اسلام آباد۔ 26 مئی (اے پی پی) وزیراعظم محمد شہباز شریف ساڑی آ پاک بھارت جنگ اٹی ایران نا کنڈآن پاکستان نا مخ تفی و بے چیٹی ٹی کمتی کن کوشست آتیا منت واری ءِ ہرفسا پارینے کہ فلسطین و کشمیر نا ویل آتا انصاف اٹ ایسری آن بیدس ڈیہہ اٹی امن مننگ کپک، پاکستان وایران نا نیام اٹ سوگو اقتصادی تعلقداری مچ آڈیہہ اکن فائدہ مند مننگ کیک، نن بروک آ منہ سال آتیٹی اسیجائی واپار نا کچ ءِ 10 بلین ڈالر اسکان ودفنگ نا خواہندار اُن۔ ایران نا خبررساں ادارہ ’’ارنا‘‘ ءِ خصوصی انٹرویو ٹی اوعلاقائی امن کن تہران نا سفارتکاری نا ستاءِ کرسا پارے کہ ہڑتوم آملک آتا اقتصادی شونداری اسہ ایلو تون وابستہ ءِ و ننا نیام اٹ سوگو تعلقداری مچ آ ڈیہہ اکن فائدہ مند ءِ۔ یات سلے کہ وزیراعظم پاکستان ایرانی صدر ڈاکٹر مسعود پزشکیان نا سرکاری سلہ غا تہران نا سرکاری دورہ غاٹی ءِ، شہباز شریف نا تدوک آ اسہ سال اٹی ایران نا دا ارٹ میکو دورہ ءِ۔ وزیراعظم پارے کہ ایرانی صدر مسعود پزشکیان نا سلہ غا او اسہ وار ولدا ایران نا دورہ ءِ کننگ ءِ۔ اوپارے کہ کنا ایرانی صدر تون کیہی وار اوڑدہی مس، داکان بیدس چندی وار ٹیل فون آ ہم گپ وتران کرینن۔ تہران نا دورہ نا بنداوی مسخت ساڑی آ پاک بھارت تنازعہ ٹی ایران نا کنڈآن بے چیٹی ءِ کم کننگ نا کوشست آتیکن ایران نا منتواری ءِ ہرفنگ ءِ۔ وزیراعظم ایرانی وزیرخارجہ سید عباس عراقچی نا سفارتی قابلیت نا ستاءِ کرساپارے کہ او امن کن ایرانی کمامدارآتا مخ تفی و ثالثی نا پیش کش نا منت واری ءِ ہرفک ہرادے نن امنا کرین ولے بھارت مسترد کرے۔ وزیراعظم پارے کہ او دادورہ ٹی ہڑتوم آ کنڈآتا تعلقداری و اسیجائی است خواہی نا امور تیاہم سرجمی اٹ گپ وتران کیک۔ اواسلام آباد اٹی ایرانی وزیرخارجہ سید عباس عراقچی تون تینا اِرا اوڑدہی نا حوالہ ءِ ترساپارے کہ سید عباس عراقچی نا سفارتی مہارت کنے بھاز زہمی کرینے، ایرانی وزیرخارجہ بھلا چیلنج آتون مون تننگ اٹ تینا مدبرانہ لائخی و پامداری نا درشانی ءِ کرے۔ شہباز شریف پارے کہ پاکستان غزہ ٹی جارحیت اٹی ودی مروک آ حالیت آتیٹی ایران نا موقف نا مخ تفی ءِ کیک۔ اوپارے کہ اسلام آباد و تہران امت مسلمہ و علاقائی کمکاری نا بابت باندات آتیا اسہ ایلو نا مخ تفی ءِ برجاتخرہ۔ ایران ہڑتوم آ کنڈآتا کمکاری نا بابت ایرانی صدر ابراہیم رئیسی نا اسلام آباد دورہ نا حوالہ ءِ ترسا وزیراعظم پارے کہ ایماندار ایرانی صدر سید ابراہیم رئیسی تون اونا جہاز شکست اٹی است ہسون شہیدی آن مست کنا جوان ءُ اوڑدہی اس مس، جان لیواشکست آن مست اوپاکستان نا دورہ ءِ کریسس، ایماندار رئیسی بھاز متاثرکن، بابصیرت و دوراندیش انسان ئس، کنااوڑتون دوستانہ گپ وتران مس و نن ہڑتوم آک فیصلہ کرین کہ پاک ایران تعلقداری ءِ بڑزکو کہول آ دینہ و اسہ ایلو نا بنداو تے ودفنہ۔ وزیراعظم پارے کہ ننے بھاز خوشی ءِ کہ اینو ننا تعلقداری بھاز زیات سوگو و محکم ءِ ۔ پاکستان و ایران نا زرگزرانی تقدیر گنڈوک ءُ ، ہڑتوم آملک آتا نیام اٹ 900 کلومیٹرآن زیات اسیجائی سیم ءِ و ہڑتوم آملک آتا نیام اٹ سوگو اقتصادی تعلقداری خاص کر سیمی علاقہ(صوبہ بلوچستان و سیستان و بلوچستان) نا نیام اٹ کمکاری مچ آ ڈیہہ اکن فائدہ مند پک مننگ کیک۔ اوپاک ایران اقتصادی ڈٹ آتے مون آ دننگ نا بابت کمکاری نا چندی ایم اویوز تیا دستخط نا حوالہ ءِ ترساپارے کہ داکان بیدس نن دہشت گردی نا برخلاف ہڑتوم آملک آتا نیام اٹ خڑکی کمکاری ءِ ہم اہم تکنہ و ننے یقین ءِ کہ دا گپ وتران ہڑتوم آ ہمسایہ ملک آتا نیام اٹ پائیدار اقتصادی تعلقداری نا کسر آوار کیک۔ وزیراعظم ایران تون پائیدار و مریس مدی اقتصادی کمکاری نا گرج آ زور شاغساپارے کہ ننا اسیجائی واپار کم و ود 3 بلین ڈالر ءِ ہراٹی تدوک آ مسہ چار سال آتیٹی نمان ودکی مسنے۔ اوپارے کہ نن بروک آ منہ سال آتیٹی اسیجائی واپار نا کچ ءِ 10 بلین ڈالر اسکان ودفنگ خوانہ حالانہ نن سمجھنہ کہ پاک ایران واپاری لائخی داڑآن کیہی زیات ءِ۔ اسلام آباد و تہران نا نیام اٹ آجوواپار نا معاہدہ غا دستخط کن مروک آ مذاکرات نا ذکر ءِ کرسا شہباز شریف اومیت ظاہرکرے کہ بروک آ 10سال آتیٹی ہڑتوم آملک آتا نیام اٹ واپارنا کچ نمان وڑاٹ ودک۔ وزیراعظم ایران ۔ امریکہ۔ بالواسطہ جوہری مذاکرات نا بابت پارے کہ ہر ویل انا گچین ایسر مذاکرات و سفارتکاری ہی ءِ انتئے کہ ہندانا کمک اٹ نن ہروڑنا تصادم و جنگ ءِ توننگ کینہ۔ اوپارے کہ ڈیہہ اٹی امن و ایمنی، شونداری و سلامتی ءِ مون آ دننگ المی ءِ، پاکستان ڈیہہ اٹی امن و سوگوی نا خواہندار ءِ و ننے ایرانی سیاست دان تا لائخی تیا پورو پت ءِ کہ و اومیت ءِ کہ دا مذاکرات آن جوان ءُ نتیجہ اس دوئی مریک۔ وزیراعظم فلسطین نا ویل و کشمیر نا ویل انا انصاف اٹ ایسری نا گرج آ زور شاغسا پارے کہ فلسطین وکشمیر نا ویل آتا انصاف اٹ و پورو وڑاٹ ایسری آن بیدس ڈیہہ اٹی امن قائم مننگ کپک، فلسطین نا ویل و کشمیر الس نا است خواہی تا رداٹ ایسر مننگ بھاز المی ءِ۔ وزیراعظم ایران نا کنڈآن پاک۔ بھارت جنگ اٹی ثالثی نا پیش کش آ منت واری ءِ ہرفسا پارے کہ دا ڈیہہ اٹی امن وایمنی و سوگوی ءِ مون آ دننگ اٹ ایران نا خلوص، پامداری و دوراندیشی نا درشانی ءِ۔ اوپارے کہ نن سویلی ایشیاٹی تناؤ ءِ کم کننگ نا کوشست آتیکن ایران نا صدر مسعود پژشکیان و وزیرخارجہ سید عباس عراقچی نا ہم منت واری ءِ ہرفنہ۔
