وزیراعظم شہباز شریف نا ملائیشیا نا یونیورسٹی ٹی اعزازی ڈگری ہلنگ نا دود آن تران

کوالالمپور۔ 07 اکتوبر (اے پی پی) وزیراعظم محمد شہباز شریف پارینے کہ امت مسلمہ تینا قدر و اسلامی اصول آتیا عمل کرسا اقوام عالم اٹی گوہوک آ ہند ءِ دُوارہ دوئی کننگ کیک، سرکڑدہ ئی امتیاز اس اف بلکن امانت اسے، سرکڑدہ ئی ءِ دیانت ، اخلاص ، عدل و شفاف احتساب اٹ ادا کننگ المی ءِ، است خواہی ءِ کہ پاکستان وملائیشیا نا نیام اٹ علمی کمکاری پین سوگو مرے، ہڑتوم آ ایلم ملک آک ورناآبادی آن شُپ ءُ، ننا زمواری ءِ کہ تینا ورناتے انسانیت نا خذمت کن وارخواہی ایتن۔ داخیال آتا درشانی ءِ او سے شنبے ناد ے آ داڑے ملائیشیا نا انٹرنیشنل اسلامک یونیورسٹی نا کنڈآن پی ایچ ڈی (ڈاکٹریٹ) لیڈرشپ اینڈ گورننس نا اعزازی ڈگری تننگ نا دود آن تران کرساکرے۔ دود اٹی ملائیشیا نا ریاست پہانگ نا ملکہ و جہانی اسلامی یونیورسٹی آف ملائیشیا نا آئینی سروک تنکو عزیزہ امینہ میمونہ سکندریہ، ملائیشیا نا وزیر بڑزکو تعلیم داتوسری راجا ڈاکٹر زیمبری عبدالقادر، ملائیشیا نا وزیر مواصلات داتو احمد فہمی محمد فاضل، ملائیشیا نا جہانی اسلامی یونیورسٹی نا صدر تان سری عبدالرشید حسین و ریکٹر پروفیسر عثمان باقر آن بیدس پاکستانی ڈل انا باسک آک ہم ساڑی ئسر۔ وزیراعظم پارے کہ جہانی اسلامی یونیورسٹی آف ملائیشیا غان ڈاکٹریٹ نا کنڈآن اعزازی ڈگری کنکن شرفمندی نا سوب ءِ ، جہانی اسلامی یونیورسٹی ملائیشیا کون آ عظیم علمی درسگاہ غان لیڈرشپ و گورننس اٹی ڈاکٹریٹ نا اعزازی ڈگری ءِ عاجزی اٹ ہلنگ اٹی اُٹ، جہانی اسلامی یونیورسٹی آف ملائیشیا علم و دانش نا مرکز ءِ، دا عظیم درسگاہ علم، ایمان و اخلاق ءِ یکجا کرسا بڑزکو تعلیم نا مسخت ءِ مون آ دننگ ءِ۔ وزیراعظم پارے کہ او 40 سال آن زیات وخت اسکان تینا عاجزانہ خذمت آتے پنجاب نا الس کن وقف کرے، پنجاب پاکستان نا غٹ آن بھلا صوبہ ءِ۔ ہموڑے بطور السی خذمت گار تینے وقف کرے و داسہ بطور وزیراعظم پاکستان نا الس نا خذمت کن تینا زمواری تے پورو کننگ اٹی اُٹ۔ وزیراعظم پارے کہ او مچ آ ایمانداری و بدل مفروک عزم اتون الس نا خذمت ءِ کننگ نا پبی کوشست کرینے، مدام خلوص نیت و ثابت گامی اٹ الس نا خذمت ءِ کیوہ، اینو عاجزی اتون اللہ سبحان و تعالیٰ نا حضور کاٹم ءِ شیف دااعزاز ءِ دلی تشکر تون قبول کیوہ۔ وزیراعظم پارے کہ کنے واقعی بھاز خوشی ءِ کہ دا ڈگری نا کمک اٹ ای اسہ ہندن ءُ عظیم درسگاہ سے تون وابستہ مننگ اُٹ ہرا مسلم دنیا ٹی بطور مادر علمی غٹ آن زیات شرف نا قابل ءِ، ای اومیت کیوہ کہ کنا داڑے ساڑی گری جہانی اسلامی یونیورسٹی آف ملائیشیا و پاکستان نا پنی آ بڑزکو تعلیمی درسگاہ تا نیام اٹ تعلیمی شریداری و کمکاری ءِ سوگو کیک، مسلم دنیا نا اسہ معزز انگا درسگاہ تون منسلک مننگ کنکن شرفمندی نا سوب ءِ۔ وزیراعظم پارے کہ سرکڑدہ ئی اعزاز اس اف بلکن مقدس ءُ امانت اسے ہرا ایمانداری، خلوص ، انصاف و شفاف احساس جوابدہی اتون بایدے ادا کننگے۔ وزیراعظم پارے کہ تاریخ گواہ ءِ کہ ہراتم کہ مسلمانک دا شاندار اصول آتے سوگوی اٹ ہلکر اونئے بیرہ تینٹ شون ہلکر بلکن مچ آ دنیا کن راہشونی نا ذریعہ ہم جوڑمسر۔ وزیراعظم پارے کہ اینو مسلم امہ ءِ جھیڑہ، نیزگاری و تین پہ تینی بے چیٹ کون آ بے پناہ چیلنج مون تروک ءِ، دا مشکل حالیت آتیٹی ننے تینا دا قدر و اخلاقیات ءِ سوگوی اٹ توننگ نا گرج ءِ ہرافتا ننا دین اسلام تعلیم تسنے تانکہ نن اقوام عالم اٹی تینا گوہوک آ ہند ءِدُوارہ دوئی کننگ کین۔ وزیراعظم پارے کہ است خواہی ءِ کہ پاکستان و ملائیشیا نا نیام اٹ علمی کمکاری سوگو مرے، دا عظیم و ایلم ملک ننا ارٹ میکو اُرا ملائیشیا غانبار پاکستان ءِ ہم اللہ تعالیٰ ورناتیان شپ کرینے ، بطور خذمتگار و راہشون دا ننا زمواری ءِ کہ نن اوفتے سہی پلیٹ فارم اس ایتن تانکہ ہمدردی و زبردست عزم اتون او ڈکھیائی انسانیت نا خذمت ءِ کننگ کیر۔ وزیراعظم پارے کہ ننا عظیم شاعر مشرق و فلسفی ڈاکٹر علامہ اقبال نا لازوال لوز آک یات بریرہ ہرافتا وژن نئے بیرہ پاکستان نا الس بلکن مچ آ دنیا نا مسلمان تا متاثر کن ءِ۔ اونا شئیر ءِ کہ ’’سبق پھر پڑھ صداقت کا عدالت کا شجاعت کا۔۔۔لیاجائے گا تجھ سے کام دنیا کی امامت کا‘‘۔ وزیراعظم پارے کہ کنا دعا ءِ کہ داعظیم جامعہ جہانی اسلامی یونیورسٹی آف ملائیشیا سرسہبی نا مزل آتے تسلسل تون طے کرسا کے، ہڑتوم آ عظیم ملک آک  پاکستان وملائیشیا کن سیوت، ایلمی، شونداری و شونہالی کن گہرا کمکاری کن ہم دعاکیوہ، پاکستان وملائیشیا نا سنگتی مدام برجاسلے، اعزازی ڈگری تننگ آ یونیورسٹی ناصدر، چانسل، ریکٹر ، وزیرتعلیم، فیکلٹی ممبران و طالب علم آتا منت وار اُٹ۔ داوخت آ ملائیشیا نا ریاست پہانگ نا ملکہ و انٹرنیشنل اسلامک یونیورسٹی آف ملائیشیا نا آئینی سروک تنکو عزیزہ امینہ میمونہ سکندریہ پارے کہ وزیراعظم محمد شہباز شریف ءِ سرکڑدہ ئی و طرز حکمرانی ٹی اعزازی (ڈاکٹریٹ) ڈگری تننگ کنکن اعزاز اسے۔ اوچار دہائی تیان زیات وخت اسکان بصیرت، نظم وضبط و رحم دلی اتون الس نا خذمت ءِ کرینے، و پنجاب نا سرکڑدہ ئی آن ہلیس ملک انا وزارت عظمیٰ اسکان پک کرینے کہ اصل سرکڑدہ ئی طاقت آخا بلکن مسخت تون گنڈوک ءِ۔ او پارے کہ وزیراعظم شہباز شریف نا پنجاب ایجوکیشن انڈوومنٹ فنڈ انا قیام کون آ گام گیج آتیان ہزار آ ہندن ءُ طالب علم آتیکن بڑزکو تعلیم نا درگہ غاتے ملنگا ہرا وخت اس کہ یونیورسٹی آ ہِننگ نا سجفنگ ہم کتورہ، دا ہمو سرکڑدہ ءِ ہرا است آتے و آخبت ءِ گچین کیک، اینو نا دور اٹی ہرا تم دنیا ظاہری شان و شوکت ءِ اخلاقیات آ اولیت تننگک نا سرکڑدہ ئی ننے یات ترفک کہ گچین حکمرانی خلوص، خذمت و سوگو کڑد انا پن ءِ۔ اوپارے کہ نبی کریم صلی اللہ علیہ و آلہ وسلم نا فرمان ءِ کہ نمے آن غٹ آن گچین ہمودے ہرا ایلوفتے کن غٹ آن زیات فائدہ مند مرے۔ اوپارے کہ پاکستان اسہ بھلو وخت اسے آن ملائیشیا نا ایلم ملک و آئی آئی یو ایم نا بانی شریدار ءِ و وزیراعظم شہباز شریف نا کماشی ٹی دا رشتہ پین سوگو مسنے، اینو ننا پاکستانی طالب علم، استاد و مسکوہی طالب علم یونیورسٹی ءِ پدریسہ علمی و فکری وڑاٹ شپ کننگ ءُ و مسلم امہ نا خذمت نا ننا اسیجائی مشن نا خذمت کننگ ءُ۔ اوپارے کہ دا اعزازی ڈگری بیرہ اسہ سرسہبی اسے نا اعتراف اف بلکن داڑآن ود ہمو قدر انا جشن ءِ ہرادے نن عزیز تخنہ و ہرا عدل خذمت و راہشونی ءِ۔ اوپارے کہ نن دعاکینہ کہ دا اعزاز ننکن اللہ سبحان و تعالیٰ نا برکت و پارت تون مرے تانکہ ڈغار آ امن و انسانیت اٹی ہم گرنچی قائم مرے۔ داکان مست ملائیشیا نا ریاست پہانگ نا ملکہ و انٹرنیشنل اسلامک یونیورسٹی آف ملائیشیا نا آئینی سروک تنکو عزیزہ امینہ میمونہ سکندریہ وزیراعظم محمد شہباز شریف ءِ پی ایچ ڈی (ڈاکٹریٹ) لیڈرشپ اینڈ گورننس نا اعزازی ڈگری تس۔