اسلام آباد۔ 09مئی (اے پی پی) وزیراعظم محمد شہباز شریف پارینے کہ بروک آ بجٹ اٹی لس بندغ ءِ ریلیف تننگ حکومت نا اولیت ءِ، نیزگار و نیامی تپہ نا مالی مشکلات آتیٹی کمتی کن غٹ وسیلہ غاتے کاریم اٹ اتنگک۔ وزیراعظم آفس نا میڈیا ونگ انا کنڈآن جمعہ نادے آ جاری بیان نا رداٹ بنجائی بجٹ 2025-26نا تیاری نا بابت وزیراعظم محمد شہباز شریف نا کماشی ٹی اہم دیوان اس اڈ ہلک ہراٹی نجی بشخ آن تعلق تخوک آ پنی آ کاروباری شخصیت و چاہندارآتیان بجٹ آ سلابت کننگا۔ وزیراعظم دیوان آن تران کرسا پارے کہ ملکی شونداری و شونہالی کن حکومت و نجی بشخ ءِ اواری اٹ کاریم کروئی ءِ، بروک آ بجٹ اٹی لس بندغ ءِ ریلیف تننگ اولیت ءِ، نیزگار و نیامی تپہ نا مالی مشکلات آتیٹی کمتی کن غٹ وسیلہ غاتے کاریم اٹ اتنگک۔وزیراعظم بنجائی بجٹ نا تیاری ٹی برآمد آتیا تالان پائیدار شونداری آ چکار کننگ نا پارت کرساپارے کہ صنعت آتا مون آ دننگ و پیدوار اٹی ودکی کن ڈٹ آتیاکاریم کننگے، ورناتے کسبی تربیت ترسا ساڑی آ خواست آتون ہم گرنچ کننگ ننا حکومت نا اولیت ءِ۔ اوبنجائی بجٹ تیار کرسا پوسکن آملازمت آتا وارخواہی ودی کننگ آ خاص چکار کننگ نا ہم پارت کرے۔ وزیراعظم پارے کہ بنجائی بجٹ اٹی کشت وکشار، انفارمیشن ٹیکنالوجی، چنکا و نیامی درجہ نا کاروبار و ہاؤسنگ نا بشخ آتیا پبی چکار کننگے انتئے کہ دا غٹ بشخ آتیٹی بے حد کچ ساڑی ءِ۔ اوپارے کہ پبلک پرائیویٹ پارٹنر شپ انا رداٹ ڈٹ آتا مون آ دننگ بروک آ بجٹ اٹی حکومتی اولیت مریک۔ وزیراعظم پارے کہ پاور سیکٹر اٹی حکومتی اصلاحات نا مثبت بھرم بننگ ءِ، صنعت آتیکن بجلی نا نہاد آتیٹی کمتی صنعت و پیدوار نا مون آ دننگ نا کنڈآ اسہ اہم ءُ گام اسے۔ حکومتی نظام ءِ شفاف کننگ، کاروباری برادری، زرکارآتے آسراتی فراوان کننگ نا بابت آٹومیشن و ڈیجیٹائزیشن ءِ مون آ دننگ انگ ءِ۔ وزیراعظم پارے کہ بنجائی حکومت نا کچ ءِ کم کننگ نا بابت رائٹ سائزنگ نا عمل بروک آ مالی سال اٹی ہم برجاتخنگک۔ داوخت آ وزیراعظم ءِ حوال اٹی پاننگاکہ بجٹ تیاری نا بابت نجی بشخ اتون سلابت نا عمل تدوک آ مسہ تُو آن برجاءِ، بجٹ نا تیاری نا بابت زرگزران نا چندی بشخ آتیان اسٹیک ہولڈر آتون سلابتی سیشن کننگانے، 2025-30اسکان نا پنچ سالہ ٹریڈ پالیسی فریم ورک زوت پورو کننگک، ای کامرس 2.0فریم ورک ہم پوروی نا خڑک ءِ۔ داکان بیدس ٹیرف ریشنلائزیشن نا بابت ہم لائحہ عمل اس تیار کننگ انگ ءِ، کاروباری شخصیت و چاہندار آتا ڈل حکومتی زرگزرانی پالیسی تیا پت انا درشانی ءِ کرسا تینا تینا سلاہ تے تسر۔ وزیراعظم نجی بشخ آن تعلق تخوک آ پنی آکاروباری شخصیت و چاہندار آتا سلاہ تا خیرمقدم ءِ کرے و اوفتا قابل عمل سلاہ تے بجٹ اٹ اوار کننگ ناپارت کرے۔ دیوان اٹی بنجائی وزیر ڈٹ بندی احسن اقبال، بنجائی وزیر اقتصادی امور احدخان چیمہ ، بنجائی وزیر خزانہ و محصولات محمد اورنگزیب، بنجائی وزیر واپار جام کمال خان، بنجائی وزیر انفارمیشن ٹیکنالوجی و ٹیلی کام شزہ فاطمہ، بنجائی وزیر پاور ڈویژن سردار اویس احمد لغاری، بنجائی وزیر پیٹرولیم علی پرویز ملک، وزیراعظم نا خصوصی کمکار صنعت وپیدوار ہارون اختر و تعلقدار بڑزکو سرکاری آفیسر آک بشخ ہلکر۔
