اقوام متحدہ۔ 21ستمبر (اے پی پی) وزیراعظم شاہد خاقان عباسی پنچ شنبے نا دے داڑے اقوام متحدہ ٹی خذمت سرانجام تروک آپاکستانی تتون اوڑدہی کرے و دنیا ٹی امن و سلامتی کن اقوام متحدہ نا مسخت آتے مون آ دننگ اٹی اوفتا کڑد و کاریم آ اوفتا منت واری ئِ ادا کرے۔ وزیراعظم شاہد خاقان عباسی ہرا اقوام متحدہ نا 72می جنرل اسمبلی دیوان اٹی شرکت کن نیویارک اٹی ئِ۔ اقوام متحدہ نا پاکستانی نژاد کمامدارآتون اوڑدہی کروک آ اولیکو وزیراعظم ئِ۔ وزیراعظم شاہد خاقان عباسی اوفتے پاکستان نا اقتصادی شونداری ، ملک اٹی سلامتی نا گچین مروک حالیت و جمہوریت نا سوگوی آن معلومدار کرے۔ اواقوام متحدہ ٹی خذمت سرانجام تروک آپاکستانی نژاد کمامدارآتا کنڈآن ہریفوک آ کیہی سوج آتا ورندی تے تس۔ اووزیراعظم نا کنڈآن اوڑدہی نا وخت تننگ آ اونا منت واری ئِ ادا کریر۔ اودااوڑدہی نا اہتمام آ اقوام متحدہ ٹی پاکستانی سفیر ملیحہ لودھی نا منت واری ئِ ادا کرے۔ وزیراعظم شاہد خاقان عباسی اوفتے پارے کہ پاکستان دنیا نا غٹ آن بھلا انسداد دہشت گردی آپریشن کرے و دہشت گرد آتے اوفتا ہند جاٹ آتیان چٹفنگ کن سد آ ، ہزار آ فوجیک بشخ ہلکر۔ وزیر خارجہ خواجہ محمد آصف ہم داوخت آ ساڑی ئس و او ہم خارجہ پالیسی نا اہم انگا معاملہ غاتیا اوفتے آگاہی فراوان کرے۔

متعلقہ مضامینمصنف کی طرف سے مزید