اسلام آباد۔ 07 مئی (اے پی پی) وزیراعظم محمد شہباز شریف پارینے کہ پاکستان نا وتواجہی و علاقائی سالمیت آ بھارت بزدلانہ جلہو کرے ہراٹی بے گناہ 26نرینہ، زالبول و چناشہید مسر، و منہ مسیت آتے نسخان رسینگا، پاکستان ڈیہہ اٹی امن نا خواہندار ءِ، ولے تینا وتواجہی و علاقائی سالمیت نا پورو جانفشانی و طاقت اٹ دفاع ءِ کیک، دامشکل وخت اٹی پاکستان تون یکجہتی و مخ تفی آ قطر انا منت واری ءِ ہرفنہ۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف ءِ قطر انا وزیراعظم و وزیرخارجہ امور محمد بن عبدالرحمان بن جاسم بن جابر الثانی نا ٹیل فون کال موصول مس۔ دامشکل وخت اٹی پاکستان تون یکجہتی و مخ تفی آ قطرانا منت واری ءِ ہرفسا وزیراعظم شہباز شریف بھارت نا کنڈآن پاکستان اٹ شش ہند آتیامیزائل جلہو آتے بلااشتعال کارروائی گوندسا اونا ترندی اٹ مذمت ءِ کرے۔ اوپارے کہ بھارت پاکستان نا وتواجہی و علاقائی سالمیت آ بزدلانہ جلہو کرے ہراٹی بے گناہ 26 نرینہ، زالبول و چناشہید مسر و منہ مسیت آتے نسخان رسینگا۔ اوپارے کہ بھارت نا داجارحانہ کارروائی سویلی ایشیاٹی امن و سوگوی ءِ نسخان رسینگانے۔ وزیراعظم پارے کہ ہراڑے پاکستان ڈیہہ اٹی امن نا خواہندار ءِ ہموڑے پاکستان تینا وتواجہی و علاقائی سالمیت نا پورو جانفشانی و طاقت اٹ دفاع ءِ کیک۔ وزیراعظم پارے کہ پہلگام واقعہ غان پد او بھارت نا دوبہ غاتا بے کنڈ ہلوک و شفاف جہانی جاست وپاست نا پیش کش کریسس۔ اوپارے کہ ننے خوشی مسکہ اگہ قطر دا کوشست آتیٹی اوار مسکہ ولے بھارت جارحیت نا خطرناک کسرءِ گچین کرے ہراڑآن اونا غیرزموارانہ ریاستی رویہ نا درشانی مریک ہراڑآن ڈیہہ اٹی امن نا حالیت خراب مس۔ قطر انا وزیراعظم نہادی جون تا زیان آ است ہسونی نا درشانی ءِ کرے۔ اوسویلی ایشیاٹی امن کن پاکستان نا عزم انا ستاءِ کرساپارے کہ قطر ڈیہہ اٹی ساڑی بے چیٹی ءِ کم کننگ کن تینا کڑد ءِ ادا کننگ خواہک۔
