اسلام آباد۔10مئی (اے پی پی): اسلام آباد، وفاقی وزیر اطلاعات ءُ نشریات عطا اللہ تارڑ ءَ گشتگ کہ بھارت ءَ زوراکی ءِ تہا گامگیج چست کتگ، پاکستان ءَ ایوک ءَ وت رکّینگ ءِ ھاتر ءَ بدلی زرتگ، بھارت ءَ را وت ءَ پد کشگی انت، بھارت ءَ مئے شہری آبادی ءَ را نشانگ جوڑ کتگ، وھدے کہ ما اخلاقیات ءُ ذمہ واری ءِ درشان کنان ءَ ایوک ءَ بھارت ءِ شہری آبادی ءَ را نشانگ جوڑ نہ کتگ۔ شمبے ءِ روچ ءَ برطانوی براڈکاسٹنگ کارپوریشن ءَ گوں تران کنان ءَ وفاقی وزیر ءِ اھوالکاری ءَ گوشت کہ پاکستان نہ زوراک اِنت ءُ نہ کہ آشوب پسند اِنت، پاکستان امن ءِ ملک اِنت۔ ہندوستان ءَ شپ ءِ تہاری ءَ پاکستان ءِ شہری آبادی ءِ سرا اُرش کت کہ ایشی ءِ تہا بے گناہیں زہگ، زالبول ءُ بے گناہیں شہری مردم شہید کنگ بوت انت کہ آہاں گوں ہچ وڑیں جیڑہ ءُ جنجال ءَ ہچ سیادی نیست ات۔ وزیر ءِ اھوالکاری ءَ گوشت کہ گوستگیں شپ ءَ بھارت ءَ مئے لھتیں فوجی تنصیبات ءِ نزیک ءَ آپریشن کتگ۔ پاکستان ءَ اقوام متحدہ ءِ منشور ءِ آرٹیکل 51 ءِ رد ءَ وتی دفاع ءِ حق ءَ کارمرز کنان ءَ اے بدلی ءِ پسو دات۔ یک جست ءِ پسو ءَ آئی ءَ گوشت کہ پاکستان ءَ بھارت ءِ شہری آبادی ءَ را نشانگ نہ کنگ ءَ چہ گیشیں ذمہ واری ءِ درشان کتگ۔ ما ایوک ءَ آھانی فوجی تنصیبات، فوجی سامان، ریڈار، ءُ فوجی اڈہ نشانگ جوڑ کتگ اَنت پرچا کہ اے مئے جنگی اخلاقیات ءِ بہر اِنت، ما جنگ ءَ ھم رھبندانی سر ءَ عمل کنیں۔ وزیر ءِ اھوالکاری ءَ بھارت ءِ اے گپ ءِ سک رد کنان ءَ گوشت کہ اے بے بنیں دعویٰ اَنت کہ ایشی ءِ مول ءُ مراد راستیں جاور ھال ءَ چہ دلگوشی ءَ را کشگ اِنت۔ وفاقی وزیر اطلاعات ءَ گوشت کہ گوستگیں شپ ءَ مارا اے ھم ھال رستگ کہ امرتسر ءَ بھارت ءِ نیمگ ءَ لھتیں میزائل شنگ کنگ بوتگ اَنت کہ اودا سکھ اقلیت نندوک اِنت۔ آئی ءَ گوشت کہ سکھ کمیونٹی مئے گوما سک باز نزیکی کنت۔ پاکستان ءِ تہا نانکانا صاحب، پنجہ صاحب ءُ کرتار پور ءِ وڑیں سکھ راج ءِ مقدسیں جاہ است انت کہ ما آہانی رکھینگ ءَ کنیں۔ یک جست ءِ پسو ءَ وفاقی وزیر ءِ اھوالکاری ءَ گوشت کہ پہالگام ءِ دمگ لائن آف کنٹرول ءَ چہ نزیک ءَ 200کلومیٹر دور اِنت ءُ مزن وزیر محمد شہباز شریف ءَ وت گوشت کہ ما اے وئیل ءِ غیر جانبدار ءُ شفافیں پٹ ءُ پول ءَ کمک کنگ ءَ تیار ایں ۔ آئی ءَ گوشت کہ پہلگام ءِ وئیل ءِ ذمہ واری ھچ ادارگ ءَ نہ زرتگ ءُ نہ بھارت ءَ اے درگت ءَ ھچ وڑیں ثبوت داتگ۔ اے واقعہ ءَ گوں پاکستان ءَ ہمگرنچ کنگ ءِ ہچ وڑیں ثبوت نیست۔ آئی ءَ گْوشتگ کہ پہلگام ءِ وئیل ءَ چہ بس دہ منٹ ءَ پد ھندی پولیس ءَ ایف آئی آر نبشتہ کتگ ءُ پولیس یک ءُ نیم کلاک ءَ پد وئیل جاہ ءَ سر بوتگ۔ ما ھمے گْوشگ ءَ ایں کہ اے وئیل ءِ پٹ ءُ پول کنگ بہ بیت دانکہ راستی دیم ءَ بیا اَنت ۔ آئی ءَ گوشت کہ مقبوضہ کشمیر ءَ وھدے ھپت سد ھزار ھندی فوجی تعینات انت گڈا اے چون ممکن انت کہ اے رنگیں اُرش بہ بنت۔ وھدے کہ چوشیں مزنیں لشکر ھست بیت ءُ پدا پہلگام ءِ وڑیں واقعہے بیت گڑا اے ھندوستان ءِ سیکورٹی ءُ انٹیلی جنس ءِ بے سوبی اِنت۔ ما پٹ ءُ پول ءِ پیشکش کتگ ات بلے ہندوستان ءَ ہچ وڑیں ثبوت پیش نہ کتگ ات ءُ پدا اے واقعہ ءِ آڑ ءَ پاکستان ءِ سرا اُرش کتگ ات، اگاں چہ ما ناشرکاری ءِ ھلاپ ءَ یک فرنٹ لائن ریاستے ایں ۔ وفاقی وزیر ءِ اھوالکاری ءَ یک جستے ءِ پسو ءَ گوشت کہ استیں جاور ھال آنی تہ ءَ پاکستان ءَ مزنیں گر ءُ دار ءِ درشان کتگ۔ ما چار سرجمیں روچ ءَ گوں تحمل ءَ کار کت بلے ہندوستان ءَ مئے شہری آبادی ءِ سرا بے اشتعال ءَ اُرش برجاہ داشت۔ ما ایوک ءَ وتی دفاع ءِ حق ءَ کارمرز کتگ۔ چوناھا ھندوستان ءِ زوراک اِنت پمیشکا ھندوستان ءَ وت پُشت ءَ کشگی اِنت۔ آئی ءَ گوشت کہ بھارت ءَ پہلگام ءِ وئیل ءِ سر ءَ ھچ وڑیں ثبوت داتگ ءُ نہ کہ مئے شہری آبادی ءِ سر ءَ اُرش آناں جواز پیش کتگ۔ ہندوستان ءَ زالبول ءُ زھگانی سر ءَ اُرش کتگ، ما وتی دفاع ءِ حق ءَ کارمرز کتگ، نوں جاوراں گہتر کنگ ءِ ھک ھندوستان ءِ سر ءَ اِنت پرچا کہ ھندوستان ءَ ٹینشن بندات کتگ، ما ایوک ءَ وت ءَ دفاع کتگ۔ یک جست ءِ پسو ءَ وفاقی وزیر ءِ اھوالکاری ءَ گوشت کہ پاکستان ءَ امریکا، چین، سعودی عرب ءُ اے دگہ ملک آنی گوما سفارتی رابطہ است انت۔ امریکہ ءِ وزیر ءِ درئی کار مارکو روبیو ءَ گوں پاکستان ءِ نائب مزن وزیر ءُ آرمی چیف ءَ گپ ءُ تران کتگ۔ پاکستان ءِ تر ءُ تاب ءِ وھد ءَ سعودی ءِ دیمپانی ءِ وزیر ھم ساڑی ات۔ وفاقی وزیر ءَ گوشت کہ بھارت ءَ گوں دیم پہ دیمیں رابطہ نہ بوتگ ءُ اگاں نوکیں ھال ءُ اھوال بوت گڈا فوجی جارکش ایشانی بابت ءَ زوت سرپد کنت۔ یک جست ءِ پسو ءَ وفاقی وزیر ءِ اھوالکاری ءَ گوشت کہ مئے اُرد لائن آف کنٹرول ءِ سر ءَ دفاعی پوزیشن ءَ اَنت ءُ بازیں روچ ءَ چہ الرٹ ءَ اَنت پرچا کہ بھارتی اُرش برجاہ اَنت۔ ما ھرچ کارروائی یے کتگ ات آ وت دفاع ءِ ھاترا بوتگ ات۔
