اسلام آباد۔ 09مئی (اے پی پی) بنجائی وزیر قومی غذائی رکھ و پٹ وپول رانا تنویر حسین پارینے کہ سلہہ بند فوج بھارت نا عزم ءِ مش تا کرینے، مچ آپارلیمان و قوم پاکستان نا فوج اتون تفوک ءُ۔ جمعہ نادے آ قومی اسمبلی ٹی گپ وتران کرسا رانا تنویر حسین پارے کہ بھارت نا پاکستان آ دوبہ خلنگ بے بنداو و راستی تیان چپ ءِ، بھارت تینا غیرکانودی کوزہ ٹی جموں وکشمیر اٹی ہرا چاگڑد ءِ ودی کرینے او دہشت گردی اسے، بھارت پاکستان نا وجود ءِ سگپک، ہراتم ہم بھارت ءِ موقع ملانے اوپاکستان ءِ نسخان تننگ آن پاناد کتنے، ولے ننا سلہہ بند فوج مدام اونا ناپاک عزم ءِ مش تا کرینے۔ اوپارے کہ ہراتم بھارت تینا غیرکانودی کوزہ ٹی جموں وکشمیر نا خصوصی حیثیت ءِ چٹفے تو نن ہمووخت آ اونا بایدے پبی ورندی ءِ تروسن، ساڑی آ وخت بھارت و اسرائیل نا گٹھ جوڑ ءِ، اسرائیل غزہ ٹی و مودی بھارت نا غیرکانودی کوزہ ٹی جموں وکشمیر وپاکستان اٹ جارحیت کننگ ءِ۔ مودی ءِ دا حقیقت ءِ پہہ مرے کہ پاکستان غزہ اف، کنے کنا حلقہ غان ورناک فون کننگ ءُ کہ ننے بھارت نا برخلاف جنگ کننگ کن رجسٹر کننگے، مچ آ پاکستانی قوم پاکستان نا فوج اتون تفوک ءُ، ننا سلہہ بند فوج مچ آ دنیا ٹی گچین فوج آتیٹی اوار ءِ، ننا سلہہ بند فوج انا کسبی مہارت ءِ اقوام متحدہ و جہانی ادارہ غاک ہم امنا کرینو۔ اوپارے کہ ننتون پوسکن انگا جنگی جہاز و سلہہ غاتون اوار اوار جوزہ ایمانی ہم ارے۔ ننا شاہین تیٹی مچ آ دنیا ٹی اولیکو وارفال جنگی جہاز آتے خلکنے بٹینے۔اگہ مودی سمجھک کہ او جارحیت کرسا گچین کاری تے کٹک تو دااونا نادانی ءِ، مودی نا غرور مش تا مسنے، مچ آپارلیمان و قوم پاکستان نا فوج اتون تفوک ءُ، وخت اس کہ بھارت اٹی اپوزیشن مودی نا پالیسی تیا سوج ہرفینے۔ اوپارے کہ پاکستانی قوم اٹی ہچ ءُ خوف و خلیس اس اف و مچ آ قوم یکجاءِ۔ ہندوستان اسہ ارب چِل انا آبادی نا ملک ءِ۔ مودی اوفتا خیال ءِ کے و اوفتے امتحان اسے ٹی شاغپ۔
