اسلام آباد۔7مئی (اے پی پی): راجی اسمبلی ءِ اسپیکر سردار ایاز صادق ءَ بھارت ءِ نیمگ ءَ پاکستان ءِ سر ءَ اُرش ءِ مذمت سک باز کتگ ءُ گْوشتگ کہ شپ ءِ تہاری ءَ پنچ جاھاں بھارت ءِ اُرش بے دروریں بزدلی ئیں کارے ۔ ہندوستان ءَ شہری آبادی ءِ سرا اُرش کنان ءَ میاں اوستمانی کانود ءِ سرا بے دروریں خلاف ورزی کتگ۔ بزدلیں دژمن ءِ اُرش ءِ سرا یک موزوںیں پسو یے دیگ بیت۔ وتی بیان ءِ تہ ءَ قومی اسمبلی ءِ سروک ءَ پاکستانی اُرد آناں ھندی زوراکی ءِ لائکیں پسو دیگ ءِ پد ءَ ستا کرتگ ءُ گوشت کہ پاکستان ءِ سلاھبندیں اُرد دژمن ءِ زوراکی ءِ سرجمیں توان ءَ گوں پسہ دیگ ءَ اَنت۔ ہندوستان ءَ زوراکی بندات کنان ءَ پاکستان ءِ صبر ءِ چکاس کتگ۔ بھارت ءَ بزدلیں اُرش ءِ ھرابیں آسراتی ءِ آماچ بوھگی اِنت۔ سردار ایاز صادق ءَ گوشت کہ سرجمیں راج یک سنگے ءِ وڑ ءَ پاکستانی لشکر ءِ گوما اوشتاتگ، بھارت ءِ ھلاپ ءَ مسلط بوتگیں جنگ ءَ 240ملین مردم جنگ کن اَنت۔ آئی ءَ گوشت کہ پاک فضائیہ ءَ مدام دژمن ءِ دیم ءَ کچلیں پسو داتگ، راج ءُ اُرد آنی حوصلہ برز انت، دژمن ناکام بیت۔ آئی ءَ گوشت کہ بھارت ءَ پاکستان ءِ امن ءِ واھشت ءَ را نزوری لیک اتگ، بھارت ءَ را سکیں گرانیں آسر آنی دیمپانی کنگی بیت۔ سرجمیں راج پاکستانی لشکر ءِ سوبمندی ءِ واستہ دعا لوٹ ایت۔
