اسلام آباد۔8مئی (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ بھارت ءَ ناشرکاری ءِ بنیاتی ڈھانچہ ءِ ھست بوھگ ءِ دروگیں بہانہ ءَ زانت ءُ زانگ ءَ سول دمگ نشانگ جوڑ کتگ اَنت ایشی ءِ آسر ءَ بے گناہیں مردین، زالبول ءُ زھگ شھید بوتگ اَنت۔ بے گناہیں جنین ءُ چُکاں ھوار شہریاں زانت ءُ زانگ ءَ نشانگ جوڑ کنگ یک زھرناکیں ءُ شرمندگیں جرمے ۔ اقوام متحدہ ءِ منشور ءِ آرٹیکل 51 ءِ رد ءَ پاکستان ءَ وتی ھک ھست کہ آ وتی ھب ءُ واھگ ءِ وھد ءُ جاہ ءَ ھندی زوراکی ءِ پسو ءَ بہ دنت۔ آئی ءَ اے ھیالانی درشانی اسلام آباد ءَ جاہ منندیں سفیر آناں بھارتی زوراکی ءِ ھوالگ ءَ بریفنگ کنان ءَ کت۔ نائب مزن وزیر ءَ گوشت کہ اے بریفنگ 6 ءُ 7 مئی ءِ نیام ءِ شپ ءَ کنگ بوھگ ءَ اِنت تانکہ بھارتی زوراکی ءِ ھوالگ ءَ پاکستان ءِ لیکہ آناں سر کنگ بہ بیت۔ آئی ءَ گوشت کہ بھارت ءَ پاکستان ءُ آزات کشمیر ءَ بازیں اُرش کتگ ایشانی تہ ءَ پاکستان ءِ وت واجہی لگتمال کنگ بوتگ ءُ دمگی امن ءُ ایمنی ءَ را ھترہ ءِ آماچ کتگ۔ نائب مزن وزیر ءَ گوشت کہ بھارت ءَ پاکستان ءِ وت واجہیں سرزمین ءِ تہ ءَ بازیں جاھانی سر ءَ میزائل، بالی ءُ ڈرون اُرش کتگ ایشانی تہ ءَ سیالکوٹ، شاکر گڑھ، مریدکے ءُ بہاولپور ھم ھوار اَنت۔ آزات کشمیر ءِ کوٹلی ءُ مظفر آباد ھم تاوان ءِ آماچ بوتگ۔ محمد اسحاق ڈار ءَ گوشت کہ اے بے سوب ءُ بے جاہیں اُرشاں ناشرکاری ءِ بنیاتی ڈھانچہ ءِ ھست بوھگ ءِ دروگیں بہانہ ءَ زانت ءُ سرپدی ءَ سول دمگ نشانگ جوڑ کتگ اَنت ءُ ایشی ءِ آسر ءَ بے گناہیں مردین، جنین ءُ زھگ شھید بوتگ اَنت ءُ تاں انوگ ءَ 26مردم بیران ءُ 46ٹپیگ بوھگ ءِ ھال شنگ بوتگ۔ نائب مزن وزیر ءَ گوشت کہ بے گناہیں زالبول ءُ زھگاں ھوار شہری مردم آناں زانت ءُ زانگ ءَ نشانگ جوڑ کنگ یک زھرناکیں ءُ شرمناکیں جرمے ۔ لھتے مسیت ھندی اُرشانی سوب ءَ شھید بوتگ اَنت یا تاوان رستگ اَنت۔ آئی ءَ گوشت کہ عبادت جاہ آنی سر ءَ اُرش ھاسیں رنگ ءَ ملامت کنوکیں کارے ۔ نائب مزن وزیر ءَ گوشت کہ بھارتی کارروائی ءَ چہ تجارتی بالی ٹریفک ءِ واستہ مزنیں ھترہ ءِ سبب جوڑ بوتگ، جہاز ءِ سر ءَ سواریں ھزاراں مسافر آنی جان ءَ را ھترہ ءِ تہ ءَ داتگ، چیاکہ بھارتی اُرش آنی وھد ءَ بازیں مسافر بالی گراب بالی گراب آنی تہ ءَ بوتگ اَنت۔ آئی ءَ گوشت کہ جتا جتا آزات کشمیر ءَ نیلم جہلم پن بجلی منصوبگ ءَ را ھمگرنچیں میاں اوستمانی کنونشنز ءِ ھلاپ ورزی ءَ نشانگ جوڑ کنگ بوتگ۔ اے کارروائی بھارت ءِ سندھ ءِ آپانی معاہدے ءِ مھتل کنگ ءِ پیسلہ ءُ پاکستان ءَ آپ ءِ روانی ءِ ھوالگ ءَ آئی ءِ برجاھیں بیانیہ ءِ رد ءَ ھاسیں ارزشتے داریت۔ پاکستان اے ناجائزیں کارروائیاں پاکستان ءِ وت واجہی ءُ سرزمین ءِ یکوئی ءِ پدریں لگتمالی ءِ رد ءَ مذمت کنت۔ آئی ءَ گوشت کہ میاں اوستمانی کانود ءِ رد ءَ بھارتی کارروائی ھاسیں رنگ ءَ جنگی کارروائی اَنت۔ نائب مزن وزیر ءَ گوشت کہ پاک فضائیہ وطن ءِ رکھینگ ءِ واستہ بھارتی جنگی جہاز آنی گوما وت مہ وتی ءِ کار ءَ گوں بندوک انت، وھدیکہ اے عمل ءِ تہ ءَ 5 بھارتی جنگی جہاز ءُ بے پائلٹیں بالی گراب (یو اے وی) ءِ سر ءَ تیر گواری کنگ بوتگ۔ آئی ءَ گوشت کہ بھارتی کارروائی اقوام متحدہ ءِ منشور، میاں اوستمانی کانود ءُ میاں اوستمانی سیادی ءِ جوڑ بوتگیں اصول آنی پدریں خلاف ورزی انت۔ اے گپ بے دروریں بدبھتی یے کہ ھندوستان ءِ بے پرواہیں رھبند ءَ دو ایٹمی سلاہ بندیں ملک مزنیں جیڑھے ءِ نزیک ءَ آؤرتگ اَنت۔ ہندوستان ءِ جنگی مونگرنگ دنیا ءِ ھاترا سنگینیں جیڑہ ءِ سوب جوڑ بہ بیت۔ نائب مزن وزیر ءُ وزیر ءِ درئی کار ءَ گوشت کہ جنوبی ایشیا دگنیا ءِ یک پنچمی بھر ءِ آبادی ءِ گس اِنت ءُ بھارت ءِ نیمگ ءَ کتگیں غیر ذمہ داریں کارروائی آناں برداشت کنگ نہ بیت۔ آئی ءَ گوشت کہ پہلگام ءِ اُرش ءِ پد ءَ بھارتی سروکی ءَ ناشرکاری ءِ فرضی بیانیہ ءَ را کارمرد کنان ءَ یک رندے پدا دمگی امن ءَ را ھترناک کتگ۔ آئی ءَ یک رندے پدا پہلگام ءِ اُرش ءَ گوں پاکستان ءَ ھمگرنچ کنگ ءِ ھرچ وڑیں کوشست رد کتگ ءُ گْوشتگ کہ ھندوستان ءَ پہلگام ءِ اُرش ءِ ذمہ واری پاکستان ءَ ایر کتگ ءُ ھچ وڑیں معتبریں شواہد ءُ معتبریں پٹ ءُ پول ءِ ھست نہ بوتگ۔ اپریل ءَ پاکستان ءِ مزن وزیر ءَ اے غمناکیں واقعہ ءِ سرا غیر جانبداریں پٹ ءُ پولکارانی نیمگ ءَ چہ شفاف ءُ آزاتیں پٹ ءُ پول ءِ تجویز داتگ۔ مرچیگیں روچ ءَ بھارت ءَ اے تعمیری تجویز ءِ سر ءَ باقاعدہ پسو نہ داتگ بلکیں ایشی ءِ بدل ءَ جنگ ءُ زوراکی ءِ راہ گچین کتگ۔ سینیٹر محمد اسحاق ڈار ءَ گوشت کہ ما ناشرکاری ءِ بنیاتی ڈھانچگ ءَ را نشانگ جوڑ کنگ ءِ بے بنیں بھارتی دعویٰ آناں گوں سدکی ءَ رد کن ایں ۔ آئی ءَ گوشت کہ پاکستان وتی سرڈگار ءِ سر ءَ ناشرکاری کیمپ آنی استی ءِ ھوالگ ءَ ھندی گپ آنی سر ءَ زور ءَ رد کنگ ءَ بوتگ۔ میان استمانی رسانکدر ءَ 6 مئی 2025 ءَ لھتیں نام نہاد ”ناشرکاریں کیمپ“ ءِ جاہ آنی تر ءُ تاب کتگ وھدے کہ 7 مئی ءَ ھمے وڑیں تر ءُ تاب ءِ منصوبگ بوتگ آئی ءَ گوشت کہ گوستگیں دو ھپتگ آنی تہ ءَ بازیں ملک آنی تہ ءَ تحمل ءِ لوٹ کنگ بوتگ، میاں اوستمانی ادارگ چوشکہ اقوام متحدہ ءُ اسلامی کمک ءِ گل ءَ اے گپ ءِ سر ءَ ھم شور ءُ سلاہ کتگ۔ اے لوٹاں گوش داشتگ۔ نائب مزن وزیر ءَ گوشت کہ گوستگیں دو ھپتگ آنی تہ ءَ مارا وتی میاں اوستمانی شریک آناں بھارت ءِ نا شریں ارادہ آنی بابت ءَ سرپد کنگ بوتگ۔ بھارتی کارروائیاں چہ اے گپ پدر بیت کہ مئے جیڑہ جائز بوتگ انت۔ پاکستان ءِ مزن وزیر ءَ راجی سلامتی کمیٹی ءِ دیوان ءِ سروکی ءَ کت۔ دیوان ءِ تہ ءَ اے گپ ءِ ھم جار جنگ بوت کہ اقوام متحدہ ءِ منشور ءِ آرٹیکل 51 ءِ رد ءَ پاکستان ءَ را وتی ھب ءُ واھگ ءِ وھد ءُ جاہ ءَ ھندی زوراکی ءِ پسو دیگ ءِ ھک ھست ءُ ما وتی وت واجہی ءُ سرزمین ءِ یکوئی ءِ رکھینگ ءَ گوں سرجمیں زور ءَ جزم ایں ۔ آئی ءَ گوشت کہ میاں اوستمانی براتی بھارت ءَ را وتی غیر ذمہ دارانہ، ناجائز ءُ جنگولی رویہ ءِ احتساب ءَ بہ کنت۔
