اسلام آباد ۔ 09مئی (اے پی پی) بنجائی وزیر داخلہ محسن نقوی تون امریکہ نا قائم مقام سفیر نیٹلی بیکر نا 48گھنٹہ ٹی ارٹ میکو اہم اوڑدہی مس ہراٹی پاک بھارت بے چیٹی و سیم تا حالیت آتیا گپ وتران کننگا۔ وزیرداخلہ محسن نقوی قائم مقام امریکی سفیر نیٹلی بیکر ءِ ساڑی بے چیٹی و ودی مروک آ حالیت آتیان معلومدار کرے۔ وزیرداخلہ محسن نقوی بھارت ناڈرون دہشت گردی نا بارواٹی ہم قائم مقام امریکی سفیر ءِ بریف کرے۔ اوپارے کہ بھارت غٹ جہانی کانود آتے لتاڑسا شاری آبادی تے ڈرون تا کمک اٹ شست کننگ نا ناپاک کوشست کرے۔ پاکستان گچین کارروائی کرسا چندی ڈرون تے خلک بِٹے۔ ڈیہہ انا خطرناک حالیت آتا غٹ تر زموار بھارت ءِ۔ مچ آ ڈیہہ جنگ انا دنگ آٹی ءِ۔ سلامتی آ اسُل آنچ بننگ کن اِلیپنہ۔ امریکی سفارت خانہ نا پولیٹیکل قونصلر زیک ہارکن رائیڈر ہم داوخت آ ساڑی ئس۔
