راولپنڈی۔ 07مئی (اے پی پی) ڈی جی آئی ایس پی آر لیفٹیننٹ جنرل احمد شریف چوہدری پارینے کہ 6و7مئی نا نیامی نن بھارتی فوج انا کنڈآن 6 جتا ہند آتیا میزائل جلہو آتیٹی 26 پاکستانی شاری شہید و 46ٹھپی مسر۔ چارشنبے نادے آ پریس حوال اٹی ڈی جی آئی ایس پی آرپارے کہ بھارت لائن آف کنٹرول (ایل او سی) نا پار لغورجلہو کرے و دانستہ وڑاٹ شاری آبادی و عبادت گاہ تے شست کرے۔ دا جلہو آتے نن نا تہاری ٹی کننگا ہرافتا مرکز زیات تر مسیت و ہنکینی علاقہ غاک ئسر، ہرامودی حکومت نا انتہاپسندانہ ذہنیت ءِ پاش کیک۔ اوپارے کہ ایل او سی آ شدید بھارتی گولہ باری ٹی پین 5 بندغ شہید مسر ہرافتے ٹی اسہ پنچ سال انا چناس ہم اوار ءِ۔ پاکستان نا سلہہ بند فوج بھارتی جارحیت نا دمدستی و گچین ورندی ءِ تس۔ اوپارے کہ آزاد کشمیر نا ہمو علاقہ غاک ہرافتے شست کننگا، اوفتا زوت آتے اٹ جہانی میڈیا دورہ ءِ کریسس و بھارتی پروپیگنڈا ءِ بے نقاب کریسس۔ ہندا علاقہ غاتیا جلہو اصل اٹ تینا دروغ بیانیہ ءِ طاقت نا کمک اٹ سہی ثابت کننگ نا بے سہب کوشست ءِ۔ ڈی جی آئی ایس پی آر پارے کہ پاک فوج بھارتی جارحیت نا پبی ورندی ءِ تس و ’’چندی ‘‘ بھارتی چیک پوسٹ آتے بھس کرے۔ داوخت آ اسہ بریگیڈہیڈکوارٹرنا وڈیو اس ہم نشان تننگا ہراکان بھارت سیز فائر نا خلاف ورزی کریسس۔ چٹہری، جورہ و سرلیا۔1نا چیک پوسٹ آتون اوار اسہ یونٹ بٹالین ہیڈکوارٹرءِ ہم شست کننگا۔ ڈی جی آئی ایس پی آر پک کرے کہ پاک فضائیہ(پی اے ایف) بھارتی فضائی جلہو نا کوشست نا ورندی ٹی 5 بھارتی جنگی جہاز و اسہ ڈرون اسے خلک بٹے۔ بھس مروک جہاز آتیٹی 3 رافیل، اسہ مگ۔29، اسہ ایس یو۔30 و اسہ اسرائیلی ساختہ ہیرون ڈرون اس اوار ءِ۔ اوپارے کہ پی اے ایف خوائسکہ تو 10 آن زیات بھارتی جہاز آتے بِٹنگ کریکہ، ولے بالغ نظری و سٹریٹجک ضبط و تحمل نا درشانی ءِ کننگا۔ اونا پاننگ ئس کہ ہچ ءُ پاکستانی جہاز اس بھارتی فضائی دنگ اٹ پترینگ تنے و اسہ بھارتی جہاز اسے ہم ننا دنگ اٹ پترینگ انگ نا موکل تننگتو۔ اوپارے کہ پاک فضائیہ نا غٹ میرات بشمول جنگی جہاز و تنصیب آک پورووڑاٹ رکھ و فعال ءُ۔ ڈی جی آئی ایس پی آر پیدوار کرے کہ پاکستان نا ورندی پورووڑاٹ دفاعی ئس و ہمووخت آ تننگا ہراتم بھارتی جہا زآک پاکستانی فضائی دنگ انا خلاف ورزی نا کوشست کریر۔ اوپارے کہ بھارت نیلم جہلم ہائیڈرو پاور پروجیکٹ نا خڑک نہہ شاری ڈیم ءِ ہم شست کرے ہراڑآن اہم انفراسٹرکچر ءِ نسخان رسینگا و ہزار آ شاری تا جون خطرہ ٹی تما۔ اوپارے کہ آبی کوڑی تے شست کننگ نئے بیرہ جہانی کانود نا خلاف ورزی ءِ بلکن اسہ انسانی المیہ اس ہم ودی کننگ کیک۔ ڈی جی آئی ایس پی آر نا رداٹ جلہو نا وخت پاکستان نا فضائی دنگ اٹ 57 جہانی جہاز ساڑی ئسر ہرافتے ٹی ہزار آ مسافر سفر کریرہ۔ داوڑنا گام گیج آک عسکری ڈٹ بندی نا انتہاپسندانہ و غیردانشمندانہ سوچ انا عکاسی ءِ کیرہ، ہراٹی انسانی جون، جہانی کانود و ہوابازی نا ضابطہ غاتا ہچ ءُ پرواہ اس کننگتو۔ اوخبڑدار کرے کہ پاکستان تینا وتواجہی نا دفاع نا پورو حق تخک و ہرجارحیت نا فیصلہ کن ورندی ءِ تننگک۔ ڈی جی آئی ایس پی آر جہانی برادری خاص وڑاٹ ہوابازی و آبی حق انا جہانی تنظیم تیان خواست کرے کہ او بھارت نا دااشتعال انگیزی نا دمدستی نوٹس ءِ ہلیر، ہرا علاقائی امن و شاری تا سلامتی کن بھلو خطرہ اسے۔
