وزیراعظم شہباز شریف نا ملائیشیائی ہم منصب انور ابراہیم تون اوڑدہی

پتراجایا۔ 06 اکتوبر (اے پی پی) پاکستان و ملائیشانا وزیراعظم آک ہڑتوم آ کنڈآتا کمکاری ٹی پدریسہ پیش رفت آ است جمی نا درشانی ءِ کرسا اقتصادی و واپاری تعلقداری تے پین سوگو کننگ و کمکاری ءِ ودفنگ نا پوسکن آ کسر تے پٹنگ کن اواری اٹ کاریم ءِ برجاتخنگ آ امنا کرینو۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف ہرا ملائیشیا نا سرکاری دورہ غاٹی ءِ، دوشنبے نادے آ داڑے ملائیشیا نا وزیراعظم داتوسری انورابراہیم تون اوڑدہی کرے۔ پردانا پتراغا بننگ آ وزیراعظم نا اعزاز اٹی سرکاری بیابخیری دود اس اڈتننگا اوکان پد ہڑتوم آ راہشون تا نیام اٹ اوڑدہی مس، اوکان پد ہڑتوم آ راہشونک ڈل آتا کہول آ اوڑدہی ٹی تینا تینا ڈل انا کماشی ءِ کریر۔ وزیراعظم دورہ ٹی اونا وپاکستانی ڈل انا جم وجوش اٹ بخیر و مہمانداری آ ملائیشیا نا وزیراعظم نا منت واری ءِ ہرفے۔ تینا بے کچ تعمیری و فائدہ ئی اوڑدہی ٹی ہڑتوم آراہشونک اکتوبر 2024اٹی ملائیشیا نا وزیراعظم نا دورہ پاکستان آن پد ہڑتوم آ کنڈآتا کمکاری ٹی پدریسہ پیش رفت آ است جمی نا درشانی ءِ کرسا ہڑتوم آکنڈآتا تعلقداری خاص کر اقتصادی و واپاری تعلقداری تے پین سوگو کننگ تون اوار اوار غٹ پلو آتا گپ وتران کریر۔ ہڑتوم آ راہشونک پاکستان ملائیشیا ہڑتوم آکنڈآتا کمکاری ءِ پین سوگو کننگ نا اسیجائی عزم انا تجدید کریر۔ اوانفارمیشن ٹیکنالوجی و ٹیلی کمیونیکیشن، حلال انڈسٹری، آٹوموٹو، کنیکٹیوٹی، گرین انرجی، الیکٹریکل و الیکٹرانک مینو فیکچرنگ، سیل و سوات، بڑزکو تعلیم، موسمیاتی بدلی و کشت وکشار کون آ بشخ آتیٹی زرکاری و اسیجائی ڈٹ آتون اوار کمکاری نا پوسکن ءُ کسر پٹنگ  کن اواری اٹ کاریم ءِ برجاتخنگ آ ہم امنا کریر۔ فریق آک پاکستان آن ملائیشیاءِ حلال سُو انا برآمد آتا کوٹہ 200 ملین امریکی ڈالر اسکان ودفنگ آ امنا کریر۔ فریق آک پاکستان آن ملائیشیا ءِ برنج نا خاطرخواہ برآمد آتیا است جمی نا درشانی ءِ کریر ہرا تخوک آ کوٹہ غان ہم گدرینگانو۔ ہڑتوم آراہشونک دے ٹک نیامی نا حالیت آتون اوار تین پہ تینی است خواہی نا اہم علاقائی و جہانی پیش رفت آہم گپ وتران کریر۔ ملائیشیا نا وزیراعظم فلسطین جھیڑہ نا ایسر و امن کن پاکستان نا تعمیری کڑد بشمول امریکی صدر ڈونلڈ ٹرمپ انا ساڑی گام انا ستاءِ کرے۔ اواقوام متحدہ و اسلامی کمکار تنظیم تون اوار کثیر الجہتی فورم تیا پاکستان و ملائیشیا نا نیام اٹ کمکاری ءِ ودفنگ نا اہمیت آ ہم زور شاغا۔ وزیراعظم شہباز شریف جموں وکشمیر نا جھیڑہ نا انصاف اٹ ایسری کن پاکستان نا عزم انا درشانی ءِ کرے و جموں وکشمیر نا جھیڑہ نا اقوام متحدہ نا تعلقدار قرارداد آتا رداٹ ایسری کن ملائیشیا نا مخ تفی نا ستاءِ کرے۔ ہڑتوم آ راہشونک پاکستان۔ آسیان تعلقداری ءِ سوگو کننگ آ سجفیر۔ وزیراعظم محمد شہباز شریف ملائیشیا نا وزیراعظم ءِ آسیان نا کماشی ءِ سنبھالنگ آ مبارکبادی ترسا وزیراعظم انور ابراہیم نا آسیان نا پورو ڈائیلاگ پارٹنر مننگ نا بابت پاکستان کن ملائیشیا نا مخ تفی ءِ پک کننگ آ منت واری ءِ ہرفے۔ ہڑتوم آ راہشونک ہڑتوم آملک آتا نیام اٹ ہڑتوم آ کنڈآتا کمکاری ءِ ودفنگ تون اوار اوار اہم جہانی امور آ اسہ ایلو ءِ تینا نقطہ نظرآن معلومدار تخنگ کن کروک آاہم فیصلہ غاتیا خڑکی سلابت ءِ برجاتخنگ آ امنا کریر۔ ہڑتوم آ راہشونک پاکستان و ملائیشیا نا نیام اٹ چندی بشخ آتیٹی مفاہمتی یات داشت آتا ہل و تس انا دود اٹی ہم بشخ ہلکر۔ پاکستان وملائیشیا نا نیام اٹ سفارتکار آتا تربیت، سیل و سوات، حلال سرٹیفکیشن، بڑزکو تعلیم، کرپشن و وڈی خوری ءِ توننگ و چٹفنگ و چنکا و نیامی درجہ نا کاروبار نا مون آدننگ نا بابت مفاہمتی یات داشت آتیا دستخط کننگا۔ داوخت آ ہڑتوم آ وزیراعظم آک وزیراعظم انور ابراہیم نا کتاب ’’سکرپٹ ‘‘ ہراکہ لیڈرشپ نا بابت اونا خیال آتا درشانی ءِ ، نا رونمائی ءِ ہم کریر۔ ملائیشیا نا وزیراعظم نا کنڈآن وزیراعظم محمد شہباز شریف و اونا ڈل انا اعزاز اٹی دے انا اِرغ اسے ہم بست وبند کننگا۔