اسلام آباد – 9 مئی (اے پی پی): مزن وزیر محمد شہباز شریف ءَ سعودی حکومت ءِ سفارتی کوشست آناں ستا کنان ءَ گوشت کہ بھارت ءِ بے سبب ءُُ بے جاہیں زوراکی ءِ سبب ءَ پاکستان ءِ اے سنگینیں زوراکی ءِ یک ھاسیں خلاف ورزی اِنت۔ دمگی امن ءُ ایمنی ءِ ھاترا ھترہ ءِ دیم ءَ آرگ بوتگ۔ دومی نیمگ ءَ سعودی ءِ دری کارانی وزیر ءَ سعودی عرب ءِ نیمگ ءَ چہ میاں اوستمانی کانود ءُ اقوام متحدہ ءِ سلامتی کونسل ءِ ھمگرنچیں قرارداد آنی رد ءَ پاکستان ءُ بھارت ءِ نیام ءَ جیڈھ آناں کم کنگ ءُ توامیں بقایا جیڈھ آناں گیش ءُ گیوار کنگ ءِ ضلورت ءِ سر ءَ زور پر داتگ۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ سعودی عرب ءِ دری کارانی وزیر عادل الجبیر ءَ مزن وزیر محمد شہباز شریف ءَ گوں گند ءُُ نند کتگ۔ سعودی ءِ وزیر پاکستان ءِ یک روچی سرکاری تر ءُ تاب ءَ انت۔ گند ءُ نند ءِ ساھت ءَ مزن وزیر ءَ دو شریک مسجد ءِ نگہبان شاہ سلمان بن عبدالعزیز السعود ءِ ھواری ءَ ولی عہد ءُ مزن وزیر شہزادہ محمد بن سلمان بن عبدالعزیز السعود ءِ ھم نیکیں واھگ آنی درشان کت۔ مزن وزیر ءَ پاکستان ءُ سعودی عرب ءِ نیام ءَ دیریں براتی سیادی آنی گیش دیمروئی ءِ سر ءَ دل یکیمی ءِ درشان کت ءُ ہر مشکلیں وھد ءَ پاکستان ءِ بے دروریں کمک ءِ پد ءَ سعودی عرب ءِ شگر ءُُ منت گپت۔ مزن وزیر ءَ گند ءُ نند ءِ تہ ءَ جنوبی ایشیا ءِ استیں جاور ھال آنی سر ءَ گپ ءُ تران کنان ءَ مزن وزیر ءَ پاکستان ءِ سر ءَ بھارت ءِ نیمگ ءَ میزائل ءُ ڈرون اُرش آنی سک باز ایراد گپت کہ ایشی ءِ آسر ءَ زالبول ءُ زھگاں ھوار بازیں بے گناھیں لس مردم شھید کنگ بوتگ اَنت ءُ مال ءُ مڈی ءِ تاوان بوتگ۔ آئی ءَ اے گپ ءِ سر ءَ زور پر دات کہ بھارت ءِ بے سوب ءُُ بے جاہیں زوراکی پاکستان ءِ وت واجہی ءُُ سرزمین ءِ یکوئی ءِ پدریں ھلاپ ورزی اِنت ءُُ دمگی امن ءُ ایمنی ءِ ھاترا مزنیں ھترہ اِنت۔ مزن وزیر ءَ پاکستان ءِ بہادریں اُرد آناں شگر ءُ منت درشان کت، ایشاں وطن ءِ رکھینگ ءِ تہ ءَ مثالی دلیری ءُُ بہادری ءِ درشان کت ءُُ دژمن ءِ نا شریں ارادہ آناں ناکام کت۔ مزن وزیر ءَ گوشت کہ پاکستان وتی وت واجہی ءُُ سرزمین ءِ یکوئی ءِ رکھینگ ءِ واستہ سرجمیں رنگ ءَ جزمیگ اِنت ءُُ اقوام متحدہ ءِ چارٹر ءِ آرٹیکل 51 ءِ رد ءَ وت مہ وتی ءِ رکھینگ ءِ واستہ گامگیج زورگ ءِ سرجمیں ھک ءَ دار ایت۔ مزن وزیر ءَ سعودی حکومت ءِ نیمگ ءَ خطہ ءِ تہ کشی آناں کم کنگ ءُ خطہ ءِ امن ءِ برجائی ءِ واستہ سفارتی کوشست آناں ساڑات۔ سعودی ءِ وزیر مملکت ءَ پاکستانی شہری آنی گران بھائیں جانانی بیرانی ءِ سر ءَ دل ءِ جہلانکی ءَ دلپدردی ءِ درشانی کت۔ آئی ءَ گوشت کہ سعودی عرب ءَ جنوبی ایشیا ءِ استیں جاور ھال آنی سر ءَ سک پریشانی انت۔ آئی ءَ سعودی عرب ءِ نیمگ ءَ چہ میاں اوستمانی کانود ءُُ اقوام متحدہ ءِ سلامتی کونسل ءِ ھمگرنچیں قرارداد آنی رد ءَ پاکستان ءُ بھارت ءِ نیام ءَ کش ءُُ چیل آنی تہ ءَ کمی ءُُ دراھیں جیڈھ آناں گیش ءُ گیوار کنگ ءِ ضلورت ءِ سر ءَ زور پر دات۔
