لاہور ۔ 08مئی (اے پی پی) پاکستان سیکورٹی فورس آک پنچ شنبے نا سہب لاہور بالی پٹ انا خڑک بھارتی ڈرون اس خلکربٹیر، ڈرون نا مرغنی کم و ود 5آن 6 فٹ پاننگ انگ ءِ و اودے سیم انا ایپار آن آپریٹ کننگاکہ، پولیس حوالی نا رداٹ ڈرون ءِ پاکستانی سیکورٹی فورس آک وخت آ درست کرسا سسٹم ءِ جام کرسا ڈغارآ بٹیر، ڈرون بے کچ حساس ہند آتا جاسوسی کن پاکستان آ گدریفنگاسس و اوٹی دھماکہ خیز مواد ہم ئس ہرا فتے دہشت گردی کن کاریم اٹ اتنگوئی ئس۔ پولیس حوالی پارے کہ ڈرون ہندن کہ اسہ اہم ءُ ماڑی سے نا خڑک آ سرمس تو اودے بِٹنگ نا کوشست اٹی شدید دھماکہ مس ولے ہچ ءُ جانی نسخان اس متو۔ پولیس کمامدارآک پاریر کہ واقعہ غان دمدستی پد کانود نافذ کروک آ ادارہ غاک علاقہ ءِ گھیڑ اٹی ہلسا مستی جاست وپاست نا بناءِ کرینو۔ ڈرون انا ساخت و اوٹی ساڑی مواد آتا جاچ ءِ ہلنگ انگ ءِ تانکہ بھارت نا کنڈآن گمانی خطرہ و مسخت آتے سمجھنگ مرے، کانود نافذ کروک آ ادارہ غاک وخت آ سرمرسا جاست وپاست اٹی لگوک ءُ ہرافتے ٹی دا پلو ہم اوار ءِ کہ آیا ڈرون فوجی مسخت آتیکن کاریم اٹ اتنگاکہ یا جاسوسی کن گدریفنگاسس۔ داکان بیدس پولیس حوالی نا رداٹ لاہور نا علاقہ والٹن، برکی روڈ و ڈیفنس اٹی شدید سم کاری و دھماکہ غاتا توار ءِ بِننگا ، داوخت آ سیکورٹی فورس آتا کنڈآن سائرن خلنگا ہرانا توار ءِ بِننگ تون مخلوق اُراتیان پیش تما، ریسکیو نا فائر فائٹنگ گاڈی تا واقعہ نا جاگہ غا سرمننگ آ شاریک سکھ انا ساہ اس ہلکر و پاکستان زندہ باد ، پاک فوج زندہ باد نا نعرہ خلکر۔
