اسلام آباد۔ 08مئی (اے پی پی) ڈپٹی چیئرمین سینیٹ سیدال خان پاک بھارت بے چیٹی حالیت آتیٹی پاکستان نا فوج انا وخت آ و جیرت مندانہ کارروائی تیا زبردست خراج تحسین پیش کرسا پارینے کہ بھارتی جارحیت نا ہرا بہادری و مہارت اٹ ورندی ءِ تننگا، او عسکری تاریخ اٹی اسہ درور اسے ۔ پنچ شنبے نادے آ اسہ بیان اسے ٹی اوپیدوار کرے کہ پاکستان تینا گل زمین، وتواجہی و سالمیت نا رکھ اکن ہرممکن گام گیج کیک، و دشمن نا ہرجارحانہ گام انا پبی ورندی ءِ تننگک۔ اوپارے کہ بھارتی فضائی دنگ انا خلاف ورزی آ پاکستان نا فوج انا دمدستی و کسبی کارروائی گمر نا قابل ءِ، ہراڑآ مچ آ قوم ناز کیک۔ ڈپٹی چیئرمین سینیٹ پارے کہ داسہ بھارت ءِ ہرمہم جوئی آن مست سد وار سجفوئی مریک، انتئے کہ پاکستان نا فوج و مچ آ قوم دشمن نا ناپاک عزم انا برخلاف اسہ پنہ غاٹی ءُ۔ اودوٹوک لوز آتیٹی پارے کہ پین وخت اس دشمن ءِ ہندن ءُ کاری ضرب اس خلنگک ہرااونا تصور آن پیشن مریک۔ اوپارے کہ پاکستانی سلہہ بند فوج بھارتی ڈرون جلہو آتے بے سہب کننگ تون اوار اوار اوفتے بھس کرسا داپک کرینے کہ پاکستان نا ڈغاری، فضائی و بحری فوج ہروڑنا جارحیت نا گچین ورندی ءِ تننگ نا پورو لائخی تخرہ۔ ڈپٹی چیئرمین سینیٹ بھارتی حکومت ، خاص وڑاٹ مودی سرکار ءِ تنبیہ کرساپارے کہ او تینا انتہاپسندانہ پالیسی تا نظرثانی کے و ڈیہہ اٹی امن کن اقلیت و ہمسایہ ملک آتون صلہ رحمی و پرامن رویہ اس اختیار کروئی مریک ۔ اوپارے کہ بھارت نا جنگوڑوی سوچ اودے جہانی کہول آ شرمندگی تون مون ترفینے۔ سیدال خان جہانی برادری نا کنڈآن پاکستان نا موقف نا مخ تفی ءِ ستاکڑزوک گوندسا داعزم انا درشانی ءِ کرے کہ پاکستان آخبت ہم ڈیہہ اٹی امن، وتواجہی و سالمیت نا رکھ اکن تینا کڑد ءِ ادا کرسا کیک۔
