اسلام آباد۔9مئی (اے پی پی): وفاقی وزیر خزانہ ءُ آمدنی سینیٹر محمد اورنگزیب ءَ گوشت کہ آمدنی ءِ تہ ءَ گیشی ءُ ناجائزیں تجارت ءِ ھلاپ ءَ جنگ ءِ واستہ موثر گامگیج کنگ بوھگ ءَ انت ءُ ٹیکس ءِ نظام ءَ انصاف، اقتصادی ءُ کارکردگی ءِ اصول آنی رژنائی ءَ گہتری کار کنگ بوھگ ءَ انت۔ آئی ءَ اے گپ جمعہ ءِ روچ ءَ لندن ءَ برٹش امریکن تمباکو ءِ مزنیں نمائندگاں گوں گند ءُ نند ءِ وھد ءَ کت، اودا آہاں ناجائزیں بیپاری، جعلی تمباکو ءِ چیز ءُ پاکستان ءَ استیں ایکسائز ڈیوٹی ءِ نظام ءِ اثرات ءِ بابت ءَ گپ ءُ تران کت۔ برٹش امریکن تمباکو ءِ نمائندگاں پاکستان ءِ تمباکو ءِ شوبگ ءَ اسمگلنگ ءُ جعلی چیز آنی گیش بوھوکیں چیلنج ءِ سر ءَ وتی جیڈھ آنی درشان کت۔ کمپنی ءَ اے گپ ءِ سر ءَ زور پر دات کہ ایکسائز ڈیوٹی ءِ مزنیں ءُ بے متوازنیں ڈھانچہ ءَ نا ارادہ ءَ ناجائزیں تجارت ءَ را دیم ءَ برتگ ءُ رسمی مارکیٹ آناں تاوان داتگ ءُ حکومت ءَ را مزنیں ٹیکس ءِ آمدنی ءَ چہ زبھر کتگ۔ آئی ءَ اے گپ ءِ سوج دات کہ یک معقول ءُ پیش گوئی ءِ ڈیوٹی ءِ نظام ءَ چہ ناجائزیں تجارت ءِ سرا بندش جنگ بوت کنت، صارفین ءَ را قانونی چینل آنی نیمگ ءَ رھادگ بوھگ ءِ ھاترا دلبڈی دیگ بوت کنت ءُ وھد ءِ گوزگ ءَ گوں حکومت ءِ واستہ گیش ٹیکس آمدنی پیداک کنگ بوت کنت۔ آئی ءَ زور پر دات کہ اے وڑیں فریم ورک ءَ چہ اے شوبگ ءَ را مین اسٹریم کنگ ءَ کمک رسیت، جائز کاروبار آناں دیمروئی دیگ ءُ موثر ریگولیٹری نگرانی ءَ را دل یکیمی کنگ بیت۔ وزیر خزانہ اورنگزیب ءَ اے جیڈھ ءَ را جائز جیڈھ لیک اتگ ءُ دل یکیمی داتگ کہ آیوکیں وفاقی بجٹ پیش کنگ ءِ وھد ءَ اے جیڈھ ءِ سر ءَ سنجیدگی ءَ گوں چار ءُ تپاسی کنگ بیت۔ آئی ءَ حکومت ءِ گیشیں عزم ءِ سر ءَ زور پر دات کہ ایشی ءِ تہ ءَ آمدنی ءَ را گیش کنگ، جتا جتائیں شوبگ آناں رسمی کنگ ءُ ناجائزیں تجارت ءِ ھلاپ ءَ جوانیں نفاذ ھوار اِنت۔ وزیر خزانہ ءَ اے گپ ءِ پدرائی کت کہ ٹیکس ءِ نظام ءِ تہا گہتری کار انصاف، کارکردگی، ءُ اقتصادی ھواری ءِ اصول آنی رد ءَ کنگ بوھگ ءَ انت۔ دیوان ءِ گڈسرا یک یکوئی ءِ سرپدی ءِ گوما بوت کہ پبلک ہیلتھ ءِ مول ءُ مراد ءُ مارکیٹ ءِ رسمی کنگ ءِ نیام ءَ توازن ءِ ھاتر ءَ المی انت ءُ پاکستان ءَ یک مھکم ءُ رھبندانی سر ءَ بنیات ءِ کاروباری چاگرد ءِ دیمروئی دوئیں فرانک آنی واستہ یکجائی اولویت انت۔
