اسلام آباد۔10مئی (اے پی پی): مزن وزیر محمد شہباز شریف ءَ ایوان ءِ صدر ءَ صدر آصف علی زرداری ءَ گوں گند ءُ نند کت۔ مزن وزیر ءَ صدر ءِ مملکت ءَ را بھارتی زوراکی ءُ پاکستان ءِ نیمگ ءَ آپریشن ’’بانیان مارسس‘‘ ءِ رنگ ءَ بھارت ءَ را داتگیں موثر پسو ءِ بابت ءَ سرپد کت۔ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ نائب مزن وزیر ءُ دری کارانی وزیر سینیٹر محمد اسحاق دار ءُ وزیر کانود ءُ انصاف سینیٹر اعظم نظیر تارڑ ھم ساڑی بوتگ انت۔ صدر ءِ مملکت ءَ ملک ءِ سلاہ بندیں اُرد آنی استثنائی پیشہ وارانہ ءُ بہادری ءِ توسیپ کت کہ آ بھارت ءِ بے سوبیں زوراکی ءُ میزائل اُرش آنی سر ءَ جوانیں پسو ءِ دات۔ صدر ءِ مملکت ءَ گوشت کہ پاکستان یک ذمہ وار ءُ امن دوستیں راج ءِ بستار ءَ بھارتی اشتعال انگیز آنی دیم ءَ مزنیں تحمل ءِ درشان کتگ بلے بدبھتی ءَ بھارتی زوراکی ءِ سبب ءَ پاکستان ءَ را وتی حاکمیت ءِ رکھینگ ءُ وتی شہری آنی رکھینگ ءِ واستہ فیصلہ کنوکیں رنگ ءَ پسو دیگ ءَ ابید دگہ راہ ءُ درے نہ بوتگ۔ صدر ءِ مملکت ءَ گوشت کہ سرجمیں پاکستانی راج یکجائی ءَ اِنت ءُ بھارتی زوراکی ءِ دیم ءَ وتی سلاہ بندیں اُرد ءِ سرجمی ءَ کمک کنگ ءَ اِنت۔ صدر ءِ مملکت ءَ گوشت کہ پاکستان ہر قیمت ءَ ملک ءِ وت واجہی ءُ سرزمین ءِ یکوئی ءِ رکھینگ ءَ کنت۔
