ سر ءَ ملائیشیا ءِ سلاہ بندیں اُرد ءِ دستہ ءِ نیمگ ءَ گارڈ آف آنر پیش کنگ بوت ایشی ءَ پد پاکستان ءِ مزن وزیر ءُ ملائیشیا ءِ مزن وزیر ءِ نیام ءَ دو نیمگی گند ءُ نند بوت۔ دوئیں مزن وزیر آں ڈل ءِ تک ءَ گند ءُ نند کت ءُ وتی وتی ڈل آنی سروکی کت۔ تر ءُ تاب ءِ ساھت ءَ دوئیں ملک آنی نیام ءَ بازیں شعبہ آنی تہ ءَ کمک ءِ واستہ مفاہمت نامہ آنی سر ءَ ھم دستخط کنگ بوت۔ ایشی ءَ ابید پاکستان ءِ مزن وزیر ءُ ملائیشیا ءِ مزن وزیر ءَ پاکستان ءُ ملائیشیا کاروبار ءُ سرمایہ کاری کانفرنس ءَ شریک بوتگ۔ مزن وزیر ءَ را انٹرنیشنل اسلامی یونیورسٹی آف ملائیشیا  ءِ نیمگ ءَ لیڈر شپ ءُ گورننس ءِ پڑ ءَ اعزازی پی ایچ ڈی ءِ ڈگری ھم دیگ بوتگ۔ مزن وزیر ءِ تر ءُ تاب دوئیں ملک آنی نیام ءَ دیمروئی کنوکیں سفارتی ءُ اقتصادی سیادی ءِ درشان اِنت ءُ اے سیادی ءَ را گیش مھکم کنگ ءَ کمک کنت۔