کراچی ۔22مئی (اے پی پی): ماہرین ءَ وت جوڑیشتی ھیل کاری ءِ بیم ءِ بابت ءَ وتی حیال درشان کنان ءَ گشتگ کہ اے درگت ءَ قانون سازی مئے ملک ءُ قوم ءِ ھاتر ءَ سیت مند انت پرچا کہ نوکیں دور ءَ اے یک ھاسیں لوٹ انت۔ دکتر امتیاز حسین، معاون پروفیسر شعبہ وت جوڑیشتی ھیل کاری و ریاضی علوم، جلسہ ءِ رہشونی ءَ کتگ۔ ایشی ءَ پد ایس ایم آئی یو ءِ وائس چانسلر ڈاکٹر مجیب سہرائی ءَ مہمان آناں شیلڈ دات انت۔ اے آئی ءِ ماہرین ءَ گشتگ کہ اے آئی ءِ بابت ءَ مئے کرا قانون بہ بنت پرچا کہ اے ردیں زانتکاری ءُ جعلی ویڈیوز ءِ وسیلگ ءَ ھاسیں رنگ ءَ زھگ ءُ جنین آدماں چیلنج ءُ خطرہ آرگ ءَ انت۔ آئی ءَ اے ھیالانی درشانی پنچ شمبے ءِ روچ ءَ سندھ مدرست اسلام یونیورسٹی ءِ نیمگ ءَ برجم داشتگیں چارمی میاں اوستمانی کانفرنس ءِ دومی ءُ گڈی روچ ءَ ’’جنریٹیو اے آئی ءِ آیوکیں وھد: موہ، ھترہ ءُ چاگردی اثرات‘‘ ءِ سرھال ءِ سر ءَ پینل ڈسکشن ءِ تہ ءَ تران کنان ءَ کت۔ حکومت سندھ انفارمیشن سائنس اینڈ ٹیکنالوجی ءِ محکمہ ءِ ڈائریکٹر جنرل ڈاکٹر رانا شہزاد قیصر ءَ گوشت کہ سندھ حکومت اے آئی پالیشی ءِ سر ءَ کار کنگ ءَ اِنت، چیا کہ مردم آناں راستیں ءُ دروگیں زانتکاری آنی بابت ءَ رھشونی کنگ ءِ ضلورت اِنت، اے آئی ءِ وسیلگ ءَ جعلی زانتکاری مزنیں کچے ءَ شنگ کنگ بوھگ ءَ اِنت۔ آئی ءَ گوشت کہ گوستگیں بھارتی زوراکی ءِ وھد ءَ ما بھارت ءِ نیمگ ءَ چہ جعلی ھال ھم دیستگ اَنت۔ ڈاکٹر رانا شہزاد ءَ وتی ھیالانی درشانی کنان ءَ گوشت کہ اے آئی ءِ سبب ءَ سرکاری پڑ ءَ نوکری کم بوھگ ءَ انت پمیشکا نودربر انچیں منصوبگ جوڑ بہ کن انت کہ ایشاں پروڈکٹ ءِ تہ ءَ بدل کنگ بہ بیت۔ آئی ءَ اے ھم گوشت کہ مئے زالبول آنی واستہ اے آئی ءِ بابت ءَ زانگ المی اِنت۔ پرو اے آئی گلوبل ءِ بانی ءُ سی ای او عمارہ آفتاب ءَ گشتگ کہ اے آئی نوکیں چیزے نہ انت بلے اے 1956 ءَ دیم ءَ اتکگ انوگیں اے آئی سپر آرٹیفیشل انٹیلی جنس انت پمیشکا زھگاں ابید مات ءُ پت ھم اے آئی ءُ ایشی ءِ سافٹ ویئر ءَ سرپد بہ بنت پرچا کہ آ وتی زھگاں ردیں ھال ءُ اھوال ءُ جعلی ویڈیوانی وسیلگ ءَ رہشونی کت کن انت۔ آئی ءَ گیش گوشت کہ انوگیں وھد ءَ لاہور ءَ یک جنک ءِ جعلی ویڈیو ءِ سبب ءَ ٹراماتیز بوتگ، ھمے ھاتر ءَ مارا وتی زھگاں اے وڑیں جاوراں چہ رکھینگ لوٹ ایت۔ آئی ءَ لھتیں ماہرین ءِ حوالہ ءَ گوشت کہ لھتیں مردمانی گمان اِنت کہ اے آئی ءَ را سست کنگی اِنت اگاں نہ اے مئے سر ءَ راجداری کنت۔
