زرکاری ٹی آسراتی کن اصلاحات آ چکار ءِ،آئی ٹی ، ٹیک و اے آئی نا بشخ آتیٹی تعلقدار جہانی بزنس گروپس،زرکارآتا خیرمقدم ءِ کینہ، وزیراعظم شہبا  ز شریف نا ملائیشیائی بزنس گروپ نا ڈل اتون گپ وتران

کوالالمپور۔ 07 اکتوبر (اے پی پی) وزیراعظم محمد شہبا ز شریف پارینے کہ پاکستان و ملائیشیا نا نیام اٹ اقتصادی وواپاری بشخ آتیٹی کمکاری ءِ ودفنگ نا بھاز گنجائشت ارے، حکومت پاکستان زرکاری ٹی آسراتی کن اصلاحات آ چکار کرینے، آئی ٹی، ٹیک و اے آئی نا بشخ آتیٹی گیشتر کچ ءِ مون آتخسا تعلقدار جہانی بزنس گروپس و زرکارآتا خیرمقدم ءِ کینہ۔ سے شنبے نادے آ وزیراعظم آفس نا میڈیا ونگ آن جاری بیان نارداٹ او داخیال آتا درشانی ءِ ملائیشیا نا بزنس گروپ گوبی پارٹنرز نا ڈل اتون گپ وتران کرساکرے ہراگوبی پارٹنرز نا کو۔ فاؤنڈر و چیئرتھامس ساؤنا کماشی ٹی اوڑتون اوڑدہی کرے۔ اوڑدہی ٹی نائب وزیراعظم و وزیرخارجہ اسحاق ڈار، بنجائی وزیر واپار جام کمال خان ، بنجائی وزیر قومی غذائی رکھ وپٹ وپول رانا تنویر حسین، بنجائی وزیر حوالکاری و شینکاری عطاء اللہ تارڑ، وزیراعظم نا خصوصی کمکار طارق فاطمی و تعلقدار بڑزکو سرکاری آفیسر آک ہم ساڑی ئسر۔ وزیراعظم پارے کہ پاکستان و ملائیشیا نا نیام اٹ اقتصادی و واپاری بشخ آتیٹی کمکاری ءِ ودفنگ نا بھلو کچ اس ارے ہراڑکن ہڑتوم آ فریق آک پبی کاریم کننگ ءُ، ہڑتوم آملک آتا نیام اٹ بزنس ٹو بزنس رابطہ غاتے ودفنگ نا بابت تدوک  آدے پاکستان ملائیشیا بزنس اینڈ انویسٹمنٹ کانفرنس نا اڈتننگ بھا ز ستاکڑزک۔ وزیراعظم پارے کہ نن کاروبار کن دوستانہ چاگڑد جوڑ کننگ و کاروبار کننگ اٹ آسانی ءِ گچین کننگ کن سنبرینگوک اُن، خصوصی زرکاری آسراتی کونسل پیشن نا زرکارآتے ہروڑنا آسراتی تا فراوانی کن کوشست کننگ ءِ۔ وزیراعظم پارے کہ پاکستان نا اسٹارٹ اپ ایکو سسٹم آ گوبی پارٹنرز نا پت ستاکڑزک، حکومت پاکستان زرکاری  آسراتی و بنداوی پنجر اسکان گچین رسینگ نا کمک اٹ اسٹارٹ اپس و بنائی ریسہ نا زرکارآتا کمک کن مرکوز اصلاحات آ کاریم کننگ ءِ۔ وزیراعظم پارے کہ اسہ پائیدار اسٹارٹ اپ چاگڑدی نظام نا تفنگ کن جہانی وملکی سرمایہ ءِ اتنگ ننا اولیت ءِ، ڈیجیٹل زرگزران خاص وڑاٹ فن ٹیک، ای کامرس و آئی ٹی خذمت ننا قومی شونداری نا حکمت عملی ٹی مرکزی حیثیت تخک۔ وزیراعظم پارے کہ نن پاکستان نا آئی ٹی، ٹیک، و اے آئی نا بشخ آتیٹی گیشتر کچ ءِ مون آتخسا تعلقدار جہانی بزنس گروپس و زرکارآتا خیرمقدم ءِ کینہ۔ اوڑدہی ٹی گوبی پارٹنرز نا ڈل پاکستان اٹی ای۔ کامرس و فنانشل ٹیکنالوجیز نا بشخ آتیٹی شریداری ٹی بھاز است خواہی نا درشانی ءِ کرے۔