اسلام آباد۔07مئی (اے پی پی) قومی سلامتی کمیٹی بھارت نا بے خار، لغور وغیرکانودی جنگی گام ءِ پاکستان نا وتواجہی و علاقائی سالمیت نا خلاف ورزی گوندسا داعزم انا درشانی ءِ کرینے کہ پاکستان تینا دفاع ٹی کودک جون تا زیان و اونا وتواجہی نا پاش آن پاش خلاف ورزی نا بدلہ ءِ ہلنگ کن تینا منشانا وخت، ہند و اندا ز اٹ ورندی تننگ نا حق تخک۔ پاکستان نا سلہہ بند فوج بھارتی جارحیت نا برخلاف تینا علاقائی سالمیت نا سنبرینگوک وڑاٹ دفاع ءِ کرے۔ قوم ہر جارحیت نا مقابلہ ءِ کننگ کن سنبرینگوک ءِ۔ جہانی برادری بھارت نا بے خار، غیرکانودی گام گیج آتا سنگینی نا درک ءِ خلسا اودے جہانی اصول و کانود آتا خلاف ورزی کن جوابدہ گوندے۔ پاکستان وقار و شرف اٹ امن کن سنبرینگوک ءِ ولے وخت اس ہم تینا وتواجہی ، علاقائی سالمیت نا خلاف ورزی نا موکل تفک۔ قومی سلامتی کمیٹی (این ایس سی) نا دیوان وزیراعظم محمد شہباز شریف نا کماشی ٹی اڈہلک۔ دیوان اٹی بھارتی جارحیت اٹی شہید مروک آ کودک شاری تا روح انا ثواب کن دعاپاتیاکننگا، شہید آتا خاہوت آتون ہڑزخواہی نا درشانی و ٹھپی مروک آتا زوت دراخ جوڑی کن دعاکننگا۔ وزیراعظم آفس نا میڈیا نا کنڈآن چارشنبے نادے آ جاری بیان نا رداٹ این ایس سی بھارت نا بے خار، لغور و جنگ انا غیرکانودی گام آن ودی مروک آ حالیت آتیا سجفے۔ بیان اٹی پاننگاکہ 7/6مئی 2025نا نن آ بھارت نا سلہہ بند فوج پاکستان نا وتواجہ گل زمین نا تہہ ٹی چندی ہند آتیا مربوط میزائل، فضائی و ڈرون جلہو کرے، ہرافتے ٹی پنجاب اٹی سیالکوٹ، شکرگڑھ، مرید کے و بہاولپور، آزاد کشمیر اٹی کوٹلی و مظفرآباد اوار ءُ۔ دا بے خار و بے سوب جلہو آتیٹی خیالی دہشت گرد کیمپ آتا ساڑی گری نا دروغ بہانہ جوڑ کرسا رزاک اٹ شاری علاقہ غاتے شست کننگا، ہراٹی بے گناہ نرینہ و نیاڑی و چناک شہید مسر و مسیت آتون اوار شاری انفراسٹرکچر ءِ نسخان رسینگا۔ بھارت نا جارحانہ عمل آن ایلم خلیجی ملک آتیان تعلق تخوک آ کمرشل ایئرلائنز ءِ ہم بھاز خطرہ مون تروک مس، ہراڑآن جہاز اٹی ساڑی ہزار آ مسافر آتا زند خطرہ ٹی تما۔ داکان بیدس نیلم جہلم ہائیڈرو پاور پروجیکٹ ءِ ہم جہانی کنونشن تا خلاف ورزی کرسا رزاک اٹ شست کننگا۔ قومی سلامتی کمیٹی پیدوار وڑاٹ دا غیرکانودی کارروائی، ہرا جہانی کانود نا رداٹ جنگی کارروائی تا زمرہ ٹی بریک ، ءِ پاکستان نا وتواجہی و علاقائی سالمیت نا خلاف ورزی گوندسامذمت ءِ کرے۔ بیان نا رداٹ بھارتی فوج انا کنڈآن کودک زالبول و چناتتون اوار لس شاری تے رزاک اٹ شست کننگ اسہ گندہ و شرمناک ڈوہ اسے ہرا انسانی قدر و اصول و جہانی کانود آتیان چپ ءِ۔ بیان اٹی پاننگانے کہ پاکستان تینا گل زمین آ دہشت گرد کیمپ آتا ساڑی گری نا دعویٰ تا بابت بھارتی دوبہ غاتے سختی اٹ مسترد کرسا بسنے۔ داہم یات سلے کہ 22اپریل 2025آن دمدستی پد پاکستان پت انا قابل، شفاف و بے کنڈہلوک جاست وپاست نا مخلصانہ پیشکش کرے ہرادے بدبختی اٹ امنا کننگتو۔ جہانی میڈیا نا نمائندہ غاک مہالوآن 6مئی 2025آ دا’’خیالی دہشت گردی نا کیمپ‘‘ آتا دورہ ءِ کریسس و 7مئی آ پین دورہ کروئی ئسک ولے تینا دروغ انا بے نقاب مننگ نا گڑتی نا رداٹ و تینا دعویٰ تا بارواٹی شاہدی آن بیدس اخلاقیات آن چپ بھارتی سرکڑدہ تینا فریب زدہ خیالات و تنگ نظری آ تالان سیاسی مسخت آتا تسکین کن کودک شاری تیا جلہو کننگ نا حداسکان ہنانے۔ پاکستان کن تینا کودک شاری تیاجلہو ناقابل سگ و ناقابل قبول ءِ۔ بھارت اسہ وار ولدا غٹ تر ہوشمندی تے ایڑتر تخسا ڈیہہ اٹی خاخر لگفینے، ہراٹی مروک آ نتیجہ غاتا غٹ تر زمواری پورو وڑاٹ بھارت آ بیٹ مریک۔ بیان نا رداٹ پاکستان نا سلہہ بند فوج، 22 اپریل 2025آ این ایس سی نا کنڈآن جاری کروک بیان نا رداٹ حق دفاع و ردعمل نا فریم ورک نا رداٹ، بھارتی جارحیت نا برخلاف آزاد جموں وکشمیر تون اوار پاکستان نا علاقائی سالمیت نا سنبرینگوک وڑاٹ دفاع ءِ کرسا پنچ بھارتی جنگی جہاز و ’’یواے ویز‘‘ ءِ خلک بٹے۔ بیان اٹی پاننگانے کہ اقوام متحدہ نا چارٹر نا آرٹیکل 51 نا رداٹ، پاکستان تینا دفاع ٹی ، تینا کودک شاری تا جون و تینا وتواجہی نا پاش آن پاش خلاف ورزی نا بدلہ ءِ ہلنگ کن تینا منشاء نا وخت، ہند و انداز اٹ ورندی تننگ نا حق تخک۔ پاکستان نا سلہہ بند فوج ءِ دارداٹ بریبرنا گام گیج کننگ نا باضابطہ اختیار تننگانے۔ بیان اٹی پاننگانے کہ بھارت نا ننگی جارحیت آ شدید غم و غصہ نا گواچی مچ آپاکستانی قوم سلہہ بند فوج انا بہادری، جیرت و لمہ وطن نا دفاع اٹی وخت آ کارروائی نا بھاز ستاءِ کیک۔ قوم پین ہرجارحیت نا مقابلہ ءِ کننگ کن سنبرینگوک وتیار ءِ۔ این ایس سی جہانی برادری آن خواست کرے کہ او بھارت نا بے خار غیرکانودی گام گیج آتا سنگینی نا احساس ءِ کرسا اودے جہانی کانود و اصول آتا خلاف ورزی کن جوابدہ کے۔ بیان اٹی پاننگانے کہ پاکستان عزت و وقار اتون امن کن پدریسہ سنبرینگوک ءِ و درشانی ءِ کیک کہ او وخت اس ہم تینا وتواجہی و علاقائی سالمیت نا خلاف ورزی نا موکل تفک و نئے تینا گمرنا قابل الس ءِ نسخان اس تننگ کن اِلک۔
