اسلام آباد۔ 08مئی (اے پی پی) گورنر خیبرپختونخوا فیصل کریم کنڈی تون بنجائی وزیر پیٹرولیم علی پرویز ملک اوڑدہی کرے، اوڑدہی ٹی صوبہ ٹی تیل و گیس انا پیدوار، اُرائی و صنعتی صارف آتے گیس انا فراوانی، و ایلو اہم امور تیا سرجمی اٹ گپ وتران کننگا۔ پنچ شنبے نادے آ گورنر ہاؤس آن جاری بیان نا رداٹ داوخت آ خیبرپختونخوا اسمبلی نا باسک احمد کریم کنڈی، وائس چیئرمین انجمن ہلال احمر خیبرپختونخوا فرزند وزیرئسک ہم ساڑی ئسر۔ اوڑدہی ٹی گورنر خیبرپختونخوا ہ بنجائی وزیر ءِ ضلع ڈیرہ اسماعیل خان نا علاقہ کوٹ پالک اٹی ساڑی آ تیل و گیس انا خننگ نا بابت پارے کہ کوٹ پالک نا گیس کوڑی تیان ہندا علاقہ نا ہندی آبادی ءِ مفت گیس انا فراوانی تون اوار تحصیل ہیڈکوارٹردرابن و ڈی آئی خان شار ءِ ضلع کرک نا وڑآ پوسکن ءُ گیس کنکشن فراوان کننگے، تانکہ ہندی آبادی تینا علاقہ نا قدرتی وسیلہ غاتیان براہ راست فائدہ ہرفنگ کیر۔ گورنر خیبرپختونخوا بنجائی وزیر پیٹرولیم تون ڈی آئی خان شار اٹی گیس انا کم زور انا ویل ءِ ہم تالان کرے و سلاہ تس کہ شار اٹی پین پوسکن ٹاؤن بورڈنگ سٹیشن (ٹی بی ایس) نا تنصیب خلنگے تانکہ گیس پریشر نا ویل آخبتی بنداو تیا ایسر مننگ کے۔ گورنر پشاور تون اوار صوبہ نا ایلو صنعتی ہند آتیٹی صنعت کار آتا گڑتیان ہم بنجائی وزیر ءِ معلومدار کرے۔ اوپارے کہ پشاور نا صنعتی بشخ انا گیس ٹیرف اٹی کمتی و جوان نرخ مقرر کننگے تانکہ صوبہ ٹی صنعت ءِ مون آ دننگے، ہرانا براہ راست فائدہ ملکی زرگزران ءِ ہم مریک۔ بنجائی وزیر پیٹرولیم پرویز ملک گورنر خیبرپختونخوا نا سلاہ تیان امنا کرسا باوری کرفے کہ دا سفارشات آتیا عملدرآمد کن المی گام گیج کننگک۔
