مکار دشمن ءِ پبی ورندی تننگ و بھارتی جہاز آتے شست کننگ آ پاک فوج انا آفیسر و ورناتے خراج تحسین پیش کینہ، پاکستان پیپلزپارٹی بلوچستان نا مرکزی راہشون سردار بلند جوگیزئی

کوئٹہ۔ 08مئی (اے پی پی) پاکستان پیپلزپارٹی بلوچستان نا مرکزی راہشون سردار بلند جوگیزئی بھارت نا پاکستان آ جلہو اٹی چنا، زالبول آتون اوار 24 بندغ آتا شہیدی و چندی بندغ آتا ٹھپی مننگ نا مذمت ءِ کرسا پارے کہ پاک فوج ورندی کارروائی ٹی بھارت نا ملٹری تنصیب آتے وخت آ شست کرسا اودے جنگی جنون ءِ مش تا کرینے، مکار دشمن ءِ پبی ورندی تننگ و بھارتی جہاز آتے شست کننگ آ پاک فوج انا آفیسر و ورناتے خراج تحسین پیش کینہ۔ داڑے جاری مروک اسہ بیان اسے ٹی سردار سربلند جوگیزئی پارے کہ مکار دشمن نن نا تہاری ٹی پاکستان نا شاری آبادی آ جلہو کرے ہراٹی بے گناہ و کودک شاریک شہید مسر پاک فوج و پاک فضائیہ وخت آکارروائی کرسا بھارت نا ملٹری تنصیب و بھارتی جہاز آتے شست کرے و بھارت نا جنگی جنون ءِ مش تا کننگ آ پاکستان نا فوج انا جیرت و مستعدی ستاکڑزک۔ اوپارے کہ پاک فوج ملک انا دفاع ءِ کننگ ءِ جوان وڑاٹ چاہک ہرانا پیدوار شاہدی پاک فوج انا وخت آ کارروائی کرسا بھارت ءِ بھلو جانی و مالی نسخان اس تننگ ءِ۔ اوپارے کہ اقوام متحدہ و جہانی ادارہ غاک بھارت نا جارحیت نا دمدستی نوٹس ءِ ہلیر۔ اوپارے کہ پاکستان نا الس تینا ملک انا دفاع کن پاک فوج اتون ہم کوپہ سلوک ءُ و ہروڑنا قربانی ایترہ۔ اوپارے کہ پاک فوج بھارت نا جلہو آتا ورندی ٹی وخت آکارروائی کرسا داپک کرینے کہ پاک فوج ملک انا دفاع کن ہروخت تیارءِ۔