وزیراعظم شہباز شریف ملائیشیا نا مسہ دے ئی سرکاری دورہءِ پورو کننگ آن پد وطن آ پدی روانہ، ملائیشیا نا وزیراعظم بالی پٹ آ تینٹ اودے الوداع کننگ کن بس

کوالالمپور۔ 07 اکتوبر (اے پی پی) وزیراعظم محمد شہباز شریف ملائیشیا نا مسہ دے ئی سرکاری دورہ ءِ پورو کننگ آن پد وطن آ پدی روانہ مس، ملائیشیا نا وزیراعظم داتوسری انور ابراہیم وزیراعظم پاکستان ءِ تینٹ کوالالمپور نا بنگارایا جہانی بالی پٹ آ الوداع کننگ کن بس۔ داوخت آ ملائیشیاٹی تعینات پاکستان نا ہائی کمشنر سید احسن رضا و سفارتی عملہ ہم ساڑی ئس۔ وزیراعظم ءِ اونا ہنکین آن بالی پٹ اسکان اہم سرکاری پروٹوکول تننگا وخت اس کہ داکان مست وزیراعظم نا ملائیشیا غا بننگ آہم ملائیشیا نا وزیراعظم داتو سری انور ابراہیم وزیراعظم پاکستان ءِ اونا ہنکین آ بخیر اٹ پاننگ کن ساڑی ئس۔ ملائیشیا نا وزیراعظم الوداع کننگ نا وخت آ وزیراعظم محمد شہباز شریف ءِ اونا دورہ ملائیشیا نا عکس آتیا تالان یات گاری البم اس ہم پیش کرے۔ وزیراعظم نا دورہ ملائیشیا ٹی غیرمعمولی گرم جوشی نا درشانی مون آ بس۔ 3 دے ئی سرکاری دورہ ٹی وزیراعظم شہباز شریف ملائیشیا نا انتظامی مرکز پتراجایا غا ہنا ہراڑے وزیراعظم آفس (پردانا پترا) غا بننگ آ وزیراعظم ءِ جم وجوش اٹ بخیرکننگا۔ داوخت آ اودے ملائیشیا نا سلہہ بند فوج انا دستہ نا کنڈآن گارڈ آف آنر پیش کننگا اوکان پد وزیراعظم پاکستان وملائیشیا نا وزیراعظم نا نیام اٹ ہڑتوم آ کنڈآتا اوڑدہی ہم مس۔ ہڑتوم آ وزیراعظم آک ڈل آتا کہول آ اوڑدہی ٹی تینا تینا ڈل انا کماشی ءِ کریر۔ دورہ ٹی ہڑتوم آ ملک آتا نیام اٹ کیہی بشخ آتیٹی کمکاری کن مفاہمت نایات داشت آتیا دستخط ہم کننگا۔ داکان بیدس وزیراعظم پاکستان وملائیشیا نا وزیراعظم پاکستان۔ ملائیشیا بزنس اینڈ انویسٹمنٹ کانفرنس اٹی بشخ ہلک۔ وزیراعظم ءِ انٹرنیشنل اسلامک یونیورسٹی آف ملائیشیا نا کنڈآن لیڈر شپ و گورننس اٹی پی ایچ ڈی نا اعزازی ڈگری ہم تننگا۔ وزیراعظم نا دا دورہ ہڑتوم آ ملک آتا نیام اٹ ترندی اٹ ودوک آ سفارتی و اقتصادی تعلقداری تا عکاسی ءِ کیک و دا تعلقداری تے پین سوگو کننگ اٹ کمکار مریک۔