اسلام آباد۔8مئی (اے پی پی): وفاقی وزیر ءِ ھال ءُ اھوال عطا اللہ تارڑ ءَ گوشت کہ پاک فضائیہ ءِ شاہیناں دژمن ءِ رافیل بالی گراب آنی سر ءَ تیر گواری کنگ ءَ چہ بھارت ءِ شان ءُ شان ھلاس کتگ۔ سرجمیں راج یک مُشت اِنت ءُ وتی سلاہ بندیں لشکر ءِ کش ءَ اوشتاتگ۔ ہندوستان ءَ سفارتی، فوجی ءُ بیانیہ جنگ ءَ شکست رستگ۔ دژمن ءِ نیت پروشتگ۔ پنچ شمبے ءِ روچ ءَ قومی اسمبلی ءَ پالیسی بیان ءِ دات کنان ءَ وفاقی وزیر ءِ اھوالکاری ءَ گوشت کہ پاکستان ءَ راج دوستی ءِ یک مزنیں درور جوڑ کنگ بوتگ، ایوان ءِ نیمگ ءَ چہ یکوئی ءُ تپاکی ءِ کلوہ دیم دیگ بوتگ، اپوزیشن ءِ سنگت آناں منت وار آں ءُ آوانی جذبہ ءَ را سلام پیش کناں۔ سرجمیں دُگنیا ءَ اے کلوہ سر بوتگ کہ پاکستانی راج یک مُشت اِنت ءُ وتی سلاہ بندیں اُرد ءِ ھمراھی ءَ اوشتاتگ۔ آئی ءَ گوشت کہ بزدلیں دژمن ءَ شپ ءِ تہاری ءَ اُرش کتگ۔ رافیل جیٹ کہ ہندوستان ءَ وتی سرا فخر کتگ ات، پاکستان ءِ فضائیہ ءِ شاہیناں تیر گواری کتگ ات ءُ دژمن ءِ تکبر ءَ چہ ہلاس کتگ ات۔ دژمن ءَ گوں ھما نیت ءُ جزم ءَ کہ آئی ءَ پاکستان چار اِتگ اَت، آئی ءَ شکست ءِ آماچ کنگی اَت۔ ھندی راج ءِ حوصلہ ھم نزور بوتگ۔ مئے شاہیناں ہندوستان ءِ شان ءُ شانت ھلاس کتگ، ما آھاں سلام پیش کنیں۔ آئی ءَ گْوشتگ کہ گوستگیں رند ءَ ھندوستان ءَ را “فینٹیسٹک ٹی” ءِ ورگ بوتگ، اے رندی دژمن شُتگ ءُ چائے ءِ “ہوم ڈیلیوری” کنگ لوٹ اِتگ۔ نوں ہندوستان ءَ وتی فضائی دمگ ءَ چہ ھلاس کنگ ءِ ھاترا بے پائلٹیں ڈروناں گوں اُرش بندات کتگ بلے ما 25 ھندی ڈرون ءِ سرا تیر گواری کتگ کہ لھتے نرمیں ٹکر ءُ لھتے گوں ھارڈ ٹکراں۔ اے مئے نوکیں فضائی دفاعی نظام ءِ سوبمندی اِنت۔ وفاقی وزیر ءَ گوشت کہ بھارتی میڈیا رافیل بالی گراب آنی ٹکر آناں پیش دارگ ءَ انت، اے مئے سوبمندی ءِ منگ انت۔ آ لوٹ اِتگ اَنت کہ اے گپ پوشیدہ بہ بیت بلے ملبہ پوشیدہ کنگ نہ بیت۔ نوں ہندوستان سد بہانہ کت کنت بلے دنیا ءَ دیستگ کہ پاکستان ءَ آہانی بالی گراب ایر جتگ انت۔ ہما ڈرون کہ ما ایر کتگ انت آ مئے “جنگی ٹرافی” انت کہ ما عجائب گھراں ایر کنیں ءُ وتی نسلاں گشیں کہ وہدے دژمن ءِ پائلٹاں بالی گرابانی پرواز کنگ ءَ انکار کت گڑا آہاں بے پائلٹیں ڈرون روان دیگ بندات کت کہ ایر کنگ بوتگ انت۔ روایتی جنگ ءِ تہا پاکستان ءِ برتری پدر بوتگ ۔ مئے سلاہ بندیں اُرد مدام تیار انت۔ لائن آف کنٹرول ءِ سرا پاکستانی لشکر ءَ نہ ایوک ءَ 40 تاں 50 ھندی سپاھیگ کُشتگ بلکیں دژمن ءِ بریگیڈ ءِ ھڈکوارٹر ھم تراک کتگ۔ بریگیڈ ءِ ہیڈ کوارٹر ءِ تراک کنگ مزنیں لشکری سوبمندی یے ۔ عطا اللہ تارڑ ءَ گوشت کہ بھارت ءَ شہری آبادی، زالبول ءُ زھگ آناں نشانگ جوڑ کتگ بلے پاکستان ءَ را لائکیں پسو داتگ۔ ما ایشانی بالی گراباں تیرگواری کت، فوجی تنصیبات ھلاس کت انت ءُ دژمن ءَ را فیصلہ کنوکیں تاوان دات۔ سرجمیں راج اے ساھت ءَ بیدار بوھگ ءَ ات ءُ ما مدام میان استمانی رسانکدر ءَ را راستی ءِ بابت ءَ سرپد کنگ ءَ اتیں۔ آئی ءَ انکشاف کتگ کہ وھدے بھارت ءِ نیمگ ءَ اسپیتیں بیرک چست کنگ بوتگ گڑا اے پاکستان ءِ سوبمندی بوتگ۔ دژمن ءِ حوصلہ ءِ جواب رستگ ات۔ وفاقی وزیر ءَ گوشت کہ بھارت ءَ سکھ کمیونٹی ءِ ھلاپ ءَ ھم گامگیج چست کتگ، تانکہ سکھ گردوارہ ءِ سر ءَ وتی ڈرون ایر کتگ۔ دگنیا ءِ دراھیں دمگاں چہ سکھ کمیونٹی ءَ اے گپ پدر کتگ کہ ھچ سکھ پاکستان ءِ ھلاپ ءَ جنگ نہ کنت۔ بھارت وتی اقلیتاں نشانگ جوڑ کنان ءَ ناپاکی ءِ مول ءُ مراداں سر کنگ لوٹیت بلے آئی ءِ ناپاکی ءِ ارادہ چہ دنیا ءَ پوشیدہ بوت نہ کنت۔ آئی ءَ گوشت کہ بھارت ءَ پلواما ءُ پہلگام ءِ وڑیں دروگیں پرچم آپریشن ءِ جواز پیش کنان ءَ پاکستان ءِ سر ءَ اُرش کنگ ءِ کوشست کتگ بلے نوں بیانیہ جنگ ءَ سرجم ءَ ناکام بوتگ۔ آ پہلگام ءِ وئیل ءِ دروگیں ذمہ واری ءَ پاکستان ءِ سر ءَ ایر کنگ ءِ بے سوبیں کوشست ءَ اِنت، اگاں چہ آئی ءِ گور ءَ ھچ وڑیں ثبوت نیست ءُ آ چہ پٹ ءُ پول ءَ ھم شُتگ۔ آئی ءَ گوشت کہ جموں ءُ کشمیر ءَ 9لکھ قبضہ گیریں فورس است انت، ایشی ءِ سر ءَ بھارت ءِ نیمگ ءَ چہ ناجائزیں رنگ ءَ قبضہ انت۔ جُست ایش اِنت کہ ھما ناشرکار کہ ھندوستان آیانی ملامت ءَ پاکستان ءِ سر ءَ ایر کنگ ءَ اِنت چوشیں مزنیں لشکر ءِ دیم ءَ ھما ناشرکار پہلگام ءَ چون سر بیتگ اَنت؟ آیا 900 ہزار سپاہی ایوک ءَ کشمیری مسلمانانی سرا ظلم ءُ زوراکی کنگ ءِ ھاترا تعینات کنگ بوتگ انت؟ وفاقی وزیر ئَ گوشت کہ پاکستان ئَ ناشرکاری ئِ ھلاپ ئَ جنگ ئَ مزنیں کرد ئِ پیلو کتگ، ما 90ہزار مردم ئِ جان قربان کتگ اَنت۔ مئے شہیدانی لڑ پہ ما شرپ انت۔ وھدے کہ بھارت ءَ شہری نشانگ جوڑ کت گڑا اے پی ایس ءِ یات زندگ بوت۔ ما اے گپ ءَ پدر کنیں کہ بھارتی جارحیت ءِ سرا ہر تک ءُ پھنات ءَ پسو دیگ بیت۔ عطا اللہ تارڑ ءَ گوشت کہ راجی سلامتی کمیٹی ءَ سلاہ بندیں اُرد ءَ را سرجمیں اختیار داتگ کہ آ بھارتی زوراکی ءِ لائکیں پسو ءَ بہ دنت۔ ہندوستان ءَ سرجمیں پسو دیگ بیت بلے ما وت فیصلہ کنیں کہ کدی ءُ چون۔ ہندوستان نہ فوجی محاذ ءِ سرا، نہ سفارتی پڑ ءَ، نہ بیانیہ جنگ ءِ تہا سوبمند بوت کنت۔ وفاقی وزیر ءِ اھوالکاری ءَ وتی گپ ءِ گڈسرا راج دوستی ءِ شعر ھم گشت۔
