اسلام آباد۔7مئی (اے پی پی):منصوبگ بندی، دیمروئی، اصلاحات ءُ ھاسیں گامگیج آنی وفاقی وزیر پروفیسر احسن اقبال ءَ بھارت ءِ نیمگ ءَ پاکستان ءِ سر ءَ گوستگیں روچاں بوتگیں زوراکی ءَ را سک باز مذمت کتگ۔ آئی ءَ گوشت کہ اے گامگیج یک مزنیں اشتعال انگیزی یے، پاکستان ءِ وت واجہی ءِ لگتمالی اِنت کہ میاں اوستمانی کانود ءُ اقوام متحدہ ءِ منشور ءِ پدریں لگتمالی اِنت۔ پروفیسر احسن اقبال ءَ گشتگ کہ زالبول ءُ یک بے گناہیں زھگے ءَ ھوار بے گناھیں شہری آنی بے وسی ءَ کُشگ نا بخششیں جرم اِنت۔ اے ظلم ءُ بربریت ءَ ہچ وڑیں جاوراں یلہ دیگ نہ بیت۔ آئی ءَ گیش گوشت کہ پاکستان ءَ را وتی مہلوک ءُ دمگی ایمنی ءِ رکھینگ ءِ واستہ ٹھینگیں گامگیج کنگ ءِ ھمک رنگ ءِ ھک است انت۔ مئے کرّا اے توانائی ءُ جزم است کہ ما ہرچ وڑیں زوراکی ءِ سرا موزوںیں پسو یے بہ دئیں۔ وفاقی وزیر ءَ میاں اوستمانی براتی، اقوام متحدہ، انسانی حقانی گل ءُ جھان ءِ امن ءِ حمایت کنوکاں چہ اپیل کت کہ آ بھارت ءِ اے ناجائزیں گامگیج ءِ نوٹس ءَ بہ زور اَنت ءُ جنوبی ایشیا ءَ امن ءُ ایمنی ءِ رکھینگ ءِ واستہ وتی کرد ءَ پیلو بہ کن اَنت۔
