شیری رحمان ءَ راج ءَ را مبارک بات داتگ، پاکستان ءُ ہندوستان ءِ نیام ءَ انوگیں کش ءُ چیل ءِ تہ ءَ پٹوسی ملک آنی کرد ءِ سر ءَ منت واری ءِ درشانی

اسلام آباد۔11مئی (اے پی پی): پیپلز پارٹی ءِ سینیٹر شیری رحمان ءَ راج ءَ را مبارک بات دیگ ءِ ساھت ءَ پاکستان ءُ بھارت ءِ نیام ءَ انوگیں جنگ بندی ءِ معاہدے ءِ توسیپ کت ءُ ھمساھگیں ملک آنی کمکی کرد ءِ سر ءَ منت واری ءِ درشان کت ءُ جھان ءِ جیڈھ آنی تہ ءَ امن ءُ ایمنی ءِ دیمروئی ءِ واستہ سفارتی کمک ءِ ھم توسیپ کت۔ سینیٹر شیری ءَ یک شمبے ءِ روچ ءَ یک انٹرویو ءِ تہ ءَ گوشت کہ پاکستان ءِ مغربی ءُ اسلامی ملک آنی گوما مھکمیں سیادی ءَ چہ سفارتی انزوا ءِ لیکہ ھلاس بوتگ اَنت۔ آئی ءَ چین، امریکہ، سعودی عرب، ترکی ءُ ایندگر ملک آنی نیمگ ءَ چہ کمکی کرد ءِ ھم ساڑات ءُ پاکستان ءِ سفارتی کوشست آنی تہ ءَ آھانی ارزشتی ایں کمک ءِ سر ءَ زور پر دات۔ آئی ءَ پاکستان ءِ سلاہ بندیں اُرد آنی توانائی آناں ھم توسیپ کت ءُ ملک ءِ سرجمیں زور ءُ تابکاری ءَ را پدر کت ءُ گوشت کہ مئے اُرد آنی فوجی توانائی بے درور انت کہ اے ملک ءِ زور ءُ ایمنی ءِ درشان انت۔ شیری رحمان ءَ گوشت کہ کشمیر ءِ جیڈھ ءِ سر ءَ پاکستان ءِ نیمگ ءَ چہ مھکمیں پسو ءَ یک رندے پدا جھان ءِ پڑ ءَ جیڈھ ءِ سر ءَ چمشانک داتگ، اے پاکستان ءِ واستہ مزنیں سوبمندی یے۔ آئی ءَ اے گپ ءِ سر ءَ زور پر دات کہ بھارت توامیں محاذ آنی سر ءَ ناکام بوتگ وھدیکہ پاکستان ءِ کوشست آنی سبب ءَ دیریں جیڈھ ءِ نیمگ ءَ میاں اوستمانی دلگوشی ءَ را سوبمندیں رنگ ءَ کشگ بوتگ ایشی ءَ چہ پاکستان ءِ سفارتی ءُ اسٹریٹجک رپک ءَ را پدر کتگ۔ آئی ءَ گیش گوشت کہ بھارت ءَ را وتی کار آنی آسر آنی سر ءَ وت ءَ را احتساب کنگی اِنت ءُ گوستگیں کش ءُ چیل آنی وھد ءَ بوتگیں تاوان آنی تہ ءَ چہ دربرگ لوٹ ایت۔ آئی ءَ بھارت ءَ را ھشدار داتگ کہ آ پاکستان ءِ حلاف ءَ دروگیں بیانیہ ءُ پروپیگنڈا ءَ چہ وت ءَ بہ پھریز ایت۔