اسلام آباد۔8مئی (اے پی پی):سینیٹر پرویز رشید ءَ راجی وردن ءُ وراک ءِ سلامتی ءُ پٹ ءُ پول ءِ وفاقی وزیر رانا تنویر حسین ءَ گوں گند ءُ نند کتگ ءُ پاکستان ءُ بھارت ءِ نیام ءَ کش ءُ چیل ءِ ھوالگ ءَ سرجمیں گپ ءُ تران بوتگ۔ وفاقی وزیر ءَ شپ ءِ تہاری ءَ بھارت ءِ نیمگ ءَ مریدکے ءِ یک مسیت ءِ سر ءَ اُرش ءَ را بزدلانہ کارروائی لیک اتگ ءُ گوشت کہ پاک فوج ءَ وھد ءِ سر ءَ گامگیج زورگ ءَ چہ جوانیں رنگ ءَ پسو داتگ۔ آئی ءَ اے گپ پدر کت کہ آیوکیں وھد ءَ اگاں بھارت ءِ نیمگ ءَ چہ کجام ھم بدمعاشی کنگ بہ بیت گڈا پاکستان انچیں پسو ءَ دنت کہ دگنیا ءَ را مدام یات بیت۔ وفاقی وزیر ءَ گوشت کہ مارا وتی قوت آنی سر ءَ پھر انت، مئے امن ءِ واھشت ءَ را مئے نزوری لیکگ مہ بیت۔ پاکستان ءَ وت ءَ را دفاع کنگ ءِ حق است انت ءُ ہر قیمت ءَ وتی سیمسر آنی ایمنی ءَ دل یکیمی کنت ۔ آئی ءَ گیش گوشت کہ مشکل ءِ اے ساھت ءَ سرجمیں راج پاک فوج ءِ گوما اوشتاتگ، وھدیکہ سیاسی ءُ جنگی سروکی ھم گامگیج ءَ انت۔ رانا تنویر حسین ءَ اے جزم ءِ پدا زور دات کہ ملک ءِ دفاع ءِ سر ءَ ھچ وڑیں سمجھوتہ کنگ نہ بیت ءُ سیم سر آنی رکھینگ ءِ واستہ ھرچ وڑیں گامگیج چست کنگ بیت۔ رانا تنویر حسین ءَ گوشت کہ پاک اُرد ءِ بہادری ءُ دفاعی صلاحیت آنی سر ءَ راج ءَ را پھر اِنت ءُ دژمن ءِ نیمگ ءَ ھرچ زوراکی ءِ سرجمیں زور ءَ گوں پسو دیگ بیت۔ آئی ءَ میاں اوستمانی براتی ءَ چہ لوٹ کتگ کہ آ بھارت ءِ بزدلیں کارروائی آنی سر ءَ نوٹس بہ زور اَنت۔ گند ءُ نند ءَ راجی سلامتی ءُ دفاع ءِ ھوالگ ءَ جتاجتائیں تک ءُ پھناتانی سر ءَ ھم گپ ءُ تران کنگ بوت۔
