اسلام آباد۔ 07مئی (اے پی پی) پاکستان بھارتی جارحیت نا ترندی اٹ مذمت ءِ کرسا پارینے کہ جنگ انا اسہ بلااشتعال و کارروائی ٹی بھارتی فضائیہ تینا فضائی دنگ اٹ رہینگسا جہانی سیم آن ایپار شاری آبادی ءِ شست کرسا و سٹینڈ آف سلہہ غاتے کاریم اٹ اتسا پاکستان نا وتواجہی نا خلاف ورزی کرے، مرید کے و بلاولپور اٹی جہانی سیم و کوٹلی و مظفرآباد آزاد جموں وکشمیر اٹی لائن آف کنٹرول آن ایپار شاری آبادی ءِ شست کننگا۔ ترجمان دفترخارجہ نا کنڈآن جاری بیان نا رداٹ بھارت نا جارحیت اٹی زالبول و چناتتون اوار شاریک شہید مسنو۔ جارحیت نا داعمل آن واپاری فضائی ٹریفک ءِ ہم بھاز خطرہ مون تروک مسنے۔ بیان اٹی پاننگانے کہ نن بھارت نا لغورانگا گام گیج آتا ترندی اٹ مذمت ءِ کینہ ہرااقوام متحدہ نا چارٹر، جہانی کانود و بین ریاستی تعلقداری نا جوڑ کروک اصول آتا پاش آن پاش خلاف ورزی ءِ۔ بیان نارداٹ پہلگام واقعہ نا رداٹ بھارتی سرکڑدہ غاک اسہ وار ولدا دہشت گردی نا بونگی ءِ کاریم اٹ اتسا تینا مظلومیت نا شرمناک داستان ءِ مون آ دریر ہراڑآن علاقائی امن و سلامتی ءِ خطرہ ءِ، بھارت نا لاپرواہی آن اِرا ایٹمی ریاست اسہ بھلو جھیڑہ سے نا خڑک آ سرمسنو، بدل مروک آ حالیت آتیٹی پاکستان اقوام متحدہ نا چارٹر نا آرٹیکل 51 نا رداٹ و جہانی کانود نا رداٹ تینا پسند نا وخت وجاگہ غا جوان ورندی ءِ تننگ نا حق تخک۔ بیان نا رداٹ پاکستان نا حکومت، سلہہ بند فوج و الس بھارتی جارحیت نا برخلاف یکجاءُ، پاکستان نا وتواجہی و علاقائی سالمیت نا رکھ اکن مدام آہنی عزم اتون کاریم کینہ۔
