راولپنڈی ۔7مئی (اے پی پی):بھارت ءِ بزدلیں اُرش ءِ پسو ءَ پاکستان ءِ سلاہ بندیں اُرد ءَ زمینی، اسپیس ءُ لائن آف کنٹرول ءِ کش ءُ گور ءَ دژمن ءِ دیم ءَ جوانیں ، کچلگ ءُ فیصلہ کنوکیں پسو داتگ۔ آیاں سئے ھندی بالی گراب ءُ یک ڈرونے ایر جتگ ءُ بریگیڈ ءِ بنجاہی کارگس ءُ ایل اے سی ءِ سر ءَ بازیں پوسٹ تباہ کتگ اَنت۔ ھندی سپاھیگ کہ وتی پوسٹ یلہ کنگ ءَ پد شُتگ اَنت آ توپ خانہ ءِ نشانگ جوڑ کنگ بوتگ اَنت ءُ ایشی ءِ آسر ءَ دژمن ءِ بازیں سپاھیگ بیران بوتگ اَنت۔ سیکورٹی وسیلگ ءِ رد ءَ بھارتی بالی گراباں وتی اسپیس دمگ ءِ تہ ءَ بوھگ ءِ وھد ءَ کوٹلی، احمد پور شرقیہ، مظفر آباد، باغ ءُ مریدکے ءِ سر ءَ میزائل تیرگواری کتگ۔ بنداتی ھالانی رِد ءَ میزائل اُرش ءَ یک جنکے شھید بیتگ، یک جنینے ءُ یک مردینے ٹپی بیتگ اَنت ءُ دو جاھاں مسیت شھید کنگ بیتگ اَنت۔ سیکورٹی وسیلگ ءِ رد ءَ پاکستانی لشکر دژمن ءِ ھمک گامگیج ءِ سر ءَ نزیکی ءَ چارگ ءَ اَنت ءُ سرجمیں زور ءَ پسو دیگ ءَ اَنت۔ آپریشن برجاہ انت۔ پاکستانی لشکر ءَ ھندی بالی اُرد ءَ را سک باز تاوان داتگ کہ ایشی ءِ تہ ءَ سئے جنگی بالی گراب تباہ کنگ بوتگ اَنت۔ پاک فضائیہ ءَ دژمن ءِ اولی بالی گراب بتھنڈا ءَ ، دومی بالی گراب اخنور ءَ ءُ سیمی رافیل جنگی بالی گراب آوانٹیپورا ءِ 17 زرئی میل ءِ جنوب مغرب ءَ ایر جتگ۔ البت پاک فضائیہ ءِ دراہیں بالی گراب ایمن انت۔ لاک ءِ سرا پاکستانی فوج ءِ دراجیں کارروائی ءِ آسر ءَ جولی، بدوری، دودانیال، پیر کانٹی، ءُ اودھم پور ءِ دمگاں دژمن ءِ درجناں پوسٹ تباہ کنگ بوتگ انت۔ ھندی سپاھیگ وتی پوسٹ یلہ کنگ ءَ پد شُتگ اَنت۔ پیر کانٹی ءِ شعبہ ءَ ایوک ءَ 40 ءِ نزیک ءَ پوسٹ یلہ کنگ بوتگ انت۔ بادوری سیکٹر ءَ دژمن ءِ 50 سپاھیگ وتی پوسٹ یلہ کنگ ءَ پد شُتگ اَنت۔ پاکستانی لشکر ءِ توپ خانہ ءَ شُتگیں ھندی سپاھیگانی سر ءَ تیرگواری کُتگ، ایشی ءِ آسر ءَ دژمن ءِ بازیں کارندہ ءِ بیرانی ءِ ھال دیم ءَ اتکگ۔ بھارت ءَ را دیم ءِ لیکہ ءِ سر ءَ مزنیں تاوان رستگ۔ پاک فضائیہ ءَ برنالا سیکٹر ءَ دژمن ءِ بریگیڈ ءِ بنجاہی کارگس ءُ دژمن ءِ ڈرون تباہ کتگ۔ پاکستان ءِ سلاہ بندیں اُرد ءِ سرجمیں ھوشیاری ءِ سبب ءَ ھندوستان ءِ بالی گراباں پاکستان ءِ سرزمین ءَ ھوار بوھگ ءِ جرات نہ کتگ۔ پاکستانی لشکر ءِ دل ءَ اے گپ ءِ سر ءَ دلجمی بوتگ کہ ھر ٹپّ ءِ حساب ءُ کتاب کنگ بیت۔
