اسلام آباد ۔ 07مئی (اے پی پی) بنجائی وزیر حوالکاری و شینکاری عطاء اللہ تارڑ پارینے کہ بھارت پاکستان نا تہہ ٹی جلہو کرسا لغوری نا درشانی ءِ کرے، پاکستان نا گچین و فیصلہ کن ورندی کارروائی آن پد بھارت لائن آف کنٹرول آ پیہن آ بیرک ءِ چست کرسا تینا شکست ءِ امنا کرینے، بھارت جاست و پاست آن مدام نرسا کرینے، اینو ہم جلہو کننگ کن بس تو ولدا نرا۔ چارشنبے نادے آ داڑے میڈیا تون گپ وتران کرسا بنجائی وزیر حوالکاری پارے کہ بھارت نن نا تہاری ٹی کودک شاری، زالبول، چناو مسیت آتے شست کرے ہرا جنگی اخلاقیات نا پاش آن پاش خلاف ورزی ءِ۔ اوپارے کہ پاکستان بھارتی جارحیت نا کیہی ہنداخہ زیات ورندی ءِ تس، دشمن نا پنچ جنگی جہاز و اسہ ڈرون اسے خلک بِٹے وخت اس کہ لائن آف کنٹرول آ چندی بھارتی پوسٹ آتے بھس کننگا۔ عطاءاللہ تارڑ پارے کہ اینو بھارتی میڈیا ہم تینا شکست ءِ امنا کرسا بِٹنگوک آ جہاز آتا ملبہ غاتے نشان تس، ننا فوج دشمن نا دنگ انا تہہ ٹی کارروائی کرے۔ بنجائی وزیر حوالکاری پارے کہ ننا بہادر فوج دلیری اٹ حالیت آتا مقابلہ ءِ کرینے، مچ آپاکستانی قوم تینا بہادر فوج اتون سلوک ءِ۔ عطاءاللہ تارڑ پارے کہ وزیراعظم اینو قومی سلامتی کمیٹی نا دیوان ءِ بٹنگانے ہراٹی ساڑی حالیت آتا خوڑتی اٹ جاچ ءِ ہلنگک۔ اوپارے کہ پاکستان پہلگام واقعہ نا جاست وپاست نا پارے ولے بھارت اوڑآن ہم نرا، اینو جلہو آن پد ہم ہمووڑ نرا، پاکستان اینو بھارت ءِ پبی ورندی تس و بھارت پیہن آ بیرک ءِ چست کرسا بیوس مس۔ بنجائی وزیر حوالکاری اسہ سوج اسے نا ورندی ٹی پارے کہ بھارتی میڈیا تینٹ مننگ ءِ کہ اوفتا جہاز آتے خلسا بِٹنگا، پین نسخان تا سرجم حوال آک زوت مون آ بریرہ۔ اوپارے کہ پاکستان نا سلہہ بند فوج نئے بیرہ جنگی ہدف آتے شست کرے، شاری اسے شست کننگتوانتئے کہ ننا سلہہ بند فوج کسبی اصول آتا پورو پابندءِ۔ عطاءاللہ تارڑ پارے کہ جنگ انا ہم آداب مریک، دشمن ہم مرے تو کم ظرفی بایدے مف کہ شاری تے شست کننگے۔ اوپارے کہ اینو صحافی تا اسہ ڈل اسے مرید نا و بہاولپور دننگ نا ڈٹ ئس تاکہ جہانی میڈیا ءِ نشان تننگ مرے کہ داعلاقہ غاتیٹی ہچ ءُ دہشت گرد کیمپ اس اف۔ اوپیدوار کرے کہ پاکستان دہشت گردی نا برخلاف جنگ اٹی فرنٹ لائن اسٹیٹ ءِ ہرا 90 ہزار آن زیات نہادی جون تا قربانی تسنے۔ بھارت تینٹ دہشت گردی ٹی اوار ءِ، او امریکہ، آسٹریلیاو کینیڈا ٹی سکھ آتا خون اٹی اوار خننگانے وخت اس کہ کلبھوشن یادیو کون آ دہشت گرد ءِ پاکستان اٹ دزگیرکننگا ہرا تخریبی سرجزآتیٹی اوار ئس۔ اوپارے کہ بھارت تون نئے دلیل اس ارے نئے شاہدی اس و پہلگام واقعہ ٹی ایف آئی آر واقعہ نا بیرہ دہ منٹ آن پد نوشتہ کننگا وخت اس کہ پولیس یک و نیم گھنٹہ غان پد واقعہ نا جاگہ غا سرمس۔ عطاءاللہ تارڑ پارے کہ مچ آ قوم پاکستان نا فوج اتون ہم کوپہ سلوک ءِ، نن جہانی میڈیا نا مون آ پاکستان نا موقف ءِ پیدوار وڑاٹ تخان وخت اس کہ بھارت نا بیانیہ اسہ جاگہ اس ہم نظر بتو۔ اوپارے کہ بھارت بدنیتی اٹ بسوسس ولے ہراتم مقابلہ مس تو نرا و اینو او پیہن آ بیرک ءِ چست کننگ آ بیوس مس۔
