اسلام آباد۔7مئی (اے پی پی): وفاقی وزیر ءِ اھوالکاری ءُ شنگکاری عطا اللہ تارڑ ءَ گشتگ کہ مارا ترس اتگ ات کہ بھارت زوراکی ءَ کنت۔ بھارت ءَ شہری نشانگ جوڑ کتگ اَنت۔ ھما جاگہاں کہ نشانگ جوڑ کنگ بوتگ انت آھاں ناشرکارانی کیمپ نہ بوتگ انت۔ آئی ءَ گوں میاں اوستمانی نشریات ”بی بی سی“، ”اسکائی نیوز“ ءُ ”ٹی آر ٹی ورلڈ“ ءَ گپ ءُ تران کنگ ءَ ات۔ وفاقی وزیر ءِ اھوالکاری ءَ گوشت کہ بھارت ءَ پاکستان ءِ پنچ جتا جتائیں جاھ آنی سر ءَ بے سوبیں اُرش کتگ ایشی ءِ آسر ءَ زالبول ءُ زھگ شھید بوتگ اَنت۔ آئی ءَ گوشت کہ دو روچ پیسر لائن آف کنٹرول ءِ نزیک ءَ دراھیں دمگ آنی تر ءُ تاب ءَ درملکی ءُ بنجاہی اھوالکار برگ بوتگ اَنت کہ اودا بھارت ءَ دروگیں دعویٰ کتگ کہ ناشرکارانی کیمپ است اَنت۔ عطا اللہ تارڑ ءَ اے گپ پدر کتگ کہ پہلگام ءِ وئیل ءَ پاکستان ءِ دست مان بوھگ ءِ ھندوستان ءِ گور ءَ ھچ وڑیں ثبوت نیست، اے دمگ چہ لائن آف کنٹرول ءَ 200 کلومیٹر دور اِنت ءُ اے وئیل ھندی سیکورٹی فورسز ءِ ناکامی اِنت۔ آئی ءَ بھارت ءِ نیمگ ءَ شہری آبادی ءِ نشانگ جوڑ کنگ ءَ را سک باز افسوسناکیں ءُ مذمت ءِ لیک اتگ۔ وفاقی وزیر ءِ اھوالکاری ءَ گوشت کہ پاکستان ناشرکاری ءِ ھلاپ ءَ جنگ ءَ فرنٹ لائن ریاست اِنت ءُ وت ناشرکاری ءِ آماچ اِنت۔ وزیر ءِ اھوالکاری ءَ گوشت کہ ما 90 ھزار ءَ چہ گیش مردمانی جان قربان کتگ ءُ انگت ءَ وتی روکپتی دمگ ءُ سیم سر آنی سر ءَ ناشرکار آنی ھلاپ ءَ جنگ ءَ ایں ءُ ھندوستان وت ناشرکاری ءِ کار آنی تہ ءَ ھوار انت۔ جعفر ایکسپریس ءِ وڑیں واقعہانی پد ءَ ہم ہندوستان ءَ ایشی ءِ مذمت ہم نہ کتگ۔ امریکہ، کینیڈا ءُ آسٹریلیا ءَ سکھانی کُشگ ءَ ھندوستان ءِ دست مان اِنت۔ مئے کرّا ھندوستان ءِ ناشرکاری ءِ تہ ءَ ھوار بوھگ ءِ پُر مھکمیں شواہد ھست کہ ایشانی تہ ءَ چہ درستاں مستریں شواہد کلبھوشن جادھو ءِ کیس اِنت کہ آ ھندوستان ءِ بحری افسر ءُ ناشرکارے ۔ عطا اللہ تارڑ ءَ گوشت کہ پاکستان جھان ءِ امن ءِ ضامن انت ءُ ما ناشرکار ءُ دگنیا ءِ نیام ءَ دیوال ایں ۔ پاکستان انگت ءَ گران بہائیں جانانی قربانی دیگ ءَ ناشرکاری ءِ ھلاپ ءَ جنگ ءَ اِنت۔ مرچی ھم بلوچستان ءَ ناشرکارانی ھلاپ ءَ کارروائی کنگ بیتگ۔ وزیر ءِ اھوالکاری ءَ گوشت کہ پاکستان اکس ءَ چہ کمتر لیکگ مہ بیت۔ پاکستان بھارتی زوراکی ءِ لائکیں پسو ءَ دیگ ءَ اِنت۔ آئی ءَ گوشت کہ مزن وزیر محمد شہباز شریف ءَ مرچی سھب ءَ راجی سلامتی کمیٹی ءِ دیوان جار جتگ۔ آئی ءَ گوشت کہ مزن وزیر محمد شہباز شریف ءَ سفارتی محاذ ءِ سر ءَ بازیں ملک آنی سفیر آں گوں گند ءُ نند کتگ ءُ جھان ءِ سروک آں گوں رابطہ ھم کتگ۔ پاکستان ءَ پہلگام ءِ وئیل ءِ سرا شفاف ءُ بے رھبندیں پٹ ءُ پول ءِ ھم پیشکش کتگ۔ وفاقی وزیر ءَ اے گپ ءِ سر ءَ زور پر دات کہ پاکستان ءَ کدی زوراکی ءِ بندات نہ کتگ بلے وت رکینگ ءَ چہ پد نہ کپ ایت۔
