اسلام آباد۔22مئی (اے پی پی): پٹرولیم ءِ وفاقی وزیر علی پرویز ملک ءَ آذربائیجان ءِ سفیر خضر فرہادوف ءَ گوں گند ءُ نند کتگ ایشی ءِ تہ ءَ دو نیمگی سیادی ءَ را گیش مھکم کنگ ءِ راہ ءُ درانی سر ءَ گپ ءُ تران کتگ ھاسیں رنگ ءَ توانائی ءِ شوبگ ءَ کمک ءِ دیمروئی ءُ اقتصادی شریکداری ءِ نوکیں امکانات آنی سر ءَ گپ ءُ تران کتگ۔ پٹرولیم ڈویژن ءِ جارکش ءِ نیمگ ءَ چہ جاڑی بوتگیں بیان ءِ رد ءَ علی پرویز ملک ءَ بھارت ءِ گوما گوستگیں جیڈھ آنی وھد ءَ پاکستان ءِ واستہ مھکمیں کمک ءِ سر ءَ آذربائیجان ءِ منت گپتگ ءُ دوئیں ملک آنی نیام ءَ گہتریں براتی سیادی آناں ساڑاتگ۔ آئی ءَ گوشت کہ مزن وزیر محمد شہباز شریف آذربائیجان ءِ گوما یکوئی ءَ را سک باز ارزشت دنت، آذربائیجان مدام پاکستان ءِ گوما اوشتاتگ، مشکلیں جاور آنی تہ ءَ براتیں ملک آنی کمک ءِ واستہ پاکستان منت وار انت۔ آئی ءَ تیل ءُ گیس ءِ شوھازگ، توانائی ءِ سوداگری ءُ سرمایہ کاری ءِ پڑ ءَ کمک ءَ را گیش کنگ ءِ لوٹ کتگ۔ پٹرولیم ءِ وزیر ءَ گوشت کہ آیوکیں باکو انرجی ہفتگ ءَ پاکستان ءِ نمائندگی کنت ایشی ءِ تہ ءَ پائیدار توانائی ءَ را دیمروئی دیگ ءِ واستہ جھان ءِ سروک آنی گوما شریکداری ءِ ھوالگ ءَ گپ ءُ تران کنگ بیت۔ علی پرویز ملک ءَ گوشت کہ آذربائیجان ءِ سرکاری کمپنی سوکار اپ اسٹریم تیل ءُ گیس ءِ شوھازگ ءِ پڑ ءَ پاکستانی واکدار آنی گوما ممکنہ کمک ءِ سر ءَ گپ ءُ تران کنگ ءَ اِنت کہ ایشی ءَ چہ دوئیں ملک آنی واستہ نوکیں موہ آنی راہ پچ بیت۔ فرہادوف ءَ اقتصادی ءُ توان ءِ شوبگ آنی تہ ءَ پاکستان ءِ گوما کمک ءَ را گیش مھکم کنگ ءِ واستہ وتی گہتریں عزم ءِ سر ءَ زور پر دات ءُ توان ءِ رابطہ ءُ دیمروئی ءِ یکجائی وژن ءِ سر ءَ زور پر دات۔ آئی ءَ گوشت کہ آذربائیجان اقتصادی کمک ھاسیں رنگ ءَ توان ءِ شوبگ ءَ شریکداری ءِ وسیلگ ءَ پاکستان ءِ گوما راجدپتری براتی ءَ را گیش مھکم کنگ لوٹ ایت۔ گند ءُ نند ءِ ساھت ءَ دوئیں نیمگ ءَ وتی اسٹریٹجک شریکداری ءَ را گیش مھکم کنگ ءِ واستہ یکجائی منصوبگ آنی سر ءَ کار کنگ ءِ سر ءَ تپاک کنگ بوت۔ ایشاں آیوکیں وھد ءِ کمک ءِ بابت ءَ جوانیں اُمیت ءِ درشان کت کہ دوئیں ملک آنی مفاد ءِ تہ ءَ بیت ءُ دمگ ءَ توانائی ءِ ایمنی ءَ را دل یکیمی کنگ بیت۔
