اسلام آباد۔7مئی (اے پی پی): پاکستان ءَ بھارت ءِ پدریں زوراکی ءِ سک باز مذمت کتگ ءُ گوشت کہ بھارتی بالی اُرد ءَ جنگ ءِ بے سوب ءُ بے دروریں کارروائی ءِ تہ ءَ بھارتی اسپیس دمگ ءَ نندگ ءِ وھد ءَ اسٹینڈ آف سلاہ آنی کارمرد کنگ ءَ پاکستان ءِ وت واجہی ءِ ھلاپ ورزی کتگ۔ آئی ءَ مریدکے ءُ بہاول پور ءَ میاں اوستمانی سیمسر ءِ سر ءَ ءُ کوٹلی ءُ مظفر آباد ، آزاد جموں ءُ کشمیر ءَ لائن آف کنٹرول ءِ سر ءَ شہری آبادی ءَ را نشانگ جوڑ کتگ۔ ہندوستان ءِ زوراکی ءِ آسر ءَ زالبول ءُ زھگاں ھوار لس مردم شھید کنگ بوتگ اَنت۔ اے زوراکی ءِ کار ءَ تجارتی بالی ٹریفک ءَ را ھم مزنیں ھترہ یے دیم ءَ آؤرتگ۔ درئی کارانی کارگس ءِ جارکش ءِ نیمگ ءَ چہ جاڑی بوتگیں بیان ءَ گوشت کہ ما بھارت ءِ بزدلیں کارروائی ءَ را سک باز مذمت کن ایں کہ اے اقوام متحدہ ءِ منشور، میاں اوستمانی کانود ءُ بین ملکی سیادی ءِ جوڑ بوتگیں اصول آنی ھاسیں ھلاپ ورزی اِنت۔ ترجمان ءَ گوشت کہ پہلگام ءِ اُرش ءِ درگت ءَ بھارتی سروکی ءَ یک رندے پدا ناشرکاری ءِ آڑ ءَ وتی شرمندگیں قربانی ءِ بیانیہ دیم ءَ برتگ کہ ایشی ءَ چہ دمگی امن ءُ ایمنی ءَ را ھترہ ءِ دیم ءَ آرگ بوھگ ءَ اِنت۔ ہندوستان ءِ بے پرواہی ءِ سبب ءَ دوئیں ایٹمی سلاہ داریں ملک مزنیں جیڑہ ءِ نزیک ءَ اتکگ انت۔ ترجمان ءَ گشتگ کہ جاور مدام بدل بوھگ ءَ انت۔ پاکستان ءِ وتی وھد ءُ جاہ ءَ اقوام متحدہ ءِ منشور ءِ آرٹیکل 51 ءِ رد ءَ ءُ میاں اوستمانی کانود ءِ رد ءَ جوانیں پسو دیگ ءِ حق است انت۔ جارکش ءَ گوشت کہ پاکستان ءِ حکومت، سلاہ بندیں اُرد ءُ الس بھارتی زوراکی ءِ ھلاپ ءَ یکجائی ءَ انت ۔ آ مدام پاکستان ءِ وت واجہی ءُ سرزمین ءِ یکوئی ءِ رکھینگ ءُ دیمپان ءِ واستہ آہنی جزم ءِ گوما کار کنت۔
