اسلام آباد۔9مئی (اے پی پی):مزن وزیر محمد شہباز شریف ءَ گوشت کہ آیوکیں بجٹ ءَ لس مردم ءَ را ریلیف دیگ حکومت ءِ اولی ترجی اِنت، ءُ گریب ءُ میان اُستمانی تبک ءِ مالی جیڈھ آناں کم کنگ ءِ واستہ درستیں وسیلگ آناں کارمرد کنگ بیت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ وفاقی بجٹ 2025-26 ءِ ھوالگ ءَ یک ھاسیں دیوان ءِ برجم دارگ بوت، ایشی ءِ تہ ءَ نجی شعبہ ءِ نامداریں کاروباری مردم ءُ ماہرین آنی گوما بجٹ ءِ ھوالگ ءَ شور ءُ سلاھ کنگ بوت۔ مزن وزیر ءَ دیوان ءَ گوں گشتانک دیان ءَ گوشت کہ ملک ءِ دیمروئی ءُ وشھالی ءِ واستہ حکومت ءُ جندی شعبہ ءَ را یکجائی ءَ کار کنگی انت۔ آیوکیں بجٹ ءِ تہ ءَ اولی ترجی لس مردم ءَ را ریلیف دیگ اِنت۔ گریب ءُ میاں اوستمانی تبک ءِ مالی مشکل آناں گر ءُ دار ءِ واستہ درستیں وسیلگ آناں کارمرد کنگ بیت۔ مزن وزیر ءَ وفاقی بجٹ ءَ را برآمدات ءِ بنیات ءَ برجائی ءِ سر ءَ دلگوشی دیگ ءِ ہدایت کنان ءَ گوشت کہ صنعت آناں دیمروئی دیگ ءُ پیداوار ءَ را گیش کنگ ءِ واستہ منصوبگ آنی سر ءَ کار کنگ بہ بیت۔ مئے حکومت ءِ اولویت انت کہ آ ورنا آناں ذمہ واریں وانگ ءُ زانگ ءِ پھجارینگ ءُ آھاں ھما وھد ءِ لوٹ آنی رد ءَ ھمگرنچ بہ کنت۔ آئی ءَ وفاقی بجٹ ءِ تیاری ءِ وھد ءَ نوکیں روزگار ءِ موہ پیداک کنگ ءِ سر ءَ ھاسیں دلگوشی دیگ ءِ ھم ہدایت کتگ۔ مزن وزیر ءَ گوشت کہ وفاقی بجٹ ءَ کشت ءُ کشاری، انفارمیشن ٹیکنالوجی، کسان ءُ میاں اوستمانی کاروبار، ءُ ہاؤسنگ ءِ شوبگ آنی سر ءَ دلگوشی دیگ بہ بیت، پرچا کہ اے درستیں شوبگ آنی تہ ءَ بے دروریں گنجائش است انت۔ آئی ءَ گوشت کہ آیوکیں بجٹ ءَ سرکاری ءُ نجی شریکداری ءِ چیر دستی ءَ منصوبگ آناں دیمروئی دیگ حکومتی اولی ترجی ءِ بیت۔ مزن وزیر ئَ گوشت کہ بجلی ئِ شوبگ ئَ حکومتی اصلاحات آنی تہ ئَ جوانیں نتیجگ دیم ئَ بوھگ ئَ انت۔ صنعت آنی واستہ بجلی ءِ نرخ آنی تہ ءَ کمی صنعت ءُ پیداوار ءِ دیمروئی ءِ واستہ یک ھاسیں گامگیج اِنت۔ آٹومیشن ءُ ڈیٹا بائزیشن ءَ را دیم ءَ برگ بوھگ ءَ اِنت تانکہ سرکاری نظام ءَ را شفاف جوڑ کنگ ءُ کاروباری براتی ءُ سرمایہ کار آناں آسراتی دیگ بہ بیت۔ مزن وزیر ءَ گوشت کہ آیوکیں مالی سال ءَ وفاقی حکومت ءِ سائز ءَ را کم کنگ ءِ واستہ رائٹ سائزنگ ءِ کارروائی برجاہ بیت۔ اے موہ ءِ سر ءَ مزن وزیر ءَ را سرپد کنگ بیت کہ گوستگیں ھپت ماہ ءَ چہ بجٹ ءِ جوڑیشت ءِ ھوالگ ءَ جندی شوبگ ءِ گوما شور ءُ سلاھ ءِ عمل جاری اِنت۔ بجٹ ءِ جوڑیشت ءِ ھوالگ ءَ معیشت ءِ جتاجتائیں شوبگ آنی اسٹیک ہولڈرز ءِ گوما مشورہ سیشن کنگ بوتگ۔ 2025-30ءِ واستہ پنچ سالی تجارتی پالیشی ءِ فریم ورک زوت سرجم کنگ بیت۔ ای کامرس 2.0 ءِ فریم ورک ھم سرجمی ءِ نزیک ءَ اِنت۔ ایشی ءَ ابید ٹیرف ءِ عقلی کنگ ءِ ھوالگ ءَ کارروائی ءِ منصوبگ ھم جوڑ کنگ بوھگ ءَ اِنت۔ کاروباری مردم ءُ ماہرین آنی ڈل ءَ حکومت ءِ اقتصادی پالیشی آنی سر ءَ دل یکیمی ءِ درشان کت ءُ وتی وتی سوج ءُ سوج دات۔ مزن وزیر ءَ پرائیویٹ سیکٹر ءِ نامداریں کاروباری مردم ءُ ماہرین آنی سوج آناں اولیت دیگ ءُ ایشانی ممکنہ سوج آناں بجٹ ءِ تہ ھوار کنگ ءِ ہدایت کت۔ گند ءُ نند ءَ وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر تجارت جام کمال خان ، وفاقی وزیر انفارمیشن ٹیکنالوجی و ٹیلی کام شزہ فاطمہ ، وفاقی وزیر پاور ڈویژن سردار اویس احمد لغاری ، وفاقی وزیر پٹرولیم علی پرویز ملک ، مزن وزیر ءِ کمکار برائے صنعت و پیداوار ہارون اختر ءُ سیادی داروکیں مزنیں سرکاری کارندہ ساڑی اتنت۔
