انسٹی ٹیوٹ آف سٹریٹجک سٹڈیز اٹی ’’پاکستان و ڈیہہ: علاقائی رابطہ غاتے ودفنگ ، دہشت گردی تون مون تننگ و انسداد دہشت گردی‘‘نا سرحال آ جہانی کانفرنس

اسلام آباد۔ 09مئی (اے پی پی) انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) ٹی سینٹر فار اوغانستان ، مڈل ایسٹ اینڈ افریقہ جہانی ادارہ فریڈرک ایبرٹ سٹفٹنگ نا کمک اٹ اسہ دے ئی جہانی کانفرنس اس اڈ تسر۔ کانفرنس نا سرحال ’’پاکستان و ڈیہہ: علاقائی رابطہ غاتے ودفنگ، دہشت گردی تون مون تننگ و انسداد دہشت گردی‘‘ئس۔ کانفرنس نا بنائی سیشن نا مہمان خاص مشاہد حسین سید ئس۔ اولیکو ورکنگ سیشن بعنوان ’’پاکستان۔ اوغانستان تعلقداری: چیلنج و وارخواہی‘‘ئس۔ سیشن نا ترانکارآتیٹی سفیر قاضی ہمایوں، حمید حکیمی، سفیر ایاز وزیر، زلمی نشاط، صحافی طاہر خان و مسکوہی اوغان وزیر مزمل شنواری ئسک اوار ئسر۔ ترانکارآک پاکستان اوغانستان تعلقداری ٹی اہم چیلنج آتیا گپ وتران کریر ہرافتے ٹی ٹی ٹی پی نا خطرہ، بھارت نا کڑد، سیم آن ایپار دہشت گردی آ طالبان تا موقف و باہوٹ آتا پدی ہِننگ اوار ءِ۔ او عملی، الس آ مرکوز مشغولیت و ملک آتا نیام اٹ الس نا کہول آ تعلقداری آ زور شاغار۔ گڑاس مخلوق جھیڑہ غاتا پرامن ایسر، گچین واپار و اسیجائی وسیلہ غاتا کاریم اٹ اتنگ ءِ قابل کننگ کن طالبان تے باضابطہ امنا کننگ آ زور شاغار ۔ ٹی ٹی پی نا چیلنج تون مون تننگ آن بیدس جوان اوغان حکومت نا گرج ءِ۔ تاپی و کاسا۔1000کون آ ڈٹ آتے علاقائی رابطہ غاتا اہم وارخواہی تا وڑاٹ تالان کننگا وہڑتوم آ کنڈآتا اقتصادی لائخی ءِ ملنگ کن اسہ جوان واپاری معاہدہ سے نا سلاہ پیش کننگا۔ ارٹ میکو ورکنگ سیشن نا سرحال ئس’’علاقائی سلامتی و انسداد دہشت گردی: ارتقاء نا خطرہ و ورندی حکمت عملی ‘‘ئس ہرانا نظامت ءِ مسکوہی سفیر سیما الٰہی بلوچ کرے۔ سیشن نا ترانکار آتیٹی ڈاکٹر رستم عزیزی، ڈاکٹر فواد ایزدی، سفیر رفعت مسعود، ڈاکٹر مرات اسلان، حسن و ذیشان صلاح الدین ئسک اوار ئسر۔ ترانکارآک ودوک آ سیکورٹی خطرہ غاتون مون تننگ کن علاقائی کمکاری نا دمدستی گرج آ زور شاغار و پاریر کہ طالبان تے داسہ نیامی ایشیاکن براہ راست خطرہ نا وڑاٹ ہُننگپک، داعش کون آ ٹولی ہندی بھرتی تا کمک اٹ ودوک آ خطرہ غاتے ودی کیک۔ اوفک علاقائی رابطہ و سوگوی اتون اوار اوار روایتی و غیرروایتی سیکورٹی خطرہ غاتون مون تننگ ، اندرون ہم گرنچی ءِ سوگو کننگ وہمسایہ غاتون عملی وڑاٹ منسلک مننگ آ زور شاغار۔ اوفک پاریر کہ حقی انضمام کن جیرت مندانہ سرکڑدہ ئی، تین پہ تینی پت و امن، شونداری وعلاقائی ملکیت ک مریس مدی عزم انا گرج مریک۔ مسٹ میکو ورکنگ سیشن قائد اعظم یونیورسٹی نا ڈیفنس اینڈ سٹریٹجک سٹڈیز ڈیپارٹمنٹ نا ایسوسی ایٹ پروفیسر ڈاکٹر سلمیٰ ملک ماڈریٹ کرے، ہراٹی ’’غیرروایتی سیکورٹی خطرہ غاتون مون تننگ: موسمیاتی بدلی و انسانی چیلنج ‘‘ آتیا چکار کننگا۔ ترانکار آتیٹی غیرروایتی سیکورٹی خطرہ خاص وڑاٹ موسمیاتی بدلی تون مون تننگ نا دمدستی گرج آ زور شاغار ہرا سویلی ایشیاٹی نوکاپ، سموگ نا سوب ءُ۔ اوفک جہانی سوگوی ءِ پک کننگ کن جہانی کانود نا پاسداری نا اہمیت ءِ تالان کریر۔ شرہ ٹی ڈیجیٹلائزیشن ، آبادیاتی بدلی و بنداو پرستی آ سیاسی تاریخ نا اثرآتا ہم احاطہ ءِ کننگا۔ چیئرمین آئی ایس ایس آئی خالد محمود، غیرروایتی خطرہ غاتیٹی ودکی نا ذکر ءِ کرسا ڈیہہ انا اہم و پیچیدہ چیلنج آتیا گپ وتران نا اہمیت آ زور شاغا۔ اوپارے کہ جہانی کانفرنس اسہ نازرک ءُ موڑاسے آ اڈتننگا، خاص وڑاٹ وخت اس کہ بھارت نا کنڈآن پاکستان نا وتواجہی نا پاش آن پاش خلاف ورزی ءِ کننگانے۔ کانفرنس اٹی اسکالرز، پریکٹیشنرز، تھنک ٹینک نا چاہندار، میڈیا نا باسک آک و یونیورسٹی نا خوانوک آ مارک ہم بشخ ہلکر۔