بلوچستان نا غٹ آن بھلا ویل امن و ایمنی یا پن انا بے چیٹی اف بلکن کرپشن ءِ، وزیراعلیٰ میر سرفراز بگٹی

کوئٹہ۔ 07 اکتوبر (اے پی پی) وزیراعلیٰ بلوچستان میر سرفراز بگٹی پارینے کہ بلوچستان نا غٹ آن بھلا ویل امن و ایمنی یا پن انا بے چیٹی اف بلکن کرپشن ءِ ہرا دا صوبہ نا ادارہ، راجی پنجر و ورناتا پت ءِ بھاز بے وڑ زہمی کرینے، امن و ایمنی نا چیلنج تون مون تننگ کن ننا سیکورٹی فورس آک پبی کسبی کچ تخرہ، مرکزی ویل کرپشن نا ءِ، کرپشن نا چٹفنگ آن بیدس شونداری، انصاف و گچین طرز حکمرانی ممکن اف۔ داخیا ل آتا درشانی ءِ او سے شنبےنادے آ انسداد کرپشن ڈے انا وخت  بلوچستان یونیورسٹی آ ف انفارمیشن ٹیکنالوجی ، انجینئرنگ اینڈ مینجمنٹ سائنسز (BUITEMS)اٹی بین الیونیورسٹیز سپورٹس فیسٹیول نا ایسری دود آن تران کرساکرے۔ دود آن صوبائی سلاہکار گوازی و امور نوجوانان مینا مجید بلوچ، ڈائریکٹر جنرل نیب بلوچستان نعمان اسلم، وائس چانسلر بیوٹمز پروفیسر ڈاکٹر خالد حفیظ ئسک ہم تران کریر۔ وزیراعلیٰ میر سرفراز بگٹی پارے کہ بلوچستان اٹی اولیکو وار یوتھ پالیسی درستی راستی کرفنگانے، ورناک ننا آخبت ءُ،  نمے دا پاکستان ءِ مون آ دروئی ءِ، نمے وطن عزیز نا برخلاف مروک آ غٹ سازش آتے بے سہب کروئی ءِ، نم ریاست آن مرمفیرے، نوکری، ویل و حکومت آن ناراضگی مننگ کیک و دا ویل مچ آپاکستان اٹی مون تروک ءِ ولے ریاست ہچ ءُ گناہ اس کتنے، ریاست آن خلیج ہچ ءُ حالیت اسے ٹی سہی اف، ورناک پاکستان نا برخلاف پروپیگنڈاغاتیٹی بشخ ہلپس، دا ملک اکن کاریم کروئی ءِ۔ میر سرفراز بگٹی پارے کہ نن اولیکو دے اسمبلی فلور آ قول کریسن کہ اسہ نوکری اس ہم سودا مفک، نن ایجوکیشن ڈیپارٹمنٹ اٹی دُوانزدہ غان شانزدہ ہزار استاد آتا میرٹ آ بھرتی کرین و میرٹ نا دا چرجوئی ءِ ہربشخ اٹی درستی راستی کرفنگ اُن۔ اوپارے کہ قول کینہ کہ بلوچستان اٹی گوازی تا پڑ ءِ آباد کینہ و ورناتے جان جوڑ سرجز آتا پبی وارخواہی فراوان کینہ۔ اوپارے کہ بلوچستان آن کرپشن نا توننگ کن نیب اتون اوار اوار چیف منسٹر انسپکشن ٹیم ، اینٹی کرپشن اسٹیبلشمنٹ و محکمہ جاتی جوابدہی نا عمل ءِ سوگو کننگ انگ ءِ تانکہ ہر کہول آ شفافیت و دیانتداری ءِ پک کننگ مرے۔ او پارے کہ ساڑی حکومت احتساب نا عمل ءِ سیاسی ذاتی فائدہ غاتیان ایڑتر تخانے۔