اسلام آباد۔7مئی (اے پی پی):راجی اسمبلی ءِ اسپیکر سردار ایاز صادق ءَ بھارت ءِ نیمگ ءَ پاکستان ءِ سر ءَ اُرش ءِ سک مذمت کتگ ءُ گْوشتگ کہ شپ ءِ تہاری ءَ بھارت ءِ اُرش بے دروریں بزدلی ئیں کارے ۔ چار شمبے ءِ روچ ءَ وتی مذمت ءِ گشتانک ءِ تہ ءَ آئی ءَ گوشت کہ بھارت ءَ شہری آبادی ءِ سر ءَ اُرش کنان ءَ میاں اوستمانی کانود ءِ بے دروریں ھلاپ ورزی کتگ۔ پاکستان ءِ سلاہ بندیں اُرد ءَ دژمن ءِ بزدلیں اُرش ءِ لائکیں پسو داتگ۔ ھاسیں راجی اسمبلی ءَ پاک سلاہ بندیں اُرد ءَ را ھندی زوراکی ءِ لائکیں پسو دیگ ءِ پد ءَ شگر ءُ منت پیش کت ءُ گوشت کہ پاک سلاہ بندیں اُرد دژمن ءِ زوراکی ءِ سرجمیں زور ءَ گوں پسہ دیگ ءَ انت۔ ہندوستان ءَ زوراکی بندات کتگ ءُ پاکستان ءِ صبر ءِ چکاس ءَ کنگ ءَ اِنت۔ بزدلیں دژمن ءَ حملہ ءِ زالمیں آسراں برداشت کنگی اِنت۔ سرجمیں راج چو سنگے ءَ پاکستانی لشکر ءِ ھمراھی ءَ اوشتاتگ۔ 240ملین مردم ہندوستان ءِ ھلاپ ءَ مسلط جنگ ءَ جنگ کن اَنت۔ پاکستانی فضائیہ ءَ دژمن ءِ سرا زبردستیں پسو داتگ۔ قوم ءُ پوج ءِ مورال بُرز اِنت، دژمن بے سوب بیت۔ بھارت ءَ پاکستان ءِ امن ءِ واھشت ءَ را نزوری لیک اِتگ، بھارت ءَ را سکیں گرانیں آسراتی ءِ دیمپانی کنگی اِنت۔ سرجمیں راج پاکستانی لشکر ءِ سوبمندی ءِ واستہ دعا لوٹ ایت۔
