چیئرمین سینیٹ سید یوسف رضاگیلانی 68 می دولت مشترکہ پارلیمانی کانفرنس اٹی بشخ ہلنگ کن بارباڈوس آ سرمس

بارباڈوس۔ 07 اکتوبر (اے پی پی) چیئرمین سینیٹ سید یوسف رضاگیلانی 68 می دولت مشترکہ پارلیمانی کانفرنس اٹی بشخ ہلنگ کن بارباڈوس آ سرمس۔ سے شنبے نادے آ سینیٹ سیکرٹریٹ آن جاری بیان نا رداٹ سید یوسف رضاگیلانی برطانیہ ٹی زرس اڈکننگ آن پد دولت مشترکہ پارلیمانی کانفرنس (سی پی سی 68) اٹی بشخ ہلنگ کن بارباڈوس آ سرمسنے۔ کانفرنس اٹی دولت مشترکہ نا باسک ملک آتا پارلیمان تا سروک ، پارلیمان نا باسک و نمائندہ غاک بھلو کچ اسے ٹی شریک ءُ۔ داکانفرنس جمہوری قدر ، کانود نا حکمرانی، شفاف طرزحکمرانی، پارلیمانی کمکاری و السی رابطہ غاتا مون آ دننگ نا بابت اہم جہانی فورم نا حیثیت تخک۔ چیئرمین سینیٹ کانفرنس اٹی چندی ملک آتا پارلیمانی راہشون آتون اہم ہڑتوم آ کنڈآتا اوڑدہی ہم کیک ہرافتے ٹی پارلیمانی کہول آ شریداری، السی رابطہ غاتا مون آ دننگ، ڈیہہ اٹی امن و سوگوی، واپاری کمکاری و چاگڑدی چیلنج کون آ سرحال آتیا گپ وتران کننگک۔ سید یوسف رضاگیلانی  کانفرنس نا اسہ اہم سیشن اسے نا کماشی ءِ ہم کیک۔ داوخت آ او موسمی تغیرات نا اثرات، پاکستان اٹ ساڑی آ پِر و نوکاپ آن ودی مروک آ انسانی و چاگڑدی حالیت و قدرتی آفت آتون مون تننگ کن جہانی کہول آ اسیجائی گام گیج آتا گرج ءِ ہم مون آتخک۔ اودااومیت نا درشانی ءِ کرینے کہ دولت مشترکہ پارلیمانی ایسوسی ایشن (سی پی اے) نا رداٹ مروک آ داکانفرنس باسک ملک آتا نیام اٹ جمہوری ادارہ غاتا سوگوی، کانود نا بالادستی، و السی راجی آسودہی کن پارلیمان کمکاری ءِ پین سوگو کننگ اٹ اہم کڑد ادا کیک۔