واشنگٹن۔7مئی (اے پی پی): امریکی صدر ڈونلڈ ٹرمپ ءَ پاکستانی شہر ءُ آزاد کشمیر ءِ لہتیں دمگ آنی سر ءَ بھارت ءِ میزائل اُرش ءَ را شرمندگی لیک اتگ ءُ امیت درشان کتگ کہ بھارت ءِ کارروائی زوت ھلاس بیت۔ سئے شمبے ءِ شپ ءَ اُرشانی سر ءَ رد عمل پیش کنان ءَ صدر ٹرمپ ءَ وائٹ ہاؤس ءَ احوالکاراں گوں تران کنان ءَ گوشت کہ اے شرم ءِ گپ اِنت۔ ما بس ھما وھد ءَ اشکتگ اَت کہ ما اوول آفس ءِ دروازگاں چہ گوزگ ءَ اِتیں۔ آئی ءَ دوئیں ایٹمی رقیبانی بابت ءَ گْوشتگ: “آ بازیں وھدے ءَ جنگ ءَ اَنت… منی اُمیت اِنت کہ اے باز زوت ھلاس بیت۔” اے درگت ءَ نیویارک ءَ اقوام متحدہ ءِ بنجاہی کارگس ءَ اقوام متحدہ ءِ جارکش ءَ گشتگ کہ سیکرٹری جنرل انتونیو گوترز ”لائن آف کنٹرول ءُ میان استمانی سیمسر ءِ سرا ہندوستان ءِ فوجی کارروائیانی سرا سک باز جیڑگ ءَ انت۔“ ترجمان اسٹیفن ڈوجاریک ءَ وتی یک مختصریں بیانے ءِ تہا گشتگ کہ آئی ءَ دوئیں ملکاں چہ گیش ءَ چہ گیش فوجی تحمل ءِ کارمرز کنگ ءِ لوٹ کتگ۔
