اسلام آباد۔ 09مئی (اے پی پی) بنجائی وزیر حوالکاری و شینکاری عطاء اللہ تارڑ پارینے کہ پاکستان ءِ بھارت آ روایتی جنگ اٹی پیدوار و فیصلہ کن برتری دوئی مسنے، پاکستان نا سلہہ بند فوج دشمن نا جارحیت نا پبی ورندی ءِ ترسا بھارت نا پنچ جنگی جہاز و داتم اسکان 77 ڈرون آتے سرسہبی اٹ خلک بٹے ہرا پاکستان نا فضائی لائخی و فوجی برتری نا پیدوار شاہدی ءِ۔ جمعہ نادے آ تینا بیان اٹی بنجائی وزیر حوالکاری پارے کہ پاکستان اسہ پرامن ءُ ملک اسے ولے ہرجارحیت نا برخلاف تینا دفاع ءِ کننگ ننا کانودی و اخلاقی و ریاستی حق ءِ، پاکستان تینا دا حق ءِ زمواری اٹ کاریم اٹ ایسُنے و اتیک۔ اوپرے کہ ساڑی آ دے تیٹی بھارت نئے بیرہ عسکری پڑآ اشتعال انگیزی کرے بلکن تینا الس ءِ ریفنگ کن داخلی کہول آ میڈیا غا بدترین پروپیگنڈا مہم نا بناءِ کرے۔ بھارتی میڈیا غاسجفوک وڑاٹ فیک نیوز، متکن آ عکس و جعلی ویڈیو تا کمک اٹ اسہ دروغ بیانیہ اس جوڑ کننگ ءِ، ہرا بھارتی حکومت نا ہبکئی، بے سہبی و بدحواسی نا شاہدی ءِ۔ اوپارے کہ پاکستان بھارت نا دروغ پروپیگنڈا ءِ پبی وڑاٹ بے نقاب کرے ہراڑآن بھارت ءِ پین ہزیمت ہرفوئی تما۔ بنجائی وزیر پارے کہ دروغ بیانیہ نا کمک اٹ بھارت تینا بے سہبی ءِ ڈکنگ نا بے سہب کوشست کرے ہرادے مچ آ دنیا خنا و بھارت ءِ پین شرمندگی تون مون تروئی تما۔
