اسلام آباد – 9 مئی (اے پی پی): پاکستان پیپلز پارٹی ءِ راجی اسمبلی ءِ باسک حاجی رسول بخش چانڈیو ءَ گشتگ کہ پاک فوج ءِ نیمگ ءَ چہ جوانیں ءُ زوراکیں پسو ءَ پد ہندوستان ءِ مزن وزیر نریندر مودی دگہ کس ءَ را وتی دیم ءِ پیش دارگ ءِ لائک نہ انت ءُ ہندوستان ءَ را یک انچیں سبک ءِ دنت کہ آیوکیں بازیں نسلاں یات کنگ بیت۔ قومی اسمبلی ءِ دیوان ءَ ہندوستان ءِ گوستگیں زوراکی ءِ سرا جاڑیگیں باست ءُ واست ءِ ساھت ءَ وتی ھیالانی درشان کنان ءَ حاجی رسول بخش چانڈیو ءَ گوشت کہ مارا ایوک ءَ پاکستان ءُ آئی ءِ دیمپان ءِ بابت ءَ گپ کنگی انت۔ اگاں لوٹ بوت گڑا ما پاک فوج ءِ ھمراھی ءَ دیمے مورچہ آنی سر ءَ ھمکوپگ بوہان ءَ جنگ کناں ۔ اگاں وھد اتک گڑا ما دژمن ءِ ٹینکانی دیم ءَ وتی سینہ ءَ بمب ءِ بندگ ءُ تچک بوھگ ءَ چک ءُ پد نہ بئیں۔ آئی ءَ گوشت کہ بھارت ءَ شپ ءِ تہاری ءَ چو بزدلاں اُرش کتگ، پرچا کہ آ زان اَنت کہ آھاں روچ ءِ رژنائی ءَ مئے بہادریں سپاھیگ آنی دیمپانی ءِ ھمت نیست۔ بلے مئے شاہین ءُ بامردیں سپاھیگ ہر وھد ءَ آگہ اَنت ءُ یک لائکیں پسو یے داتگ ءُ دژمن ءَ سرجمیں دگنیا ءِ دیم ءَ بے ننگ کتگ۔ حاجی رسول بخش چانڈیو ءَ گوشت کہ اے وھد ءَ سرجمیں راج گوں وتی بہادریں ارد انی گوما ھمکوپگ اوشتاتگ۔ ملک ءِ رکّینگ ءَ ھرکس ساڑی اِنت، کسانیں چُکے ھم دژمن ءِ ھلاپ ءَ جنگ ءَ ساڑی اِنت۔ آئی ءَ گیش گوشت کہ پیپلز پارٹی ءِ چیئرمین بلاول بھٹو زرداری ءَ ھم ھاسیں رنگ ءَ گْوشتگ کہ پارٹی پاک فوج ءِ گوما اوشتاتگ ءُ بھارت ءَ را ھما لائکیں پسو دیگ بیت کہ آئی ءَ را مدام یات بیت۔ آئی ءَ اے گپ ءِ سر ءَ ھم اپسوز ءِ درشانی کت کہ ایوان ءِ تہ ءَ لھتے مردم گوں ذاتی شکایتاں نشتگ اَنت، اگاں چہ اے وھد ءَ ایوک ءَ ملک ءِ ایمنی ءُ راجی یکوئی ءِ سر ءَ گپ ءُ تران کنگ بہ بیت۔ بھارت پاکستان ءَ ناشرکاری ءَ را مدام دیم ءَ برگ ءَ اِنت، ءُ جعفر ایکسپریس ءِ اُرش ءَ پد سندھ ءِ آپانی منوگری ءِ مھتل کنگ ءِ دھمکی دیگ ءَ وت ءَ بے نپ کتگ ءُ پاکستان ءِ سر ءَ وت سرئیں الزام جنگ ءَ اِنت ءُ دمگ ءَ ناشرکاری ءَ را دیم ءَ برگ ءَ اِنت۔ آئی ءَ گوشت کہ ما درست تپاک آں، پاک فوج ءَ ھوار درستیں ادارگ یکیں تاک ءِ سر ءَ اَنت، ملک ءِ ھلاپ ءَ کس ءَ را لنکُک چست کنگ ءِ موہ نہ دیگ بیت۔
