پاکستان وملائیشیا نا نیام اٹ چندی بشخ آتیٹی کمکاری ءِ مون آ دننگ نا معاہدہ و ایم او یو تیا دستخط، ہڑتوم آ ملک آتا وزیراعظم آتا اسیجائی پریس کانفرنس، وزیراعظم شہباز شریف نا پاکستان آن 20 کروڑ ڈالر نا سُو انا درآمد نا فیصلہ نا خیرمقدم

پتراجایا۔ 06 اکتوبر (اے پی پی) وزیراعظم محمد شہباز شریف ملائیشیا نا وزیراعظم نا کنڈآن پاکستان آن 20 کروڑ ڈالر مالیت نا حلال سُو  انا درآمد نا فیصلہ نا ستاءِ کرسا پارینے کہ انفارمیشن ٹیکنالوجی، مصنوعی ذہانت و اقتصادی شونداری نا ایلو بشخ آتیٹی ملائیشیا نا گیشتر آزموندہ غاتیان فائدہ و اسیجائی ڈٹ آتا بناءِ کننگ نا خواہندار اُن، پاکستان وملائیشیا نا نیام اٹ بڑزکو تعلیم، سیل و سوات، حلال سرٹیفکیشن ، وڈی خوری ءِ توننگ و چنکا و نیامی درجہ نا کاروبار نا شونداری نا بشخ آتیٹی ہڑتوم آ کنڈآتا کمکاری ءِ مون آ دننگ  کن معاہدہ و مفاہمت نا یات داشت آتیا دستخط مسنے وخت اس کہ ملائیشیا نا وزیراعظم انور ابراہیم برصغیر پاک و ہند اٹی امن ءِ ڈیہہ اکن بے کچ اہمیت تخوک گوندسا پارے کہ انسداد دہشت گردی کن اسیجائی کوشست کننگک، فلسطین و غزہ نا باندات آ پاکستان نا موقف نا ستاءِ کینہ، ننا اسیجائی موقف پائیدار امن نا دوئی کننگ اٹ کمکار جوڑمریک۔ دوشنبے نادے آ داڑے پاکستان وملائیشیا نا نیام اٹ چندی بشخ آتیٹی ہڑتوم آ کنڈآتا کمکاری نا معاہدہ و مفاہمت نا یات داشت آتیا دستخط آتیان پد تینا ملائیشیائی ہم منصب انور ابراہیم تون اسیجائی پریس کانفرنس آن تران کرسا وزیراعظم محمد شہباز شریف ملائیشیا ءِ تینا ارٹ میکو اُرا گوندساپارے کہ او پاکستان نا الس و تینا ڈل انا باسک آتا کنڈآن ایلم ملک ملائیشیا ٹی والہانہ بیابخیری آ وزیراعظم نا منت واری ءِ ہرفک۔ اوپارے کہ ملائیشیا نادا کنا اولیکو دورہ ءِ ولے ہندن لگنگ ءِ کہ ای بے کچ برادرانہ و شناسا دروشم آتون ملنگ اٹی اُٹ و نن سال آتیان اسہ ایلو ءِ چانہ، داڑآن اخلاص و سچاسنگتی نا عکاسی مریک۔ وزیراعظم ملائیشیا نا وزیراعظم انور ابراہیم ءِ مخاطب کرسا پارے کہ نے ٹی چندی خوبیک ءُ ، نا مدنی وژن ناقائدانہ لائخی تا درشانی ءِ، نی تینا مچ آ سیاسی کیریئر اٹی بے پناہ حوصلہ و صبر و ہمت نا درشانی ءِ کرینس، ملائیشیا نا بصیرت افروز کماشی ٹی ڈیہہ و دنیا ٹی بے مٹ شون ہلنگ ءِ، ملائیشیا ءِ شون ہلوک ملک اس جوڑ کننگ اٹ انور ابراہیم نا اہم ءُ کڑ داسے۔ وزیراعظم پارے کہ ننا بے کچ تعمیری و فائدہ ئی گپ وتران مس و نن ہڑتوم آ کنڈآتا تعلقداری و جہانی امور تیا گپ وتران کرینن و کنے داہیت آ خوشی ءِ کہ غٹ اہم باندات آتیا ننا خیالات آک اسہ وڑ ءُ۔ وزیراعظم پارے کہ ملائیشیا نا وزیراعظم نا پاکستان نا تدوک آ سال انا دورہ ہڑتو م آکنڈآتا تعلقداری تے سوگو کننگ نا بابت اسہ یات گار ءُ دورہ اس ئس و داڑآن پاکستان نا الس کن اوفتا است اٹی مروک آ مہرومریبت و خلوص نا جوزہ غاتا عکاسی مس۔ ملائیشیا نا وزیراعظم ءِ مخاطب کرسا وزیراعظم پارے کہ پاکستان کن نی اجنبی اس افیس، نی ہموڑے بھلو وخت اس گدریفیس، تینا تعلیم ءِ دوئی کریس، کراچی، لاہور شالیمار باغ ءِ نی جوان چاسہ و نا اردو ہم بھاز جوان ءِ ۔ وزیراعظم پارے کہ کنے خوشی ءِ کہ نی دا وژن نا درشانی ءِ کرینس کہ نن امر تین پہ تینی اقتصادی و واپاری رابطہ غاتے مون آ دننگ کینہ و اسیجائی ڈٹ آتے مون آ دننگ کینہ، و اسیجائی ڈٹ آتے مون  آدننگ کیرہ و ہراوڑ ملائیشیا نا زرکارآتا کنڈآن پاکستان اٹ زرکاری و پاکستان نا زرکارآتا کنڈآن ملائیشیا ٹی زرکاری ءِ ودفنگ کیرہ۔ وزیراعظم پارے کہ نن آئی ٹی، مصنوعی ذہانت، و اقتصادی شونداری تون اوار چندی بشخ آتیٹی ملائیشیا نا گیشتر آزموندہ غاتیان فائدہ ہرفنگ نا خواہندار اُن ہرافتے ٹی ملائیشیا شاندار کارکڑد نا درشانی ءِ کرینے۔ وزیراعظم پارے کہ ملائیشیا نا جی ڈی پی است جم وڑاٹ ودنگ ءِ، اونا جہانی واپار و برآمد آتیٹی ودکی مننگ ءِ، داہمو بشخ آک ءُ ہرافتے ٹی پاکستان ملائیشیا نا ازموندہ غاتیان فائدہ ہرفنگ خواہک۔ وزیراعظم پارے کہ پاکستان تین پہ تینی وڑاٹ اسیجائی ڈٹ آتا بناءِ کننگ نا ہم خواہندار ءِ ہراڑے ملائیشیا وپاکستان نا چاہندار آک اواری اٹ کاریم کیر، اسہ ایلو تون کمک کیر و دا چرجوئی ٹی کشت وکشار، آئی ٹی، فنی و کسبی تربیت کون آ بشخ آک اہم ءُ، فنی تربیت نا بشخ اٹی پاکستان اٹ شاندار کاریم مننگ ءِ، ہزار آپاکستانی طالب علم آک ملائیشیا ٹی قومی تعمیر اٹی پبی زمواری تے پورو کننگ ءُ، ملائیشیا ٹی کم و ود اسہ لکھ 50 ہزار پاکستانی کاریم کننگ ءُ، داڑآن ننے بھاز حوصلہ و اومیت ملک کہ نن داڑآن فائدہ ہرفسا و اواری اٹ تینا زرگزران تے سوگو کننگ کینہ ہرافتیان ہڑتوم آملک آتے بریبرفائدہ دوئی مریک۔ وزیراعظم پارے کہ ملائیشیا نا وزیراعظم پاکستان آن سُو انا درآمد کن 20 کروڑ ڈالر نا کوٹہ نا پڑو کرینے داڑآ اونا منت واری ءِ ہرفنہ و ملائیشیا نا درآمد کنندگان و کمامدارآتیا پیدوار کینہ کہ ملائیشیا کن سُو انا برآمد نا کوٹہ ءِ مارکیٹ پرائس میکنزم و ملائیشیا نا کسٹم اتھارٹیز، ملائیشیا نا فوڈ اتھارٹیز و ملائیشیا نا صارف آتیکن درکار حلال سرٹیفکیشن نا رداٹ ریگولیٹ کننگک، ای نمے باوری و ضمانت ایتیوہ کہ نما غٹ شڑت وخواست آتے پورو کننگک و انشاء اللہ وخت اتون اوار اوار دا کوٹہ ٹی پین ودکی مریک۔ وزیراعظم شہباز شریف ملائیشیا نا وزیراعظم نا کتاب ’’سکرپٹ‘‘ نا ستاءِ کرسا پارے کہ نن وزیراعظم انور ابراہیم نا کتاب ’’سکرپٹ‘‘ نا رونمائی ءِ کرینن، دا کتاب کوالالمپور، اسلام آباد، لاہور، کراچی، پشاور و کوئٹہ نا نیام اٹ پول انا کڑد ءِ ادا کیک، ’’سکرپٹ‘‘ اونا مدنی وژن نا راہشون فریم ورک ءِ، داپائیداریت، تین پہ تینی شرف، جدیدیت، پٹ وپول و شونداری، شونہالی و تین پہ تینی پت انا وژن ءِ دا ساڑی آ و بروک آ چین تیکن فائدہ مند مریک۔ وزیراعظم پارے کہ تدوک آ سال علامہ اقبال نا شاعری شکوہ، جواب شکدہ، اسرار خودی و اسلام نا تعلیمات آتے پوسکن آ دور انا خواست آتا رداٹ سمجھنگ نا بابت مواد نا ملائیشیا ٹی ترجمہ و اودے  شیئرکننگانے ہراڑآن ہڑتوم آ ملک آتا نیام اٹ فکری تبادلہ غاتا پوسکن ءُ کسر ملانے۔ وزیراعظم ملائیشیائی ہم منصب نا خواست آ علامہ اقبال نا دا شئیر آتے ہم خوانا۔۔۔۔۔’’خودی کو کر بلند اتناکہ ہر تقدیر سے پہلے۔۔۔۔خدابندے سے خودپوچھے بتاتیری رضاکیاہے‘‘۔ وزیراعظم پارے کہ قومک معجزہ غاتیٹی آخا سخت خواری و بدل مفروک عزم اٹ جوڑ مریرہ۔ وزیراعظم پارے کہ پگہ ہراتم او دا عظیم ملک ، تینا اِرٹ میکو اُرا ، غان اسلام آباد آ روانہ مریک تو مہالو آن زیات است جم و متاثر مریک و عظیم قوم و عظیم سرکڑدہ غاتیان دا سبخ ءِ ہلسا دیک کہ ننے پاکستان ءِ ملائیشیا آنبار شون ہلوک جوڑ کننگ ناءِ۔اوپارے کہ 24 کروڑ الس آ تالان ننا قوم اسہ عظیم ءُ قوم اسے و ننا آبادی نا اسہ بھلو بشخ اس ورناتیا تالان ءِ ہرافتا وئی 15 سال آن 30 سال انا نیام اٹی ءِ، الحمداللہ او بھاز ذہین ولائخ ءُ ، نن اوفتے پبی وارخواہی تننگ اُن تانکہ او چندی بشخ آتیٹی پوسکن تعلیم و ٹیکنالوجی آن فائدہ ہرفنگ کیر، داٹی کنے ہچ ءُ شبہ اس اف کہ او پاکستان نا عظیم جوڑ کروک جوڑ مریرہ۔ وزیراعظم پارے کہ ملائیشیا و پاکستان نا کاروباری شخصیت آتا ہم اوڑدہی مننگ ءِ ، کنا دعاءِ کہ عظیم ملک ملائیشیا ہندا وڑ شونہال و شون ہلسا کے، پاکستان ملائیشیا نا شریداری تون شونداری و شونہالی نا سفر ءِ طے کیک۔ اوپارے کہ پاکستان ءِ اللہ تعالیٰ بے پناہ معدنی و قدرتی وسیلہ، دِیر، سمندر ، مش، زرخیز ڈغار کون آنعمت آتیان مالامال کرینے و نن مون آ ہِننگ نا عزم تخنہ۔ ملائیشیا نا وزیراعظم انور ابراہیم پاکستان آن حلال سُو انا درآمد کن 20 کروڑ ڈالر نا کوٹہ جتا کننگ نا پڑو کرسا پارے کہ ہڑتوم آ ملک آتا نیام اٹ دفاع، توانائی، گرین ٹیکنالوجی و ایلو بشخ آتیٹی ہڑتوم آ کنڈآتا کمکاری ءِ مون آ دننگ نا خواہندار ءِ، پاکستان نا پروفیشنلز و ورکرآتا خذمت آتا ستاءِ کینہ، پاکستانی طالب علم آک ننا یونیورسٹی تیٹی تعلیم کننگ ءُ، پاکستان آن برنج و سُو انا برآمد آتیٹی نن آسراتی فراوان کینہ و داڑکن انتس کہ المی مس کننگک۔ اوپارے کہ شہباز شریف کنا ایلم ءِ پاکستان اٹی بھاز کچ ارے، نن ہڑتوم آ کنڈآتا کمکاری ءِ مون آ دننگ کینہ۔ اوبرصغیر پاک و ہند اٹی امن نا قیام ءِ ڈیہہ اکن بھاز اہمیت تخوک گوندسا پارے کہ انسداد دہشت گردی کن اسیجائی کوشست کننگک، فلسطین و غزہ نا باندات آ پاکستان نا موقف نا ستاءِ کینہ، ہڑتوم آ ملک آتا اسیجائی موقف ءِ کہ دا ویل ایسر مرے و دابابت ننتون پبی سلاہ ارے، صدر ڈونلڈ ٹرمپ نا 20 ٹکی گام ءِ امن کن فائدہ ئی تکنہ، دا بابت دُن تو ملائیشیا نا گڑاس گڑتیک اریر ولے خاص کر غزہ غا اسرائیلی بمباری نا چٹفنگ و مرک آتے تورفنگ نا باندات آ عرب، اسلامی و مچ آ دنیا نا ملک آتا موقف بالکل پیدوار ءِ، انشاء اللہ امن نا مسخت دوئی مریک۔ اوپارے کہ غزہ ٹی انسانی ہمدردی نا بنداو آ رسینگ المی ءِ انتئے کہ زالبول و چناتے بمباری مون تروک ءِ، 2025ء ٹی دانا تصورءِ ہم کننگ مفک، دا بالکل حماقت ءِ۔ اوپارے کہ دا امن گام اکن ننا اسیجائی موقف پائیدار امن نا دوئی کننگ اٹ کمکار مریک ۔ پاکستان و ملائیشیا نا نیام اٹ بڑزکو تعلیم نا بشخ اٹی کمکاری کن ملائیشیا نا بڑزکو تعلیم نا وزیر وپاکستان نا فوڈ سیکورٹی و ریسرچ نا وزیر رانا تنویرحسین مفاہمت نا یات داشت آ تبادلہ کریر، سیل و سوات نا بشخ اٹی کمکاری نا مون آ دننگ کن ملائیشیانا سیل و سوات و دودوربیدہ نا وزیر و پاکستان نا بنجائی وزیر حوالکاری و شینکاری عطاء اللہ تارڑ مفاہمت نا یات داشت آ تبادلہ کریر، حلال سرٹیفکیشن اٹی کمکاری کن ملائیشیا نا مذہبی امور نا وزیر و پاکستان نا وزیر واپار جام کمال خان مفاہمت نا یات داشت آ تبادلہ کریر، وڈی خوری نا چٹفنگ اٹ کمکاری کن ملائیشیا نا اینٹی کرپشن کمیشن نا چیف کمشنر و ڈپٹی چیئرمین نیب مفاہمت نا یات داشت آ تبادلہ کرریر۔ سی ای او ، ایس ایم ای کاپ ملائیشیا و وزیراعظم نا خصوصی کمکار طارق فاطمی ایس ایم ای کاپ ملائیشیا و سمال اینڈ میڈیم انٹرپرائزز ڈیولپمنٹ اتھارٹی آف پاکستان نا نیام اٹ کمکاری کن مفاہمت نا یات داشت آ تبادلہ کریر ، سفارتکار آتا تربیت نا بابت نوٹس نا تبادلہ ہم کننگا۔ داکان مست وزیراعظم محمد شہباز شریف ملائیشیا نا وزیراعظم انور ابراہیم نا کتاب ’’سکرپٹ‘‘ نا اردو ترجمہ نا دود رونمائی ٹی بشخ ہلک و کتاب نا رونمائی ءِ کرے۔