اقوام متحدہ۔ 22 ستمبر (اے پی پی) اقوام متحدہ نا جنرل اسمبلی آن تران کرسا وزیراعظم شاہد خاقان عباسی پارے کہ دے ٹک و دیکی نا نیام اٹ ساڑی آ تناﺅ یورپ ئِ اسہ پین سرد جنگ اسے ٹی بِٹنگ کیک وخت اس کہ ایشیاٹی امن و شونہالی ئِ سویلی دے ٹکی و دیکی ایشیاٹی ودوک آ بے چیٹی وشون ہلوک آ جہانی واک آتا مزاحمت آن خلیس ئِ۔ وزیراعظم شاہد خاقان عباسی پارے کہ شام، عراق ، یمن تون اوار دے ٹک نیامی ٹی ہرجاگہ غا جنگ و بیداد ئِ۔ اوپارے کہ دُن تو عراق و شام اٹی داعش نزور مسنے ولے دے ٹک نیامی ، افریقہ و دنیا نا ایلو بشخ آتیٹی دہشت گردانہ بیداد تالان مسنے۔ اوپارے کہ فلسطین نا المیہ نا ایسری مرسا نظر بفننگ ئِ۔ اسرائیل نا غیر کانودی تسلط و غیر کانودی بستی تیٹی ودیکی آن مقدس گل زمین آ بیدادی تالان مرسا نظر بننگ ئِ۔ اوپارے کہ نسل پرستی و مذہبی خار، اسلامو فوبیا و زینو فوبیا ٹی اوارسوار مسنے و دنیا نا چندی قوم و الس نا نیام اٹ دیوال ئُ نفسیاتی اڑاند سلفنگ انگ ئِ۔ وزیراعظم پارے کہ روہنگیا نا مسلمان تا نسل کشی نئے بیرہ انسانیت نا غٹ بنداوی اقدار تون متصادم ئِ بلکن ننا اجتماعی ضمیر اکن ہم چیلنج اسے۔
