پتراجایا۔ 06 اکتوبر (اے پی پی) پاکستان و ملائیشیا تعلیم، حلال سرٹیفکیشن، سیل و سوات و انسداد بدعنوانی تون اوار چندی بشخ آتیٹی ہڑتوم آکنڈآتا کمکاری نا مون آ دننگ کن مفاہمت نا 6 یات داشت آتیا دستخط کریر، دوشنبے نادے آ داچرجوئی ٹی دود ملائیشیا نا وزیراعظم نا دفتر’’پردانا پترا کمپلیکس‘‘ اٹی اڈ ہلک، وزیراعظم محمد شہباز شریف و ملائیشیا نا وزیراعظم انور ابراہیم ڈل آتا کہول آ …
پاکستان وملائیشیا نا نیام اٹ تعلیم، سیل و سوات، انسداد بدعنوانی تون اوار چندی بشخ آتیٹی کمکاری ءِمون آ دننگ کن مفاہمت نا 6 یات داشت آتیا دستخط
گیشتریں ھال
پتراجایا۔ 06 اکتوبر (اے پی پی) پاکستان و ملائیشیا تعلیم، حلال سرٹیفکیشن، سیل و سوات و انسداد بدعنوانی تون اوار چندی بشخ آتیٹی ہڑتوم آکنڈآتا کمکاری نا مون آ دننگ کن مفاہمت نا 6 یات داشت آتیا دستخط کریر، دوشنبے نادے آ داچرجوئی ٹی دود ملائیشیا نا وزیراعظم نا دفتر’’پردانا پترا کمپلیکس‘‘ اٹی اڈ ہلک، وزیراعظم محمد شہباز شریف و ملائیشیا نا وزیراعظم انور ابراہیم ڈل آتا کہول آ مذاکرات آن پد دود اٹی بشخ ہلکر، پاکستان وملائیشیا سفارتکار آتا تربیت نا بشخ آتیٹی کمکاری کن انسٹی ٹیوٹ آف ڈپلومیسی اینڈ فارن ریلیشنز و پاکستان نا فارن سروس اکیڈمی نا نیام اٹ مفاہمتی یات داشت آ دستخط کریر۔ داوخت آ دستاویز آتا تبادلہ پاکستان نا نائب وزیراعظم و وزیرخارجہ اسحاق ڈار و ملائیشیا نا وزیرخارجہ حاجی محمد بن حاجی حسن ئسک کریر۔ ہندا وڑ ہڑتوم آملک آتا حکومت آتا نیام اٹ بڑزکو تعلیم نا بشخ اٹی کمکاری کن مفاہمتی یات داشت آتیا دستخط کننگا۔ بنجائی وزیر نیشنل فوڈ سیکورٹی و ریسرچ رانا تنویرحسین وملائیشیا نا وزیر بڑزکو تعلیم ڈاکٹر زامبری عبدالقادر دستاویز آتا تبادلہ کریر، سیل و سوات نا مون آ دننگ کن ہڑتوم آ ملک آتا نیام اٹ سیل و سوات نا بشخ اٹی کمکاری نا بابت مفاہمتی یات داشت آہم دستخط کننگا۔ ملائیشیا نا وزیر سیل و سوات تیونگ کنگ سنگ و پاکستان نا بنجائی وزیر حوالکاری و شینکاری عطاء اللہ تارڑ دستاویز آتا تبادلہ کریر۔ حلال سرٹیفکیشن نا بشخ اٹی کمکاری نا بابت اسہ پین مفاہمتی یات داشت اسے آ دستخط کننگا۔ دستاویز آتا تبادلہ ملائیشیا نا مذہبی امور نا وزیر ڈاکٹر حاجی محمد نعیم بن حاجی مختار و پاکستان نا وزیر واپار جام کمال خان نا نیام اٹ مس۔ ہڑتوم آملک آک وڈی خوری نا توننگ کن ہم مفاہمتی یات داشت آ دستخط کریر۔ داوخت آ دستاویز آتا تبادلہ ملائیشین اینٹی کرپشن کمیشن نا سروک اعظم بن باقی و قومی احتساب بیورو (نیب) انا ڈپٹی چیئرمین سہیل ناصر نا نیام اٹ مس ۔ مفاہمت نا شش می یات داشت چنکا و نیامی درجہ نا کاروبار نا مون آ دننگ نا بابت ئس ہرانا رداٹ پاکستان نا سمال اینڈ میڈیم انٹرپرائزز ڈویلپمنٹ اتھارٹی (سمیڈا) و ملائیشیا نا سمال اینڈ میڈیم انٹرپرائزز کارپوریشن نا نیا م اٹ کمکاری ءِ ودفنگک۔ داوخت آ دستاویز آتا تبادلہ ایس ایم ای کارپوریشن ملائیشیا نا سی ای او رضال بن داتونائن و وزیراعظم نا خصوصی کمکار سید طارق فاطمی نا نیام اٹ مس۔
